قۇلدىقتا بولعان ادامداردىڭ ءىسى سوتقا جەتە بەرمەيدى – ۇ ە ۇ وكىلى

اقتوبە. KAZINFORM - اقتوبەدە ادامداردىڭ قۇجاتتارىن تارتىپ الىپ، ءماجبۇرلى تۇردە جۇمىس ىستەتۋ دەرەگى سوڭعى جىلدارى رەسمي تىركەلمەدى.

الايدا وسى سالادا جۇمىس ىستەيتىن ۇكىمەتتىك ەمەس ۇيىم وكىلدەرى مۇنداي جاعداي ءالى كۇنگە دەيىن كەزىگەتىنىن ايتادى.

اقتوبە وبلىستىق پوليتسيا دەپارتامەنتى باسپا ءسوز قىزمەتىنىڭ حابارلاۋىنشا، بىلتىر وڭىردە قۇلدىقتا ۇستاۋ دەرەگى تىركەلمەدى. ال وسى سالادا جۇمىس ىستەپ جاتقان «ءدارىس-2016» ورتالىعىنىڭ ماماندارى بولسا ءالى دە ەڭبەگى قانالىپ، كومەك سۇراپ كەلەتىندەردىڭ ازايماعانىن ايتادى. سول ءۇشىن دە جىل سايىن شارۋاشىلىقتاردى ارالاپ، قاجەت بولسا ءار جۇمىسشىسىنان: «ءوز ەركىڭمەن ءجۇرسىڭ بە؟ جالاقى رەسمي تولەنە مە؟» - دەپ سۇرايتىنىن جاسىرمادى. سەبەبى، قۇلدىققا ءتۇستىم دەپ وكىنەتىندەر - الدىمەن ءوزارا اۋىزشا كەلىسىپ، كەيىن جانجال تۋىنداعاندا دالادا قالاتىن ادامدار.

«بىلتىر الەكساندر ەسىمدى اقتوبەلىك ءماجبۇرلى تۇردە قايىر سۇراپ وتىرعان جەرىنەن قۇتقارىلدى. ۆولونتەر ورتالىق بازار الدىندا وتىرعان ادامدى كورىپ: «كومەك كەرەك پە؟» - دەپ سۇراعان. ول ءوزىن وزگە ادامداردىڭ اڭدىپ تۇرعانىن ايتقان. ەرىكتى ءبىر مارتە بارىپ: «باقىلاپ جۇرگەن ادام كەلگەندە ىممەن بىلگى بەر»، - دەيدى. ارادا ۋاقىت وتكەندە الەكساندر ايەل ادامدى كورسەتەدى. «قورقامىن، كۇندە كەشكىسىن ۇرىپ- سوعادى» دەپ كومەك سۇراعان سوڭ ەرىكتىلەر قول ۇشىن سوزۋدى ءجون كورەدى. ەكىنشى كۇنى ەرىكتىلەر كولىكتى جاقىن قويىپ، قايىر سۇراپ وتىرعان الەكساندردى الىپ كەتەدى. بۇل ءىس بويىنشا تەرگەۋ ءجۇرىپ، ءماجبۇرلى قايىر سۇراۋعا شىمكەنتتە جۇرگەندە مىندەتتەلگەنى انىقتالدى. ءىس تە سوندا جىبەرىلدى.

نەگىزى شەتەلدىك ازاماتتاردىڭ ءتولقۇجاتىن تارتىپ الىپ، جۇمىسقا جەككەندەر ءىسى سوتقا جەتە بەرمەيدى. جابىرلەنۋشىلەر قورىققانىنان ەشتەڭە ايتا المايدى ءارى ايىپتالۋشىلار «قولىندا كىسەن جوق، تەلەفونمەن كومەككە شاقىرا الاتىن ەدى. قاشىپ كەتۋىنە دە مۇمكىندىك بولعان» دەگەن ۋاجبەن قۇتىلادى»، - دەدى «ءدارىس-2016» ورتالىعىنىڭ اتقارۋشى ديرەكتورى گۇلنۇر ەدىگەيەۆا.

ايتۋىنشا، قازىر ول زاڭعا وزگەرتۋلەر مەن تولىقتىرۋلار ەنگىزۋ ءۇشىن جۇمىس توبىنا كىرىپ، ۇسىنىس بەرىپ جاتىر. ماسەلەن، بوپسالاۋ دەرەگى بولسا، تەرگەۋدى پروكۋرورلار دا جۇرگىزەدى. ال ادام ساۋداسى دەرەگى بولسا، قاراپايىم تەرگەۋشى، ۋچاسكەلىك ينسپەكتور تەرگەيدى.

«وقيعا اۋىلدا بولسا، ءىستى قالا تەرگەۋشىسىنە بەرگەن دۇرىس. سەبەبى اۋىلدا ادامدار ءبىر- ءبىرىن تانيدى، بىلەدى. كەيبىرىندە ۇرىپ-سوققان ادامنىڭ ءوزى بۇرىن ىشكى ىستەر ورگانىندا جۇمىس ىستەگەن بولىپ شىعۋى مۇمكىن، تانىسى، تۋىسى بولۋى ىقتيمال. 102 نومىرىنە حابارلاسىپ شاقىرسا دا سول ادام كەلەتىنىن بىلەدى. ۇسىنىسىمىزدىڭ ءبىرى - وسى.

