قازاقتىڭ 50 دەن استام كۇيىن جاتقا بىلەتىن ۇلى بريتانيالىق ايەل دومبىرانى قالاي ۇيرەندى
سابينا ماستەرس اتىراۋعا جۇبايىنىڭ جۇمىس بابىمەن 4 جىل بۇرىن كوشىپ كەلگەن. قازاقتىڭ ونەرى مەن مادەنيەتىنە قىزىققان ايەل دومبىرا ۇيرەنىپ، بۇگىندە 50 كۇيدى جاتقا بىلەدى، دەپ حابارلايدى Nur.kz.
57 جاستاعى سابينا ماستەرستىڭ ۇلتى نەمىس، ۇلى بريتانيا ازاماتشاسى 4 جىل بۇرىن جولداسى اتىراۋداعى مۇناي كومپانيالارىنىڭ بىرىنەن شاقىرتۋ الىپ وسىندا ۋاقىتشا قونىس اۋدارعان. بىردە دينا نۇرپەيىسوۆا اتىنداعى اتىراۋ اكادەميالىق حالىق اسپاپتار وركەسترىنىڭ كەزەكتى كونسەرتىنە بارىپ، سول جەردە دومبىراشىلاردىڭ ونەرىنە ءتانتى بولعانىن ايتادى.
شارادان شابىت الىپ، قازاقتىڭ اسپابىن ۇيرەنەمىن دەپ وزىنە ماقسات قويادى. العاشىندا ۇستاز تابا الماي ءبىراز قينالعانىن دا ءسوز ەتتى.
«دومبىرادا ويناپ كورمەگەن، ونىمەن قوسا وزگە ۇلتى وكىلىن ەكىنىڭ ءبىرى وقىتۋعا كەلىسپەيتىنى تۇسىنىكتى. ءبىراز ادام مەنىڭ ۇسىنىسىمدى قابىل المادى. تەك اتىراۋداعى دومبىرا ۇيىرمەسىنىڭ مىقتى ۇستازدارىنىڭ ءبىرى ەرلان ساكتانوۆ سىناق مەرزىمگە الۋعا كەلىستى. العاشىندا مەن قازاقشا ەكى ءسوز، ول اعىلشىنشا ەكى ءسوز بىلەتىن. ءبىزدى تەك مۋزىكا ءتىلى بايلانىستىردى. مەندەگى قازاقتىڭ ۇلتتىق اسپابىن ۇيرەنۋگە دەگەن قۇشتارلىقتى كورىپ، مەنى ءارى قاراي وقىتۋعا كەلىستى. مىنە، ول كىسىدەن ساباق الىپ جۇرگەنىمە بيىل 4 جىلدان اسادى. ءبىر بىرىمىزبەن اڭگىمە ايتا الاتىنداي كۇنگە دە جەتتىك»، - دەيدى سابينا ماستەرس.
سابينانىڭ ايتۋىنشا، دومبىرا تارتۋدى ۇيرەنۋ وڭاي بولماعان. كۇن سايىن 4 ساعات ۋاقىتىن دومبىرا ساباعىنا ارنايدى ەكەن.
اتىراۋداعى ۇيىنە ەكى دومبىرا، ۇلى بريتانياداعى ۇيىنە دە 1 قوسىشەكتى اسپاپ الىپ قويعان. اسپاپتاردىڭ بارلىعىن جەرگىلىكتى دومبىرا جاسايتىن شەبەرگە تاپسىرىس بەرگەن. نەمىس ۇلتىنىڭ وكىلى بۇگىندە قۇرمانعازىنىڭ، داۋلەتكەرەيدىڭ، دينانىڭ، شالكيىزدىڭ تاعى باسقا قازاقتىڭ 50 دەن اسا كۇيىن جاتقا بىلەدى ەكەن.
جاقىندا حالىقارالىق كۇيشىلەر سايىسىنا دا قاتىسىپ ارنايى سىيلىقپەن ماراپاتتالعان.
«قاتتى قوبالجىدىم. جارىسقا دومبىرانىڭ قۇلاعىندا وينايتىن كىل مىقتىلار جينالدى. ۇلكەن ساحناعا دومبىرامەن العاش شىقتىم. ءبىراق ۇستازىم ەرلان دەمەۋ بەرىپ جىگەرلەندىردى»، - دەيدى كەيىپكەر.
