ساپار اياسىندا ءبىرقاتار ماڭىزدى كەزدەسۋ وتكىزىپ، «جاھاندىق ورنىقتى كولىك» حالىقارالىق فورۋمىنا قاتىستى. نۇرلىبەك نالىبايەۆ قىتاي حالىق رەسپۋبليكاسىنىڭ مەملەكەتتىك كەڭەسى پرەمەرىنىڭ ورىنباسارى ديڭ شيۇ شياڭمەن كەزدەستى. باسقوسۋ بارىسىندا تاراپتار ەكى ەل اراسىنداعى ساۋدا-ەكونوميكالىق، مادەني-گۋمانيتارلىق، عارىش، جاساندى ينتەللەكت سالالارىنداعى ىنتىماقتاستىقتى تەرەڭدەتۋ جايىن تالقىلادى. سونداي-اق قازاقستان مەن قىتاي اراسىنداعى ماڭگىلىك جان-جاقتى ستراتەگيالىق ارىپتەستىكتى ىلگەرىلەتۋ باعىتىنداعى جۇمىستارعا توقتالدى.
ساپار اياسىندا قازاقستاندىق دەلەگاتسيا «جاھاندىق ورنىقتى كولىك» فورۋمىنا قاتىستى. جيىندا ەلىمىزدىڭ ترانزيتتىك الەۋەتى تانىستىرىلدى. سونداي-اق لوگيستيكالىق تىزبەكتى ءارتاراپتاندىرۋ جولدارى دا ۇسىنىلدى. سونىڭ ءبىرى ىلە بويىمەن ترانس شەكارلىق وزەن مارشرۋتىن اشۋ. ول قونايەۆ قالاسىنان قىتايدىڭ قۇلجا شاھارىنا دەيىن جالعاسادى. تىڭ جوبانىڭ مۇمكىندىكتەرى حالىقارالىق جيىندا ايتىلدى.
نۇرلىبەك نالىبايەۆ، ق ر پرەمەر-ءمينيسترىنىڭ ءبىرىنشى ورىنباسارى:
- مارشرۋتتى ىسكە اسىرۋ قىتاي مەن ورتالىق ازيا اراسىنداعى قولدانىستاعى، اۆتوموبيل جانە تەمىرجول باعىتتارىن تولىقتىرا وتىرىپ، جاڭا كولىك-لوگيستيكالىق ءدالىزدى قالىپتاستىرۋعا مۇمكىندىك بەرەدى. ىشكى سۋ كولىگىن پايدالانۋ ءىرى گاباريتتى، اۋىر جانە جوبالىق جۇكتەردى تاسىمالداۋعا مۇمكىندىك بەرەدى. وزەن تاسىمالى جوعارى ەكونوميكالىق تيىمدىلىكپەن سيپاتتالادى. جانە ايتارلىقتاي جۇك اعىندارىن قامتاماسىز ەتە الادى.
قازاقستاننىڭ كولىك-لوگيستيكالىق الەۋەتى جىلدان جىلعا كۇشەيىپ كەلەدى. كەيىنگى 5 جىلدا قىتايدان ەلىمىز ارقىلى ترانزيتپەن تاسىمالدانعان جۇك كولەمى 3,5 ەسە ارتتى. ءبىر عانا ترانسكاسپي حالىقارالىق كولىك باعىتىمەن جونەلتىلگەن كونتەينەرلەر سانى وتكەن 8 ايدا 60 مىڭنان استى. ال تەمىر جولمەن 25,1 ميلليون توننا جۇك تاسىمالدانعان.
فورۋم كەزىندە پرەمەر-ءمينيستردىڭ ءبىرىنشى ورىنباسارى «ورتا ءدالىزدى» دامىتۋعا باعىتتالعان جۇمىستارعا ەرەكشە توقتالدى.
نۇرلىبەك نالىبايەۆ، ق ر پرەمەر-ءمينيسترىنىڭ ءبىرىنشى ورىنباسارى:
- جۇمىستاردى ىسكە اسىرۋ كەستەسىن قىسقا مەرزىمدە كەلىسىپ ونى شەكارالاس ينفراقۇرىلىمدى دامىتۋ جۇمىستارىمەن ۇيلەستىرۋدى ماڭىزدى دەپ سانايمىز. ورتا ءدالىزدى دامىتۋعا ينۆەستيتسيالاردى بىرلەسىپ تارتۋدىڭ دا ماڭىزى زور. باعىتتا ودان ءارى دامىتۋ ءۇشىن حالىقارالىق قارجى ينستيتۋتتارىمەن دامۋ بانكتەرىمەن جانە جەكە بيزنەسپەن ارىپتەستىكتى كەڭەيتۋ قاجەت. قازاقستان بارلىق ارىپتەستەرىمەن تىعىز جۇمىس جۇرگىزۋگە دايىن.
ۇكىمەت باسشىسىنىڭ ءبىرىنشى ورىنباسارى «سيتيك گرۋپ» كورپوراتسياسىنىڭ باسشىسىمەن كەزدەستى. قىتايلىق ينۆەستور ەلىمىزدە مۇناي وڭدەۋ، مۇناي-گاز، قارجى جانە ينفراقۇرىلىمدىق قۇرىلىس سالاسىندا ماڭىزدى جوبالاردى ءساتتى جۇزەگە اسىرعان. كومپانيا جەتەكشىسى سي گوحۋاعا ەكى ەلدىڭ كاسىپكەرلىك ىنتىماقتاستىعىن دامىتۋعا قوسقان ۇلەسى ءۇشىن مەملەكەت باسشىسى قاسىم- جومارت توقايەۆتىڭ اتىنان ەكىنشى دارەجەلى دوستىق وردەنى تابىس ەتىلدى.
24.kz