بىزگە جاقىن شەتەلدەردەن «ازاماتتارىمىز قۇلدىقتا وتىر» دەپ حابارلاما تۇسەدى. تەكسەرۋگە ءوزىمىز بارۋعا تىرىسامىز. شىنىمەن ادام تابىلادى، جۇمىس ىستەپ جۇرگەنىن بىلەمىز. شاعىم، ارىز سۇراعاندا پوليتسيا ەشتەڭە تىركەمەيدى.

باتىس قازاقستان وبلىسىندا ءبىر وقيعا بولدى. ۇيىمداسقان قىلمىسقا قارسى كۇرەس باسقارماسىنا حابار بەرىپ، ولار باردى. بارعان كەزدە ەش شاعىمى جوق ەكەنىن ايتتى. ال تۋىستارى وعان كۇماندانىپ، اۋىلدا جۇمىستا جۇرگەندەر ورال قالاسىنا جەتكىزىلدى. تەلەفون ارقىلى ونلاين سويلەسىپ، ءوزىن ۇرعانىن، ءزابىر كورگەنىن، ەلگە قايتاتىنىن ايتقان. ءىس قوزعالىپ، ۇكىم دە شىقتى»، - دەدى گۇلنۇر ەدىگەيەۆا.

ايتا كەتەيىك، «ءدارىس-2016» ورتالىعى تۇرمىستىق زورلىق- زومبىلىق قۇرباندارىنا كومەك بەرۋ، ادام ساۋداسىن بولدىرماۋ، شەتەلدىكتەرگە اقپاراتتىق جانە زاڭگەرلىك قولداۋ كورسەتۋمەن شۇعىلدانادى. مۇندا ايىنا 20-30 قوڭىراۋ ءتۇسىپ، كەڭەس بەرىلەدى. كوبىنە كسرو تولقۇجاتىمەن جۇرگەن ادامداردىڭ قۇجاتىن راسىمدەۋگە كومەك كورسەتەدى. مۇنداي ادامدار شەكارالاس اۋىلداردا كوپ. سونىمەن بىرگە كومەكتەن باس تارتاتىندار دا كەزىگەدى.

«2019 -جىلى ءبىر وقيعا بولدى. تەمىر اۋداندىق پوليتسيا ءبولىمىنىڭ باستىعى حابارلاسىپ، بەلگىسىز ادامنىڭ ايەلدى 6 جاستاعى بالاسىمەن تاستاپ كەتكەنىن ايتتى. ءبىز ونى قالاعا الدىرىپ، قۇجاتتارىن دايىنداۋدى باستاپ كەتتىك. سول كەزدە شىمكەنتتە ءجاسوسپىرىم بالاسى بار ەكەنىن بىلدىك. ونىڭ قامقورشىسى بار. ال جانىنداعى 6 جاستاعى بالانى وزىنە ەرتىپ العان. قۇجات راسىمدەۋدىڭ سوڭعى ساتىسىنا كەلگەندە ايەل بەلگىسىز باعىتقا كەتىپ قالدى. ارادا ەكى جىل وتكەندە ينابات اتتى ايەل قايتا تابىلدى. قۇجات راسىمدەۋدى قايتا باستاۋ ءۇشىن «ەشقايدا كەتپەيمىن» دەگەن قولحات سۇرادىق. ونى بەرمەدى، قايتا كەتىپ قالدى. قۇجات جاساسا ەلدەن شىعارىلاتىنىن بىلەدى. ءبىراق ونىڭ بالاسى بار، تاستاپ كەتە المايدى. ال بالا «ايالا» ومىرلىك قيىن جاعدايداعى بالالاردى قولداۋ ورتالىعىنا قابىلداندى»، - گۇلنۇر ەدىگەيەۆا.

ونىڭ ايتۋىنشا، وڭىردەگى 5 مىڭنان استام جەكە قوجالىقتاعى جۇمىسشىلاردىڭ كەيبىرىندە ەڭبەك شارتى قاراستىرىلماعان. ءبىراق ولاردىڭ ءبارى ادام ساۋداسىمەن اينالىسادى دەگەندى بىلدىرمەيدى. قوجالىق باسشىسىن دا، جۇمىسشىسىن دا تىڭداپ، ەكى تاراپ ورتاق شەشىمگە شاقىرىلادى. ءبىرى تالاپ قويادى، ەكىنشىسى سۇراعانىن بىلەدى.

ايتا كەتسەك، ورتالىققا ايىنا 30 ادام حابارلاسادى. ءبىراق ءبارى دە تەك ادام ساۋداسى، قۇلدىقتا ۇستاۋعا قاتىستى ەمەس. ماسەلەن، كەشەگى بوراندا ەكى اۆتوبۋس ادامنىڭ (وزگە ەلدىڭ ازاماتتارى) جاتىن ورنى مەن تاماعىن ۇيىمداستىرعان. مۇنداي دا جاعدايلار بولادى.