بۇل تۋرالى قازاقپارات ب ع م باسپا ءسوز قىزمەتىنە سىلتەمە جاساپ حابارلايدى.
كوپتەگەن ەلدەردە ۆاكسينا ءبىرىنشى جانە ەكىنشى فازادان كەيىن عانا پايدالانۋعا بەرىلەدى. قازاقستاندا ۆاكسينانى تەرەڭ ءارى مۇقيات زەردەلەۋ ءۇشىن كلينيكالىق زەرتتەۋلەردىڭ ءۇشىنشى كەزەڭىنىڭ جارتىسى قوسىلدى.
«نازارداعى باستى ماسەلە - ول ادامداردىڭ دەنساۋلىعى. ءبىز دەنساۋلىق ساقتاۋ مينيسترلىگىمەن كەلىسىپ، كلينيكالىق زەرتتەۋلەردىڭ ءۇشىنشى كەزەڭىندە ۆاكسينانىڭ اسەرىن تولىعىراق زەرتتەۋ ءۇشىن وسىنداي تاكتيكانى قولداندىق. قازىرگى ۋاقىتتا ۆاكسينا بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىندا ءبىلىم جانە عىلىم مينيسترلىگى ساتىپ العان قۇرال- جابدىقتارمەن ءوندىرىلىپ جاتىر. بۇل بىرەگەي قۇرىلعى. ەگەر مۇنداي قۇرىلعى قولدا بولماعاندا، ءبىز بۇگىنگىدەي تاماشا ناتيجە كورسەتە الماس ەدىك»، - دەدى ق ر ب ع م عىلىم كوميتەتىنىڭ بيولوگيالىق قاۋىپسىزدىك پروبلەمالارى ع ز ي باس ديرەكتورى كۇنسۇلۋ زاكاريا.
قازاقستاندىق عالىمدار وتاندىق ۆاكسينانى 2020 -جىلدىڭ 9-مامىرىندا ازىرلەگەنىن ايتا كەتكەن ءجون. ول قاۋىپسىز تەحنولوگيا بويىنشا يممۋنوستيمۋلياتور قوسۋ ارقىلى ولتىرىلگەن ۆيرۋستان جاسالدى. 2020 -جىلدىڭ 17-قىركۇيەگىندە 44 ەرىكتىنىڭ قاتىسۋىمەن كلينيكالىق زەرتتەۋلەردىڭ I كەزەڭى باستالدى. ۆاكسينا قاۋىپسىز ەكەنىن كورسەتتى. ەرىكتىلەردىڭ جاعدايى قالىپتى بولدى. 17-قازاندا كلينيكالىق زەرتتەۋلەردىڭ II كەزەڭى باستالدى. وعان 200 ۆولونتەر قاتىستى. زەرتتەۋ ناتيجەلەرى بويىنشا ۆاكسينا جوعارى يممۋنوگەندىلىك پەن تيىمدىلىگىن كورسەتتى. 19 جەلتوقساندا دەنساۋلىق ساقتاۋ مينيسترلىگى كلينيكالىق سىناقتاردىڭ قورىتىندى III فازاسىن جۇرگىزۋگە رۇقسات بەردى. 3000 ادام ەرىكتى بولىپ، QazVac برەندىمەن QazCovid-in ۆاكسيناسى ەگىلدى. ۆاكسينا ەرىكتىلەرگە اراسىنا 21 كۇن سالىپ، 2 مارتە ەگىلدى. ناتيجەسىندە ولاردىڭ قانىندا قاجەتتى قورعانىس انتيدەنەلەرى پايدا بولدى. ەرىكتىلەردىڭ جاعدايى جاقسى، شاعىمدارى بولعان جوق.
2021 -جىلعى ءساۋىر ايىنىڭ سوڭىندا كلينيكالىق زەرتتەۋلەردىڭ III فازاسىنىڭ ارالىق ناتيجەلەرى بەلگىلى بولادى. سودان كەيىن وتاندىق ۆاكسينا جاپپاي پايدالانۋعا جىبەرىلەتىن بولادى. ەسكە سالساق، QazCovid-in اۆتورلارى ۆاكسينانىڭ 5 ءتۇرىن ازىرلەگەن.