قازاقتىڭ باتىرلارىن سومداسام دەيمىن - كەرەكۋلىك اكتەر بالا
پاۆلودار. KAZINFORM - عازيز - كەرەكۋلىك ونەرسۇيەر قاۋىمعا تانىمال بالا. ايماۋىتوۆ تەاترىنداعى كاسىبي اكتەرلەر ۇجىمىنا ءسىڭىپ، بۇگىندە كيەلى ساحنادا ءتۇرلى رولدەردى ويناپ ءجۇر. جالپى سانى ونعا جۋىق قويىلىمعا قاتىسىپ، كەيبىر جاۋاپتى وبرازداردى دا ءساتتى الىپ شىقتى.
حالىقارالىق بالالاردى قورعاۋ كۇنىندە ونەرپاز جاس ءوسپىرىمدى اڭگىمەگە تارتتىق.
عازيز اتىعايەۆتىڭ جاسى 10 دا، بيىل باۋىرجان مومىش ۇلى اتىنداعى ورتا مەكتەپتىڭ 5-سىنىبىن ءتامامدادى.
ايتۋىنشا، تەاترداعى العاشقى ءرولىن نەبارى 6 جاسىندا، «ءبىر ءتۇپ الما اعاشىنداعى» ماقساتتىڭ كىشكەنە شاعىن سومداعان.
كەيىن تەاتر ساحناسىندا قويىلعان «انا- جەر انا»، «ءابىلمانسۇر- سابالاق- ابىلاي»، «تاسجۇرەك»، «ۇجدان»، «كەربەز كەلىندەر» قويىلىمدارىندا بالالاردىڭ رولدەرىندە كوردىك.
- ۇيدە ءتورت بالانىڭ ءۇشىنشىسىمىن، جالعىز ۇلمىن. انام وسى تەاتردا ەڭبەك ەتەدى، كىشكەنە شاعىمنان ونىمەن بىرگە جۇمىسىنا ءجيى كەلىپ، اكتەر اعاي-اپايلاردىڭ دايىندىقتارىن تاماشالاعاندى جاقسى كورەتىنمىن. بىردە ماعان «ءبىر ءتۇپ الما اعاشىنىڭ» قويۋشى رەجيسسەرى كىشكەنتاي ماقساتتىڭ ءرولىن ويناپ كورشى دەدى. ايتقاندارىن جاساپ ەدىم، اعايعا ۇناعان سياقتى. ءسويتىپ ساحناعا شىعاردى. كەيىن باسقا دا رولدەردى وينادىم. دايىندىق بارىسىندا تالاي قىزىقتار بولىپ تۇرادى. جاقىندا «ريچارد III» سپەكتاكلىندە يورك جانە كلارەنستى سومداپ، دايىندىق كەزىندە توسىن جاعداي بولدى. ءبىر اعايدىڭ ويىن بارىسىندا ۇستەل ۇستىندەگى ىدىستى لاقتىراتىن جەرى بار. سونى سەرمەپ قالعاندا كوزىمنىڭ الدىنان زۋ ەتىپ وتە شىقتى. مەنى بارلىعى ەركەلەتەدى، وسكەندە بىزدەن اسقان اكتەر بولاسىڭ دەپ ارقامنان قاعىپ جاتادى. ماعان ساحناعا شىعىپ، ءتۇرلى رولدەردى سومداعان ۇنايدى، - دەپ تەاترداعى اسەرىن ءبولىستى جاس تالانت.
وتكەن جىلى ايماۋىتوۆ اتىنداعى وبلىستىق قازاق-مۋزىكا تەاترى ماسكەۋدە وتكەن حالىقارالىق فەستيۆالگە قاتىسقاندا عازيز ترۋپپامەن بىرگە ساپارلاپ، «ۇجدان» افساناسىندا بالا ءرولىن سومدادى.
ماسكەۋدە جۇسىپبەك ايماۋىتوۆ جەرلەنگەن زيراتقا بارعانىن، وندا جەرلەنگەن الاش ارىستارىنىڭ باسىنا گۇل شوعىن قويعانىن جەتكىزدى.
- كىشكەنە شاعىمدا «شاڭىراق» ورتالىعىندا ۇيىرمەگە قاتىسىپ، ەرتەگى كەيىپكەرلەرىن سومدايتىنمىن. ودان سوڭ اناممەن اقىلداسىپ قۇرمانعازى اتىنداعى مۋزىكا مەكتەبىندە ۆيولونچەل سىنىبىنا وقۋعا ءتۇستىم. مەكتەپتەن تىس ۋاقىتتا سوندا بارامىن. ال وتكەن جىلى پاۆلودار قالاسىندا تۇسىرىلگەن «يگرا س نۋليەۆوي ستاۆكوي» فيلمىندەگى ەپيزودتا وينادىم، - دەيدى ول.
جۋىقتا پاۆلودارعا الماتىدان م. اۋەزوۆ تەاترى كەلگەندە تەاتر ترۋپپاسىندا بالا جەتپەي، مانسۇر وزگە بالالارمەن بىرگە بىرنەشە قويىلىمعا قاتىسىپتى.
ادەتتە كينودان عانا كورەتىن جۇلدىزدارمەن ءبىر ساحنادا ويناپ، ولاردان ۇلكەن ساباق العانىن ايتادى.
عازيز بوس ۋاقىتىندا اڭسار، مانسۇر، مۇزافار، اقىلجان ەسىمدى دوستارىمەن دوپ تەۋىپ، فۋتبول ويناسا، دەمالىس كۇندەرى اكەسىمەن «ەرتىس» فۋتبول كلۋبىنىڭ كەزدەسۋلەرىن تاماشالايدى.
تەاترداعى اكتەرلىك ونەرىن ءارى قاراي شىڭداپ، بولاشاقتا اكتەرلىك وقۋعا تۇسسەم دەگەن ۇلكەن ماقساتى دا بار.
اڭگىمە سوڭىندا قازاق كينولارىن، سونىڭ ىشىندە تاريحي كارتينالاردى ءسۇيىپ كورەتىنىن ايتتى.
وسكەندە سونداي تاريحي كينولارعا تۇسسەم، قازاقتىڭ بەلگىلى حان-باتىرلارىن سومداسام دەگەن اسقاق ارمانى بار.
اۆتور
مۇرات اياعان