تەستىلەۋ استانا، الماتى، شىمكەنت، اقتوبە، اقتاۋ، اتىراۋ، جەزقازعان، كوكشەتاۋ، قاراعاندى، قوستاناي، قىزىلوردا، وسكەمەن، ورال، پەتروپاۆل، پاۆلودار، سەمەي، تالدىقورعان، تۇركىستان جانە تاراز قالالارىندا ۇيىمداستىرىلادى.
قازتەست تاپسىرۋعا نيەتتى ازاماتتار app.testcenter.kz سايتى ارقىلى تىركەلىپ، ءوتىنىم بەرە الادى.
تەستىلەۋ ءتورت بولىمنەن تۇرادى:
تىڭدالىم — 20 تەست تاپسىرماسى، ورىنداۋ ۋاقىتى 20 مينۋت؛
وقىلىم — 40 تەست تاپسىرماسى، ورىنداۋ ۋاقىتى 50 مينۋت؛
جازىلىم — 2 تاپسىرما، ورىنداۋ ۋاقىتى 50 مينۋت؛
ايتىلىم — 2 تاپسىرما، ورىنداۋ ۋاقىتى 7 مينۋت.
سەرتيفيكات الۋ ءۇشىن تەستىلەنۋشى ءتورت ءبولىمنىڭ ءارقايسىسى بويىنشا بەلگىلەنگەن شەكتى بالدى جيناۋى كەرەك.
«جازىلىم» جانە «ايتىلىم» بولىمدەرىنىڭ ناتيجەلەرى تەستىلەۋ اياقتالعاننان كەيىن 15 جۇمىس كۇنى ىشىندە قاتىسۋشىنىڭ جەكە كابينەتىندە جاريالانادى.
تەستىلەۋگە قاتىسۋ قۇنى — 7121 تەڭگە.
قازتەست سەرتيفيكاتى كىمدەرگە قاجەت؟
قازتەست سەرتيفيكاتى قازاق ءتىلىن مەڭگەرۋ دەڭگەيىن راستاۋ ءۇشىن ءبىرقاتار مەملەكەتتىك جانە ءبىلىم بەرۋ باعدارلامالارى اياسىندا تالاپ ەتىلەدى. اتاپ ايتقاندا:
«بولاشاق» حالىقارالىق ستيپەندياسىنا ۇمىتكەرلەردەن؛
قازاقستاننىڭ جوعارى وقۋ ورىندارىنىڭ دوكتورانتۋراسىنا تۇسۋشىلەردەن؛
پرەزيدەنتتىك جاستار كادر رەزەرۆىنە ۇمىتكەرلەردەن؛
قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنا تۇسۋشىلەردەن؛
مەملەكەتتىك ءبىلىم بەرۋ ۇيىمدارىنىڭ ءبىرىنشى باسشىسى لاۋازىمىنا ۇمىتكەرلەردەن.
سونداي-اق قازتەست سەرتيفيكاتى كەيبىر مەملەكەتتىك لاۋازىمدار مەن باعدارلامالارعا ۇمىتكەرلەردەن دە تالاپ ەتىلەدى.