قازتەست العاش رەت تولىقتاي ەلەكتروندى فورماتتا ءوتىپ جاتىر
استانا. قازاقپارات - 23 -قازاندا استانا قالاسىندا قازتەست ەلەكتروندى سەرتيفيكاتتىق تەستىلەۋى باستالدى. بۇل تۋرالى ق ر عىلىم جانە جوعارى ءبىلىم مينيسترلىگىنىڭ باسپا ءسوز قىزمەتى ءمالىم ەتتى.
قازتەست - ەلەكتروندى تەستىلەۋى ازاماتتار ءۇشىن ىڭعايلى جانە زاماناۋي قۇرال. ول اقپاراتتىڭ اشىقتىعى مەن قولجەتىمدىلىگىن قامتاماسىز ەتەدى جانە جاڭا فورماتتىڭ نەگىزگى ارتىقشىلىقتارىنىڭ ءبىرى بولىپ تابىلادى.
App.testcenter.kz سايتى ارقىلى ءوتىنىش بەرگەن ازاماتتار ءۇشىن تەستىلەۋ تۋرالى بارلىق اقپارات (كۇنى، ۋاقىتى جانە مەكەنجايى) جەكە كابينەتتە قولجەتىمدى. استانا تۇرعىندارى ءۇشىن تەستىلەۋ ناتيجەلەرى جەكە كابينەتتە 3 كۇن ىشىندە، ال باسقا وڭىرلەردە 15 كۇن ىشىندە قولجەتىمدى بولادى. 2025 -جىلدان باستاپ ەلەكتروندى فورماتتاعى تەستىلەۋ قازاقستاننىڭ باسقا قالالارى مەن وبلىس ورتالىقتارىنا كەزەڭ-كەزەڭمەن ەنگىزىلەدى.
2024 -جىلدىڭ سوڭىنا دەيىن وڭىرلەردە سەرتيفيكاتتىق تەستىلەۋى قاعاز فورماتتا جالعاسادى. وڭىرلەردە تەستىلەۋگە ءوتىنىش بەرۋ www.kazakhtest.kz سايتى ارقىلى قولجەتىمدى.
ەستەرىڭىزگە سالا كەتسەك، قازتەست تەستىلەۋىن وتكىزۋدىڭ جاڭا قاعيدالارى بەكىتىلدى. قازتەست تەستىلەۋىن قاعاز جانە ەلەكتروندى فورماتتا تاپسىرۋعا بولادى.
اۆتور
باقىتگۇل اباي قىزى