قازاقتىڭ دومبىراسىنىڭ ءۇنىن پاتەنتتەۋىمىز كەرەك - پەتروپاۆلدىق شەبەر
پەتروپاۆل. KAZINFORM - پەتروپاۆل تۇرعىنى بولات قانافين قازاقتىڭ قارا دومبىراسىن جەتىلدىرىپ، ونىڭ زاماناۋي ۇلگىسىن جاساپ شىقتى.
ونەر تابىسىن بولات قاتاۋ ۇلى دومبىرا - سينتەزاتور دەپ اتاعان. قازىر شاعىن شەبەرحاناسىندا مۋزىكالىق اسپاپتىڭ تورتەۋى تۇر. سوڭعىسى الدىڭعىلارىنان الدەقايدا ساپالى. ءبىراق مۋزىكانت-شەبەر مۇنىمەن توقتاپ قالماق ەمەس.
- مىنا دومبىرا-سينتەزاتوردىڭ بويىندا 32 دىبىس گەنەراتورى مەن تۇرلەندىرگىشتەر بار، ولار 120 فۋنكتسيا اتقارادى. ياعني بۇل اسپاپتان تەك دومبىرا ءۇنى عانا ەمەس، قازاقتىڭ باسقا دا ۇلتتىق اسپاپتارىنىڭ، سونداي-اق فورتەپيانو، سكريپكا سياقتى كوپتەگەن باسقا دا، سونىڭ ىشىندە سوقپالى مۋزىكالىق اسپاپتاردى ويناپ، ەستۋگە بولادى، - دەيدى بولات قانافين.
ەرەكشە مۋزىكالىق اسپاپتى جاساپ شىعارۋدى بالا كەزىنەن ارمانداعان ول، بۇل ارمانىن جۇزەگە اسىرۋعا زەينەت دەمالىسىنا شىققاننان كەيىن كىرىسەدى. بۇل كەزدە قاجەتتى ءبىلىم مەن تاجىريبە جەتكىلىكتى ەدى.
- 13 جاسىمدا مەن ورگان-سينتەزاتوردى كوردىم. سونىڭ ءۇنى ماعان كەرەمەت ۇنادى. ۇيرەنگىم كەلىپ، اناما قولقا سالدىم، «مەنى مەكتەپكە بەر، ۇيرەنەمىن فورتەپيانونى» دەپ. ءبىراق تا، مەنى وندا المادى، اناما ايتىپتى «بالاڭىزدىڭ ساۋساقتارى قىسقا، ويناي المايدى» دەپ. انامنىڭ ەسىمى گۇلجازيرا، ول ونەرگە جاقىن، دومبىرا تارتىپ، ءداستۇرلى ءاندى كەرەمەت ورىندايتىن. ايتۋىمەن، دومبىرانى مەڭگەرىپ الدىم. كەيىن گيتارانى دا ۇيرەندىم. ال ەلەكترونيكانى باستان-اياق ماعان ارنايى ءبىلىمى بار جانبوتا اعام ۇيرەتتى.
ءوزىم كەزىندە تۋلانىڭ مۋزىكالىق مەكتەبىن سكريپكاشى كلاسىندا ءتامامدادىم. كەيىن پەتروپاۆلداعى پەدينستيتۋتقا ءتۇسىپ، مۋزىكا ءپانىنىڭ ءمۇعالىمى بولىپ شىقتىم، اسپيرانتۋرادا وقىدىم. سوندىقتان باستاپقىدا قورقىنىش بولعانىمەن ىسكە كىرىسىپ كەتتىم، - دەيدى مۋزىكانت-شەبەر.
اعىلشىن ءتىلىن جەتىك مەڭگەرگەن بولات قاتاۋ ۇلى قاجەتتى ەلەكترونيكانى جاپونيانىڭ ءىرى كورپوراتسيالارىنىڭ رەسمي سايتتارىنان تاپقان.
- جاپونيانىڭ كەرەمەتى - ولاردىڭ ەلەكترونيكاسى ساپالى، باعاسى قولجەتىمدى. دومبىرانىڭ ءىشى تۇگەل ياماحانىكى. ءبىراق، بىزدە قازاقستاندا جاپونيامەن جۇمىس ىستەيتىن رەسمي ديللەر كومپانيا جوق. سول سەبەپتى رەسەي ارقىلى الىپ وتىرمىن، ال ولار باعانى ەكى ەسە قىمباتتاتىپ جىبەرەدى. امال جوق، الۋعا تۋرا كەلەدى. سوڭعى دومبىرانى جەتىلدىرىپ، دامىتۋعا، ەكسپەريمەنتالدى جۇمىستار عوي - 8-9 اي كەتتى. مەن كەڭەس كەزىندە وقىعان اداممىن. كادىمگى قارىنداش، وشىرگىش جانە سىزعىشتى قولدانىپ، سىزبا جاسايمىن. تۇگەل تۇجىرىمداما دايىن بولعاندا كومپيۋتەرگە سالۋعا ماماندار نەمەسە بالام كومەكتەسەدى، - دەيدى بولات قانافين.
ءبىر دومبىرا-سينتەزاتوردىڭ وزىندىك قۇنى، ورتاشا العاندا 240 مىڭ تەڭگە شاماسىندا. شەبەردىڭ ايتۋىنشا، جەلىگە قويىپ، جاساعان كەزدە باعاسىن ەكى ەسە ارزانداتۋعا بولادى. قازىرگى ۋاقىتتا، شەبەردىڭ ايتۋىنشا، ءتۇرلى ۇسىنىستار ءتۇسىپ جاتىر.
- ەڭ الدىمەن جاپونياعا بارىپ كەلۋىم كەرەك. باستى ماسەلە - دومبىرانىڭ ءۇنى قازاقتىڭ ۇلتتىق قازىناسى رەتىندە پاتەنتتەلمەگەن. جالپى ۇلتتىق اسپاپتاردىڭ ەشقايسىسىنىڭ ءۇنى پاتەنتتەلمەگەن. وسى جۇمىستى ىستەۋ كەرەك، ونى ىستەمەسەك بۇل دومبىرا دا قىمىزدىڭ كۇيىن كەشەدى، - دەيدى بولات قانافين.
مۋزىكانت بۇل اسپاپتى نەگىزىنەن بالالارعا ارناپ جاساعانىن ايتادى. قازىر دومبىرا-سينتەزاتوردى كەنجەسى يسلام سىناقتان وتكىزىپ ءجۇر. ول - دارىندى بالالارعا ارنالعان مۋزىكا مەكتەبىنىڭ دومبىرا جانە ءداستۇرلى ءانشى سىنىبىندا ءبىلىم الىپ جاتىر.
بۇعان دەيىن س ق و- داعى تۇرمىسى جىلقىمەن بىتە قايناسقان ماحاتوۆتار وتباسى تۋرالى جازعان ەدىك.