قازاتوم ونەركاسىپ ءوز قىزمەتىنە سانكسيا ىقپالىن ءجىتى قاداعالاپ وتىر

استانا. KAZINFORM - ا ق ش بيىلدان باستاپ ەلدىڭ رەسەيلىك ۋران يمپورتىنا تاۋەلدىلىگىن تومەندەتۋگە تىرىسىپ كەلەدى. وسى جىلدىڭ 13-تامىزىندا رەسەيدەن تومەن بايىتىلعان ۋران جەتكىزىلىمىن شەكتەيتىن زاڭ كۇشىنە ەنىپ قويدى.

وسىعان وراي «قازاتوم ونەركاسىپ» ۇلتتىق كومپانياسى دايىن ءونىمدى تاسىمالداۋ مەن ساتۋدى قوسا العانداعى كومپانيا قىزمەتىنە سانكسيالاردىڭ الەۋەتتى ىقپالىن ۇنەمى قاداعالاپ وتىر. بۇل جايىندا اتالعان كومپانيا اگەنتتىكتىڭ رەسمي ساۋالىنا بەرگەن جاۋابىندا مالىمدەدى.

ۇلتتىق كومپانيا ازىرگە شەكتەۋلەرگە تاپ كەلمەگەندىگىن العا تارتادى. دەگەنمەن، باسشىلىق ەكسپورتقا تىيىم سالۋمەن بايلانىستى تاۋەكەلدەردى ساراپتاپ وتىرعانعا ۇقسايدى.

«بۇگىندە سانكسيالار كومپانيا قىزمەتىنە ايتارلىقتاي اسەر ەتكەن جوق. دەگەنمەن مۇنداي وقيعالاردان تۋىنداعان نارىقتاعى بەلگىسىزدىك ۋراننىڭ سپوت باعاسىنىڭ، ۇلتتىق ۆاليۋتانىڭ ايىرباس باعامىنىڭ جانە قازاتوم ونەركاسىپتىڭ باعالى قاعازدارىنىڭ باعا بەلگىلەۋلەرىنىڭ ايتارلىقتاي قۇبىلمالىلىعىنا الىپ كەلدى»، - دەپ اتاپ ءوتتى اكسيونەرلىك قوعام.

ا ق ش ەنەرگەتيكا مينيسترلىگى رەاكتورلارعا يادرولىق وتىن جەتكىزۋ تىزبەگىن نىعايتۋ جانە رەسەيدەن ساتىپ الۋلارعا تاۋەلدىلىكتى ازايتۋ ءۇشىن وتاندىق جەتكىزۋشىلەردەن 2,7 ميلليارد دوللارعا دەيىن بايىتىلعان ۋران ساتىپ الۋدى جوسپارلاپ وتىر.

2024 -جىلدىڭ 6-تامىزىندا ا ق ش ساۋدا مينيسترلىگىنىڭ ەكونوميكالىق تالداۋ بيۋروسى مامىر ايىمەن سالىستىرعاندا ماۋسىمدا يادرولىق وتىن ماتەريالدارى يمپورتىنىڭ ەكى ەسەگە جۋىق ازايعانىن كورسەتەتىن ەسەپ جاريالادى. ءبىراق قازاتوم ونەركاسىپ ازىرگە مۇنداي اقپارات الماعان.

«قازىرگى ۋاقىتتا «قازاتوم ونەركاسىپ «ۇ ا ك» ا ق- قا قازاقستاننان ا ق ش- قا ۋران جەتكىزۋدى توقتاتا تۇرۋى ءالى بەلگىسىز. ا ق ش- تاعى U3O8- ءدى ەلدەر بويىنشا ساتىپ الۋ كوزدەرىنىڭ رەسمي ستاتيستيكاسى اي سايىن ەمەس، جىل سايىن، جارتى جىلعا كەشىكتىرىلىپ جاريالانادى»، - دەپ ءتۇسىندىردى كومپانيا.

سونداي-اق، قازاتوم ونەركاسىپ حالىقارالىق ارەنادا ءوز پوزيتسياسىن نىعايتا وتىرىپ، امەريكالىق ەنەرگەتيكالىق كومپانيالارمەن ۇنەمى بەلسەندى بايلانىستا بولاتىنى اتاپ ءوتىلدى.

«بۇل رەتتە ۋراندى ساتىپ الۋ جيىلىگى بيۋدجەت نەمەسە ساتىپ الۋشى ەلدەگى قور سياقتى كوپتەگەن فاكتوردەن قۇرالادى»، - دەلىنگەن كومپانيا جاۋابىندا.

اۆتور

مارلان جيەمباي