— جاڭادان شىعىپ جاتقان دارىلىك زاتتاردىڭ قولجەتىمدى بولۋى — ايرىقشا ءمان بەرەتىن ماسەلە. ءونىم الەمنىڭ دامىعان ەلدەرىندە سەرتيفيكاتتالعان جاعدايدا، ونى مەملەكەتتىڭ باستاماسىمەن جەدەل تىركەۋ مۇمكىندىگى زاڭنامالىق تۇرعىدان قاراستىرىلعان. قازىرگى ۋاقىتتا وسىنداي 112 جاڭا پرەپاراتتى تىركەۋ جۇمىستارى جۇرگىزىلىپ جاتىر. دەنساۋلىق ساقتاۋ مينيسترلىگى مەن «س ق-فارماتسيا» كومپانياسى ەمدەلۋشىلەردىڭ قاجەتتىلىكتەرىن ەسكەرە وتىرىپ ءارى دارىلىك زاتتاردىڭ باسىمدىعىن ايقىنداپ، اتالعان تەتىكتى جەدەل ىسكە اسىرۋى قاجەت. بۇل رەتتە جاڭا دارىلەردىڭ قاۋىپسىزدىگىنە قويىلاتىن تالاپتار تولىق كولەمدە ساقتالۋعا ءتيىس، — دەدى ولجاس بەكتەنوۆ.
ونىڭ ايتۋىنشا، دەنساۋلىق ساقتاۋ مينيسترلىگى قازاقستاندى فارماتسيەۆتيكالىق جۇيەسى جەتىلگەن ەل رەتىندە جوعارى دەڭگەيگە شىعارۋعا مۇمكىندىك بەرەتىن زەرتحانالىق كەشەن قۇرۋ ماسەلەسىن جەدەلدەتۋى قاجەت.
— مەديسينالىق بۇيىمداردى ساتىپ الۋ تاسىلدەرىن دە جەتىلدىرۋ كەرەك. بيىل ءبىرىڭعاي ديستريبيۋتور 38 ميلليارد تەڭگەدەن استام سوماعا ءارتۇرلى مەديسينالىق زاتتاردى ساتىپ العان. بيۋدجەت شىعىندارىن ازايتۋ ءۇشىن باعالار مەن سيپاتتامالاردى جانە قۇرامداس بولىكتەردى مۇقيات سالىستىرۋ قاجەت. ءبىراق قاراجاتتى ۇنەمدەۋگە ەمدەۋ ساپاسىن بۇلجىتپاي ساقتاي وتىرىپ قول جەتكىزۋ كەرەك. جالپى، قابىلدانىپ جاتقان بارلىق شارالار ءدارى تاپشىلىعىن مۇلدەم جويىپ، مەديسينالىق قىزمەتتەردىڭ قولجەتىمدىلىگىن ارتتىرۋعا ءتيىس. ءول ۇشىن وتاندىق فارماتسيەۆتيكالىق ءوندىرىستى دامىتۋ جانە ساتىپ الۋ جۇيەسىن جەتىلدىرۋ ماسەلەلەرىنە كەشەندى تۇردە قاراۋ قاجەت، — دەدى ۇكىمەت باسشىسى.
دارىلىك زاتتار ءوندىرىسىنىڭ تولىق سيكلىن جولعا قويۋ ستراتەگيالىق مىندەتكە اينالۋعا ءتيىس.
— وزدەرىڭىزگە ءمالىم، دارىلىك زاتتار مەن مەديسينالىق بۇيىمداردىڭ اينالىمى سالاسىنداعى قاداعالاۋ وكىلەتتىكتەرى كەلەسى جىلدىڭ 1 -قاڭتارىنان باستاپ كەڭەيتىلەدى. مينيسترلىك وسى وكىلەتتىكتەردى ىسكە اسىرۋعا 0 دايىندىقتى قامتاماسىز ەتىپ، زاڭ بۇزۋدى جەدەل انىقتاۋ ءۇشىن ءونىمدى تاڭبالاۋ جۇيەسىن پايدالانۋى قاجەت. اقىسىز دارىمەن قامتاماسىز ەتۋ جۇيەسىنە دە ەرەكشە نازار اۋدارىڭىزدار. بۇل، ءبىرىنشى كەزەكتە، ۇزدىكسىز ەم قابىلداۋدى قاجەت ەتەتىن سوزىلمالى اۋرۋلارى بار ازاماتتار ءۇشىن اسا ماڭىزدى، — دەدى ولجاس بەكتەنوۆ.
وسى ورايدا ول دارىلىك زاتتاردى الۋدىڭ تۇسىنىكتى ءارى ىڭعايلى ءتارتىبىن قامتاماسىز ەتۋ كەرەك ەكەنىن تاپسىردى. ءاربىر ەمدەلۋشى قانداي دارىلەردىڭ اقىسىز بەرىلەتىنىن، ولاردى قايدان جانە قاشان الۋعا بولاتىنىن، قيىندىق تۋىنداعان جاعدايدا قايدا جۇگىنۋ كەرەكتىگىن بىلۋگە ءتيىس.
— سونداي-اق ۇيرەنشىكتى ءدارىنى باسقا ءوندىرۋشىنىڭ ونىمىنە الماستىرعان جاعدايدا، ونىڭ سەبەپتەرى مەن قولدانۋ ءتارتىبىن قاراپايىم ءارى تۇسىنىكتى تىلدە جەتكىزۋ قاجەت. بۇل اسىرەسە، ۇزاق ۋاقىت نەمەسە تۇراقتى ەمدەلۋدى قاجەت ەتەتىن بالالاردىڭ اتا-انالارى ءۇشىن ماڭىزدى. اقپاراتتىڭ از بولۋى مەن اكىمشىلىك راسىمدەر اۋىر ناۋقاستار ءۇشىن كەدەرگىگە اينالماۋعا ءتيىس. دەنساۋلىق ساقتاۋ مينيسترلىگى وسىنى نەگىزگى قاعيدا رەتىندە باسشىلىققا السىن، — دەدى ۇكىمەت باسشىسى.