قۇلسارىدا سۋ تاسقىنىنان زارداپ شەككەندەر ءۇشىن جاڭا شاعىن اۋدان سالىنىپ جاتىر

اتىراۋ. KAZINFORM - اتىراۋ وبلىسىنداعى قۇلسارى قالاسىندا سۋ تاسقىنىنان زارداپ شەككەندەر ءۇشىن جاڭا شاعىن اۋدان سالىنىپ جاتىر.

ونەركاسىپ جانە قۇرىلىس مينيسترلىگىنىڭ مالىمەتىنشە، جاڭادان بوي كوتەرىپ جاتقان «بولاشاق» دەپ اتالاتىن جاڭا اۋدانعا كەزەڭ-كەزەڭىمەن 100 وتباسى قونىستانادى.

«تۇرعىن ۇيلەردى قايتا قالپىنا كەلتىرۋ شارالارى اياسىندا قۇلسارىدا تامىز ايىنىڭ

سوڭىنا دەيىن 80 ءۇي پايدالانۋعا بەرىلمەك. مۇندا قۇرىلىس جۇمىستارى قارقىن العان. قۇرىلىس الاڭىندا جەرگىلىكتى 8 مەردىگەر مەكەمە جانە 414 جۇمىسشى جۇمىلدىرىلدى. ال، 20 ءۇيدىڭ قۇرىلىسىن قىركۇيەك ايىندا اياقتاۋ جوسپارلانىپ وتىر»، - دەپ حابارلادى مينيسترلىكتىڭ باسپا ءسوز قىزمەتى.

ءار ءۇيدىڭ كولەمى - 100 شارشى مەتر، 5 بولمەسى بار. قازىر 84 ءۇيدىڭ قابىرعاسىن قالاۋ جۇمىستارى اياقتالعان. ال، 57 ءۇيدىڭ توبە جابىندىسىن جابۋ جۇمىستارى ءجۇرىپ جاتىر.

Фото: Өнеркәсіп және құрылыс министрлігі

سونداي- اق، 35 ءۇيدىڭ سىلاق جۇمىستارى باستالىپ، 43 ۇيگە تەرەزە ورناتىلدى. جاڭا ۇيلەرگە ەلەكتر، سۋ، كارىز جەلىسى تارتىلدى.

مينيسترلىكتىڭ احۋالدىق ورتالىعىنىڭ مالىمەتىنشە، اتىراۋ وبلىسىندا بارلىعى 2674 وبەكتىگە تەحنيكالىق تەكسەرۋ جۇرگىزىلگەن. سونىڭ ناتيجەسىندە 100 ءۇي سالىنىپ جاتىر. تۇرعىندارعا 1376 ءۇي ساتىپ الۋ قاجەت بولعان. ونىڭ ىشىندە 1372 ءۇي ساتىپ الىنعان.

سونىمەن بىرگە 1198 ۇيگە جوندەۋ جۇمىستارىن جۇرگىزۋگە شەشىم قابىلدانعان. قازىر 1191 ۇيدە جوندەۋ اياقتالعان.

Фото: Өнеркәсіп және құрылыс министрлігі

ەسكە سالا كەتەلىك، بۇعان دەيىن قۇلسارى حالقىنا ءۇي ساتىپ الۋعا، جوندەۋگە 70 ميلليارد تەڭگە اۋدارىلعانىن جازعان بولاتىنبىز.

سونداي- اق، قۇلسارىدا سالىنىپ جاتقان 100 ءۇيدىڭ 80 ءى تامىزدىڭ سوڭىنا دەيىن پايدالانۋعا بەرىلەتىنىن حابارلاعان ەدىك.