«قازسەلدەنقورعاۋ» مەكەمەسى الماتىداعى لاي كوشكىنىنىڭ باستى سەبەبىن اتادى

 الماتى. KAZINFORM - «قازسەلدەنقورعاۋ» مەملەكەتتىك مەكەمە ماماندارى الماتىداعى كوشكىننىڭ باستى سەبەبىن انىقتادى.

«8-اقپان تۇنگى ساعات 02:20 دا تاۋ باۋرايىنىڭ ورتا بولىگىنە تارتىلعان سۋىق سۋ قۇبىرىنىڭ جارىلۋى سالدارىنان توپىراق ىلعالدانعان. كەيىن الماتى قالاسى، مەدەۋ اۋدانىنداعى وليمپييسكايا كوشەسىندە ورنالاسقان «تاۋ- سامالى» ىقشاماۋدانىنداعى №3ا جانە №3 جەكە تۇرعىن ۇيلەردى لاي كوشكىنى باسىپ قالدى»، - دەپ حابارلادى «قازسەلدەنقورعاۋ» م م باسپا ءسوز قىزمەتىنەن.

مەملەكەتتىك مەكەمە ماماندارىنىڭ مالىمەتىنشە، تۇسكەن جىلجىمانىڭ كولەمى - 3200 تەكشە مەتر. بۇل ايماقتاعى ەڭىستىڭ تىكتىگى شامامەن - 45-50 گرادۋس.

ەستەرىڭىزگە سالا كەتەيىك، 8-اقپاندا مەدەۋ اۋدانىنىڭ «تاۋ سامالى» شاعىن اۋدانىنداعى وليمپيسكي كوشەسى بويىندا تەحنوگەندىك سيپاتتاعى توپىراقتىڭ لايلانۋى سالدارىنان لاي كوشكىنى بولدى.

كەيىن الماتى قالاسى توتەنشە جاعدايلار دەپارتامەنتى مەن رەسپۋبليكالىق جەدەل- قۇتقارۋ جاساعىنىڭ كۇشتەرى ءۇيىندى استىنان ءتورت ادامنىڭ دەنەسىن تاپتى. ولاردىڭ بارلىعى ءبىر وتباسىنىڭ مۇشەسى - 1984-جىلى تۋعان ەر ادام، 1980 -جىلى تۋعان ايەل جانە 2007 -جىلعى ەگىز جاس ءوسپىرىم ۇل بالالار.

توتەنشە جاعدايلار مينيسترلىگىنىڭ پسيحولوگتارى مارقۇمداردىڭ تۋىستارى مەن كورشىلەرىنە جەدەل پسيحولوگيالىق كومەك كورسەتىپ جاتىر.