نەلىكتەن تولەم كولەمى ازايدى؟
الماتى قالاسى بويىنشا «مەملەكەتتىك الەۋمەتتىك ساقتاندىرۋ قورى» فيليالى ديرەكتورىنىڭ ورىنباسارى بالعىن ساتبەك قىزىنىڭ ايتۋىنشا، ەندى الەۋمەتتىك تولەمدى ەسەپتەۋ كەزىندە ايەلدىڭ ايلىق تابىسى ەڭ تومەنگى جالاقىنىڭ (ە ت ج) جەتى ەسەلەنگەن مولشەرىنەن اسپايتىن كولەمدە عانا ەسەپكە الىنادى.
2026 -جىلى بۇل شەك 595 مىڭ تەڭگەنى قۇرايدى. ياعني، ايەلدىڭ ناقتى جالاقىسى بۇدان جوعارى بولسا دا، تولەمدى ەسەپتەۋ كەزىندە 595 مىڭ تەڭگەدەن اساتىن بولىگى ەسكەرىلمەيدى.
بيىلعى جىلدىڭ العاشقى التى ايىندا جۇمىس ىستەيتىن ايەلدەرگە جۇكتىلىك پەن بوسانۋعا بايلانىستى ورتا ەسەپپەن 1,4 ميلليون تەڭگە تولەنگەن. وتكەن جىلدىڭ وسى كەزەڭىندە ورتاشا تولەم 1,6 ميلليون تەڭگە بولعان. وسىلايشا، كورسەتكىش 254,9 مىڭ تەڭگەگە نەمەسە 15,5 پايىزعا ازايعان.
ماماننىڭ سوزىنشە، ءاربىر ايەلگە تولەنەتىن الەۋمەتتىك تولەم جەكە ەسەپتەلەدى. ول سوڭعى 12 اي ىشىندە الەۋمەتتىك اۋدارىمدار جۇرگىزىلگەن تابىس مولشەرىنە جانە جۇكتىلىك پەن بوسانۋعا بايلانىستى دەمالىستىڭ ۇزاقتىعىنا تاۋەلدى.
ەڭ جوعارى تولەم قانشا؟
2026 -جىلى جۇمىس ىستەيتىن ايەلدەر ءۇشىن جۇكتىلىك پەن بوسانۋعا بايلانىستى ءبىرجولعى الەۋمەتتىك تولەمنىڭ ەڭ جوعارى مولشەرى 2 ميلليون 499 مىڭ تەڭگەنى قۇرايدى. بۇل سوما تابىستىڭ جەتى ە ت ج كولەمىمەن شەكتەلۋى جانە 126 كۇندىك ستاندارتتى دەكرەتتىك دەمالىس نەگىزىندە ەسەپتەلگەن.
مىسالى، ايەلدىڭ ايلىق جالاقىسى 600 مىڭ تەڭگە بولسا جانە ول 126 كۇندىك جۇكتىلىك پەن بوسانۋعا بايلانىستى دەمالىسقا شىقسا، تولەم ناقتى جالاقىسى بويىنشا ەمەس، بەلگىلەنگەن 595 مىڭ تەڭگە شەگى بويىنشا ەسەپتەلەدى. سونىڭ ناتيجەسىندە وعان ەڭ جوعارى مولشەردەگى 2 ميلليون 499 مىڭ تەڭگە تولەنەدى.
سونداي-اق دەكرەتتىك دەمالىس اياقتالماي تۇرىپ جۇمىسقا قايتا شىققان ايەل الەۋمەتتىك تولەمنەن ايىرىلادى. بۇل جاعدايدا الۋشى جۇمىسقا شىققانى تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسىنا حابارلاۋى ءتيىس. ءوتىنىش نەگىزىندە تولەم توقتاتىلادى جانە كەيىن قايتا تاعايىندالمايدى.