قازىر وزبەكستانعا جۇمىس ىزدەپ اعىلعان قازاقستاندىقتار دا كوپ - ەلشى

استانا. KAZINFORM - قازاقستاننىڭ وزبەكستانداعى توتەنشە جانە وكىلەتتى ەلشىسى بەيبىت اتامقۇلوۆ وزبەكستان مەن قازاقستان اراسىنداعى ەڭبەك ميگراتسياسى ەكىجاقتى سيپات العانىن ايتادى. قازاقستان- وزبەك ىسكەرلىك كەڭەسىنىڭ جيىنىندا ءسوز العان ديپلومات ەكى ەلدىڭ بيلىگىنە اراداعى بارىس-كەلىستى جەڭىلدەتۋدى ۇسىندى.

«ІТ- سەكتوردان ماشينا قۇراستىرۋعا دەيىنگى جوعارى بىلىكتىلىكتى قاجەت ەتەتىن ءتۇرلى سالالاردا جۇمىس كۇشى مەن ماماندار تارتۋ ەكى اراداعى ارىپتەستىكتىڭ ماڭىزدى قىرى بولىپ ەسەپتەلەدى. بىزگە جۇمىس ىستەۋگە رۇقسات بەرۋ ۇدەرىستەرىن، وزگە دە اكىمشىلىك رەتتەۋ تەتىكتەرىن جەڭىلدەتىپ، ەكى ەلدىڭ دە ازاماتتارىنا بىردەي مۇمكىندىك ۇسىنۋ قاجەت. مۇنداي ءتاسىل جۇمىس كۇشى مەن كاسىپكەرلەردىڭ قوزعالىسىن جەڭىلدەتىپ قانا قويماي، تاجىريبە، ءبىلىم، تەحنولوگيا الماسۋعا قولايلى جاعداي تۋعىزادى»، - دەدى ول.

ەلشى بۇعان دەيىن قازاقستانعا جۇمىس ىزدەپ اعىلعان وزبەك اعايىندار كوپ بولسا، قازىر وزبەكستانعا جۇمىس ىزدەپ باراتىن قازاقستاندىقتاردىڭ سانى ارتىپ كەلە جاتقانىن ايتادى.

«مەن تاشكەنتتە جۇرگەندە ىلعي كورەمىن، بۇگىندە وزبەكستان ەكونوميكاسىنىڭ ءتۇرلى سالاسىندا قازاقستاندىق ماماندار قاتتى سۇرانىسقا يە. نەگىزىنەن بۇل جەكە سەكتور، بيزنەس. ІТ- سالادان باستاپ ءىرى مەتاللۋرگيالىق كاسىپورىنداردا، سەمەنت ءوندىرىسى مەن قارجى سەكتورىندا قازاقستاندىق توپ- مەنەدجەرلەر مەن ورتا بۋىندى مەنەدجەرلەر وتە كوپ. ەكىجاقتى قوزعالىس دەپ وتىرعانىم سول. قازىر تەك وزبەكستاندىقتار عانا قازاقستانعا اعىلىپ جاتقان جوق. وزبەكستانعا اعىلىپ جاتقان قازاقستاندىق مامانداردىڭ دا ۇلكەن اعىنىن بايقاپ وتىرمىز. ونىڭ ىشىندە ءىرى كاسىپورىنداردا ءتيىستى بىلىكتىلىك العان قاراپايىم جۇمىسشىلار دا بار»، - دەدى بەيبىت اتامقۇلوۆ.

اۆتور

ەسىمجان ناقتىباي