قازگيدرومەت بۇگىنگى اۋا رايى بولجامىن جاريالادى
قازگيدرومەت ەل اۋماعىندا 29-قىركۇيەكتە بولاتىن قاۋىپتى مەتەورولوگيالىق قۇبىلىستارعا بولجام جاسادى، دەپ حابارلايدى قازاقپارات.
«سولتۇستىك- باتىس انتيسيكلون جوتاسىنىڭ اسەرىنەن ەلىمىزدىڭ باتىس جارتىسىندا جاۋىن-شاشىنسىز اۋا رايى ساقتالادى، ال ەلدىڭ قالعان اۋماعىندا اتموسفەرالىق فرونتتاردىڭ اسەرىنەن جاڭبىر جاۋادى، كۇندىز الماتى وبلىسىنىڭ تاۋلى اۋداندارىندا- جاۋىن- شاشىن (جاڭبىر، قار). قازاقستاننىڭ وڭتۇستىك جارتىسىندا نايزاعاي وينايدى. رەسپۋبليكا بويىنشا تۇمان، وڭتۇستىكتە، وڭتۇستىك- شىعىستا، كۇندىز شىعىستا جانە ورتالىقتا ەكپىندى جەل كۇتىلەدى»، - دەپ جازدى سينوپتيكتەر.
اقتوبە وبلىسىنىڭ سولتۇستىگىندە تۇندە توپىراق بەتىندە 1 گرادۋس ۇسىك جۇرەدى.
تۇركىستان وبلىسىندا، قىزىلوردا وبلىسىنىڭ ورتالىعىندا، شىعىسىندا، وڭتۇستىگىندە توتەنشە ءورت قاۋپى بار.
جامبىل وبلىسىندا، قاراعاندى وبلىسىنىڭ وڭتۇستىگىندە جانە ۇلىتاۋ وبلىسىندا، باتىس قازاقستان وبلىسىنىڭ سولتۇستىگىندە، اتىراۋ وبلىسىنىڭ شىعىسىندا، ماڭعىستاۋ، قىزىلوردا وبلىستارىنىڭ باتىسىندا جوعارى ءورت قاۋپى كۇتىلەدى.