قازاۆتوجول ەلدەگى ەڭ تانىمال اقىلى جولداردىڭ رەيتينگىن جاريالادى

كوش باسىندا الماتى - قونايەۆ تاسجولى تۇر. بۇل باعىتتا كولىكتەردىڭ 10,8 ميلليوننان استام رەت وتكەنى تىركەلگەن.

بيىلعى 10 ايدا قازاقستاننىڭ اقىلى جولدارىمەن كولىكتەر 68,3 ميلليون رەت ءجۇرىپ وتكەن. سونىڭ جارتىسىنا جۋىعى، ياعني 33,5 ميلليونءوتۋ نەمەسە 49,1 پايىزى، ەڭ كوپ پايدالانىلعان بەس باعىتقا تيەسىلى.

رەيتينگتە الماتى - قونايەۆ تاسجولى ءبىرىنشى ورىندا تۇر. بۇل جولمەن كولىكتەر 10834980 رەت جۇرگەن. ەكىنشى ورىندا شىمكەنت - وزبەكستان شەكاراسى باعىتى - 8033519 رەت. ۇزدىك ۇشتىكتى شىمكەنت - تاراز تاسجولى تۇيىندەيدى. مۇندا 5652809 رەت كولىك وتكەنى تىركەلگەن.

ەڭ كوپ پايدالانىلعان بەس اقىلى جولدىڭ قاتارىنا تاراز - قاينار (4964599) جانە شىمكەنت - قىزىلوردا (4061676) باعىتتارى دا ەندى.

بۇل كورسەتكىشتەر قازاقستاننىڭ وڭتۇستىك جانە وڭتۇستىك-شىعىس وڭىرلەرىندەگى كولىك قوزعالىسىنىڭ قارقىندى ەكەنىن كورسەتەدى. اتالعان جولدار ءىرى قالالاردى، ماڭىزدى كولىك توراپتارىن جانە حالىقارالىق دالىزدەردى بايلانىستىرادى.

ورتالىق جانە سولتۇستىك وڭىرلەردەگى اقىلى جولداردا دا قوزعالىس قارقىندى. اتاپ ايتقاندا، استانا - تەمىرتاۋ تاسجولىندا 3,7 ميلليونعا جۋىق، استانا - شۋچينسك باعىتىندا 3,4 ميلليون، ال قونايەۆ - تالدىقورعان جولىندا 3,2 ميلليون رەت كولىك وتكەنى تىركەلگەن.

ەڭ كوپ پايدالانىلعان العاشقى ون اقىلى جولعا 48,8 ميلليون ءوتۋ تيەسىلى. بۇل - 2026-جىلدىڭ العاشقى 10 ايىنداعى جالپى كورسەتكىشتىڭ 71,5 پايىزى.

وسىعان دەيىن قازاۆتوجول جۇرگىزۋشىلەردىڭ ءتورت وبلىس جولدارىندا ساق بولعانى ءجون ەكەنىن ەسكەرتكەن بولاتىن.