قۇبىرداعى اقاۋ: مايقايىڭدا تەحنوگەندىك سيپاتتاعى توتەنشە جاعداي جاريالاندى
پاۆلودار. KAZINFORM - مايقايىڭ كەنتى مەن «بوگاتىر كومىر» ا ق- نا سۋ جەتكىزەتىن ماگيسترالدەگى اقاۋدى قالپىنا كەلتىرۋ جۇمىستارى ءالى دە جالعاسۋدا. بارلىعى 119 ادام جانە 48 مامانداندىرىلعان تەحنيكا جۇمىلدىرىلعان.
پاۆلودار وبلىسى اكىمىنىڭ باسپا ءسوز قىزمەتىنەن حابارلاعانداي، ءوڭىر باسشىسى اسايىن بايحانوۆ مايقايىڭ كەنتىندەگى ديامەترى 1020 م م سۋىق سۋمەن جابدىقتاۋ قۇبىرىنداعى اقاۋدى جويۋ بويىنشا جەدەل شتابتىڭ وتىرىسىن وتكىزدى.
ماماندار قۇبىردىڭ ءاربىر ۋچاسكەسىندە مۇز قاتۋ مەن مەن اۋانىڭ تۇرىپ قالۋ جايتتارىن تەكسەرىپ جاتىر. مۇنداي ۋچاسكەلەر انىقتالعان كەزدە قۇبىردى بۋ گەنەراتورلارىمەن جىلىتۋ جۇرگىزىلۋدە. جەكەلەگەن ۋچاسكەلەردەگى جەلىنىڭ اينالاسىنا كومىر مەن شپال ءۇيىلىپ، وت جاعىلعان. وسىلايشا قاتىپ قالعان قۇبىرلار ءجىبىتىلىپ جاتىر.
«مايقايىڭ كەنتىنە سۋ تومەن قىسىمدا بەرىلىپ جاتىر. تاۋلىگىنە ورتاشا تۇتىنۋ كولەمى - 250 تەكشە مەتر. رەزەرۆۋارلاردا تۇراقتى تۇردە تاۋلىكتىك سۋ قورى بار ءارى ول تۇراقتى تۇردە تولتىرىلۋدا. بۇل جۇمىستارعا 10 تەحنيكا جۇمىلدىرىلعان. 23-اقپاندا باياناۋىل اۋدانىنىڭ اكىمدىگى توتەنشە جاعدايدىڭ الدىن الۋ جانە جويۋ جونىندەگى كوميسسيانىڭ كەزەكتەن تىس وتىرىسىندا مايقايىڭ كەنتىنىڭ اۋماعىندا جەرگىلىكتى اۋقىمداعى تەحنوگەندىك سيپاتتاعى توتەنشە جاعداي جاريالاۋ تۋرالى شەشىم قابىلدادى»، - دەپ مالىمدەدى ءوڭىر اكىمىنىڭ باسپا ءسوز قىزمەتىنەن.