قازاقتى ساقتاۋ ءۇشىن، ەڭ اۋەلى اۋىلدى ساقتاۋ كەرەك- مەملەكەت باسشىسى

استانا. KAZINFORM - مەملەكەت باسشىسى قاسىم- جومارت توقايەۆ اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا جاھاندانۋ داۋىرىندەگى اۋىلداردىڭ ماڭىزى تۋرالى وي قوزعادى.

«قۋاتتى ايماقتار - قۋاتتى ەل» دەگەن ءسوز. ءبىز وسى قاعيداعا ساي جۇمىس ىستەۋىمىز كەرەك. سەبەبى مىقتى مەملەكەت بولامىز دەسەك، اۋىلدى دامىتۋ اسا ماڭىزدى. وسى ورايدا مەن بارشاڭىزعا ۇندەۋ تاستاعىم كەلەدى. اۋىل - ءبارىمىزدىڭ التىن بەسىگىمىز. قالادا تۋىپ، ءومىر بويى قالادا تۇرعان قازاقتىڭ دا تامىرى - اۋىلدا. حالقىمىزدىڭ سالت- ءداستۇرى، ءتىلى مەن ءدىلى، ءبارى دە اۋىلدا ساقتالعان. جاھاندانۋ داۋىرىندە قازاقتى ساقتاۋ ءۇشىن، ەڭ الدىمەن، اۋىلدى ساقتاۋىمىز كەرەك»، - دەدى قاسىم-جومارت توقايەۆ.

پرەزيدەنت تۋعان جەرىنە قامقور بولىپ جۇرگەن اگرارلىق سالا وكىلدەرىنىڭ ەڭبەگىنە ەرەكشە توقتالدى.

«سىر بويىنداعى ناعي ءىلياسوۆ جانە تاڭ، ارقاداعى شاحتەرسكوە، قىزىلجار وڭىرىندەگى نوۆونيكولسكوە اۋىلدارى دا كوپكە ۇلگى. ءار ايماقتا وسىنداي گۇلدەنگەن ەلدى مەكەندەر بار. ءبىراق اۋىلدان شىققان مىقتى كاسىپكەرلەر ودان الدەقايدا كوپ. مەن ىسكەر ازاماتتاردى اۋىل-ايماقتى كوركەيتۋگە شاقىرامىن. ادال ەڭبەكپەن تابىسقا جەتكەن ازامات اۋىلىن دامىتۋعا ۇلەس قوسقانى ءجون دەپ ويلايمىن. بۇل ءبىز ۇنەمى ايتاتىن وتانشىلدىق، ەلگە جاناشىرلىق قاسيەتتەردىڭ ناقتى كورىنىسى بولارى ءسوزسىز»، - دەدى مەملەكەت باسشىسى.

قاسىم-جومارت توقايەۆ اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا اۋىلداردى قولداۋ باعىتىندا اتقارىلعان جۇمىستارعا توقتالدى.

«مەنىڭ تاپسىرماممەن ۇكىمەت بەس جىلدى قامتيتىن تۇجىرىمداما قابىلدادى. «اۋىل - ەل بەسىگى» باعدارلاماسى ازىرلەنىپ، جۇزەگە اسىرىلىپ جاتىر. قازىردىڭ وزىندە ناقتى ناتيجە بار. بيىل 200-گە جۋىق اۋىلعا سۋ قۇبىرىن تارتۋ ءۇشىن قارجى ءبولىندى. جىل سوڭىنا دەيىن اۋىل حالقىنىڭ 95 پايىزدان استامى تازا سۋمەن قامتاماسىز ەتىلەدى»، - دەدى مەملەكەت باسشىسى.

پرەزيدەنتتىڭ سوزىنشە، اۋىلداعى دەنساۋلىق ساقتاۋ جۇيەسىن جاڭعىرتۋ ءۇشىن 140-تان استام نىسان سالىنعان. ال «جايلى مەكتەپ» ۇلتتىق جوباسى اياسىندا بيىل 13 اۋىل مەكتەبى پايدالانۋعا بەرىلگەن.

«سوڭعى بەس جىلدا جەرگىلىكتى ماڭىزى بار 38 مىڭ شاقىرىم جول جوندەلدى. ماڭىزدى مىندەتتىڭ ءبىرى - اۋىل حالقىنىڭ تابىسىن ارتتىرۋ. «اۋىل اماناتى» باعدارلاماسى ارقىلى جىلدىق ءوسىمى 2,5 پايىز بولاتىن شاعىن نەسيە بەرىلە باستادى. سونىڭ ناتيجەسىندە اۋىلدا 16 مىڭعا جۋىق جاڭا جۇمىس ورنى اشىلدى. وسىنداي اۋقىمدى جۇمىس جالعاسىن تابادى. سەبەبى اۋىلدى كوركەيتۋ - ستراتەگيالىق مىندەت. بۇرىن جابىلىپ قالعان كەيبىر اۋداندار بىلتىر مەنىڭ تاپسىرماممەن قايتا قۇرىلدى. بۇل - اسىرەسە، شەتكەرى ورنالاسقان ەلدى مەكەندەرگە سەرپىن بەرەتىن قادام»، - دەدى مەملەكەت باسشىسى.

اۆتور

ەسىمجان ناقتىباي