ق ر توتەنشە جاعدايلار مينيسترلىگى باسپا ءسوز قىزمەتىنىڭ حابارلاۋىنشا، اۋە كەمەسىن ۇشۋعا دايىنداۋدان باستاپ، تاپسىرمانى ورىنداۋ مەن قونۋعا دەيىنگى ءار كەزەڭگە ونداعان مامان جۇمىلدىرىلادى. ولاردىڭ ءارقايسىسى وزىنە جۇكتەلگەن ماڭىزدى مىندەتتى اتقارادى.
بۇل جۇيەدەگى نەگىزگى بۋىنداردىڭ ءبىرى - جەدەل باسقارۋ ورتالىعى. ونىڭ ماماندارى تاۋلىك بويى اۆياتسيالىق وپەراتسيالاردى ۇيلەستىرىپ، قاجەتتى اقپاراتتىڭ ۋاقتىلى بەرىلۋىن جانە مۇددەلى قىزمەتتەرمەن ءوزارا ءىس-قيمىلدى قامتاماسىز ەتەدى.
وسىنداي جاۋاپتى جۇمىستى «قازاۆيا قۇتقارۋ» ا ق جەدەل باسقارۋ ورتالىعىنىڭ جەدەل كەزەكشىسى الما مۇحامەديەۆا اتقارادى. ول ءۇشىن جۇمىستىڭ باستى ناتيجەسى - قويىلعان مىندەتتى ءساتتى ورىنداۋ جانە ادامداردى قۇتقارۋ. المانىڭ ايتۋىنشا، ءدال وسىنداي ساتتەر ءوز ماماندىعىنىڭ ماڭىزىن تەرەڭ سەزىنۋگە مۇمكىندىك بەرەدى.
- ۇشقىشتارىمىز ءاردايىم امان-ەسەن بولىپ، اۋە كەمەلەرىمىزدىڭ ۇشۋى مەن قونۋى ءساتتى ءوتسىن. اسپانىمىز اشىق، ەلىمىزدە بەيبىتشىلىك پەن تىنىشتىق ورناپ، حالقىمىز امان بولسىن! - دەيدى الما.
كەزەكشىلىك كەزىندە اۋە كەمەلەرىنىڭ ۇشۋى مەن قونۋى باقىلانىپ، ءتيىستى اقپارات مۇددەلى قۇزىرلى ورگاندارعا ۋاقتىلى جەتكىزىلەدى. سونىمەن قاتار كەلەسى كۇنگە ارنالعان ۇشۋ جوسپارلارى ازىرلەنىپ، تۋىنداعان ۇيىمداستىرۋشىلىق ماسەلەلەر جەدەل شەشىلەدى.
توتەنشە جاعداي تۋىنداعان كەزدە جەدەل كەزەكشىلەردىڭ جۇمىسى ودان ءارى قارقىنداي تۇسەدى. قاجەتتى ادام كۇشى مەن تەحنيكا جۇمىلدىرىلىپ، بارلىق مۇددەلى قىزمەتتەردىڭ ءوزارا ءىس-قيمىلى قامتاماسىز ەتىلەدى. مۇنداي ساتتەردە اقپاراتتى جەدەل الۋ، دۇرىس شەشىم قابىلداۋ جانە تاپسىرمالاردى ۋاقىتىلى جەتكىزۋ ەرەكشە ماڭىزعا يە.
- بۇل جۇمىس جوعارى جاۋاپكەرشىلىكتى، سابىرلىلىقتى، توزىمدىلىكتى جانە كەز كەلگەن جاعدايدا جەدەل شەشىم قابىلداي ءبىلۋدى تالاپ ەتەدى. جەدەل كەزەكشىلەر سانيتاريالىق اۆياتسيا رەيستەرىن، ىزدەستىرۋ- قۇتقارۋ جۇمىستارىن، ەۆاكۋاتسيانى، ءورت ءسوندىرۋدى، توتەنشە جاعدايلاردىڭ سالدارىن جويۋدى جانە باسقا دا ارنايى مىندەتتەردى ۇيىمداستىرۋعا قاتىسادى، - دەلىنگەن حابارلامادا.
وسىعان دەيىن ت ج م الماتى وبلىسىنداعى تاۋ كولدەرىن باقىلاۋ بەكەتتەرىن اشقانى تۋرالى جازدىق.