ونىڭ ايتۋىنشا، اسىرەسە قۇرمانعازىنىڭ كۇيلەرى جانىنا جاقىن ەكەن. كۇيشىنىڭ تۋىندىلارىن اسا قۇلشىنىسپەن ورىندايتىنىن ايتادى. بولاشاقتا قۇرمانعازىنىڭ كۇيلەرى تۋرالى اعىلشىن تىلىندە ديسسەرتاتسيا جازىپ، ۇلى بريتانياداعى ستۋدەنتتەرگە ۇسىنعىسى كەلەدى. وسىعان دەيىن ول «گرەك اڭىزدارى» دومبى تۋرالى ديسسەرتاتسياسىن قورعاعان. ەكىنشى ديسسەرتاتسياسىن دومبىرا ۇيرەنۋ ءۇشىن ازىرگە توقتاتىپ قويعان.
«قۇرمانعازى ءوز مۇڭىن، قازاق حالقىنىڭ وتكەرگەن سۇراپىل كۇندەرىن، پاتشاعا دەگەن نارازىلىقتارىن، جەكە قاسىرەتىن كۇيلەرى ارقىلى جەتكىزگەن قازاق اۋىلدارىنداعى حالىققا جەتكىزگەن. مەن وسىنى تەرەڭ زەرتتەگىم كەلەدى، قازاق اۋىلدارىن ارالاعىم كەلەدى. سونداي- اق تاعى ءبىر ماقساتتارىمنىڭ ءبىرى - قازاق ءتىلىن جەتىك مەڭگەرۋ. ويتكەنى ماعان قازاق مادەنيەتى، ءتىلى، تاريحى وتە قىزىق. سول ماقساتىمدى ورىنداۋ ءۇشىن الماتى قالاسىنداعى ۋنيۆەرسيتەتتەردىڭ بىرىنە وقۋعا تاپسىرامىن دەپ شەشتىم»، - دەيدى سابينا ماستەرس.
ول سونداي-اق بوس ۋاقىتىندا ەرىكتى بولىپ قىزمەت ەتەدى، اتىراۋ ۋنيۆەرسيتەتىندە ستۋدەنتتەرگە تەگىن اعىلشىن تىلىندە ءدارىس وقيدى. ءوزىنىڭ نەگىزى ماماندىعى - جالپى تاجىريبەلى دارىگەر. گوللانديا ۋنيۆەرسيتەتىنىڭ جانە وكسفورد ۋنيۆەرسيتەتىنىڭ مەديتسينا فاكۋلتەتتەرىن ءتامامداعان.
«مەديتسينا سالاسىندا ازعانتاي ۋاقىت قانا قىزمەت ەتتىم. جولداسىمنىڭ جۇمىسىمەن گوللانديا، گەرمانيا، رەسەي، سيريا جانە قازاقستانعا كوشىپ كەلدىك. مەنىڭ مەديتسينالىق ديپلومدارىممەن ۇلى بريتانيا جانە نيدەرلاندى مەملەكەتتەرىندە عانا قىزمەت ەتۋگە بولادى. قاي ەلدە تۇرساق تا سول جەردىڭ مادەنيەتىن، تاريحىن تەرەڭ بىلگىم كەلەتىن. سونىڭ ىشىندە قازاقستان ماعان ەرەكشە اسەر ەتتى، ادامدارى وتە اشىق، جۇرەكتەرى كەڭ. وسى جەردە كوپ دوس تاپتىم. ال، ەڭ جاقىن دوسىم جەرگىلىكتى كاسىبي پيانيست يانا ۋسەينوۆا. مەنىڭ ءانشى ۇلىم الەكساندر ەكەۋى وسى اتىراۋدا جەكە كونتسەرتىن دە بەرگەن»، - دەيدى سابينا ماستەرس.
سابينانىڭ ايتۋىنشا، ءوزىنىڭ ءبىر ۇلى مەن ءۇش قىزى دا ءار ءتۇرلى اسپاپتاردى مەڭگەرگەن. ال ءوزى ارنايى مۋزىكالىق ءبىلىمى بولماسا دا كىشكەنتايىنان پيانينودا وينايدى.
«مەنىڭ اعام كاسىبي مۋزىكانت. ال ۇلكەن اتام كەزىندە نەمىس تىلىندە تەاترعا ارناپ پەسا جازعان. ول كىسى سولتۇستىك نەمىس ديالەكتيكاسىندا شىعارمالار جازعان. پەسالار ءالى كۇنگە دەيىن تەاتر ساحنالارىندا قويىلىپ ءجۇر. مەن ولاردى اعىلشىن تىلىنە اۋدارۋدامىن. ونەرگە دەگەن قىزىعۋشىلىعىم سول ناعاشى جاعىمنان دارىعان»، - دەيدى ماستەرس حانىم.
اۆتور: ايگەرىم سايقىن