شيكىزات وندىرەتىن ەمەس، ءومىر سۇرۋگە قولايلى قالالار قاجەت
بۇل ءۇردىستىڭ كەڭىنەن تارالۋى ءۇشىن وڭىرلەرگە قوسىمشا قارجى بولۋمەن عانا شەكتەلۋگە بولمايدى. ينفراقۇرىلىمدى دامىتىپ، قىزمەت كورسەتۋ ساپاسىن جاقسارتۋ جانە كاسىپكەرلىككە قولايلى جاعداي جاساۋ قاجەت. سوندا عانا شاعىن قالالار مەن اۋىلدار ءىرى مەگاپوليستەرگە بالاما بولا الادى. ال ۋربانيزاتسيا مەن وڭىرلەردىڭ دامۋى اراسىنداعى تەپە- تەڭدىك قوعامنىڭ جاڭا دامۋ كەزەڭىنە اياق باسقانىن كورسەتەدى.
قۇرىلتاي دەپۋتاتى نيكيتا شاتالوۆتىڭ پىكىرىنشە، بۇگىندە كوپتەگەن وبلىس ورتالىعىندا ۇقساس ماسەلەلەر بار. ەسكى تۇرعىن ۇيلەر كوپ بولعانىمەن، جاڭالارى جەتكىلىكتى دەڭگەيدە سالىنىپ جاتقان جوق. دەپۋتات قۇرىلىس كومپانيالارىن تارتۋ ءۇشىن ءتيىمدى جاعداي جاساۋ قاجەت دەپ ەسەپتەيدى. اتاپ ايتقاندا، جەر تەلىمدەرى مەن ينجەنەرلىك ينفراقۇرىلىمعا قول جەتكىزۋدى جەڭىلدەتىپ، سالىقتىق جەڭىلدىكتەر مەن تۇرعىن ۇيگە سۇرانىستى ىنتالاندىراتىن باعدارلامالاردى قاراستىرۋدى ۇسىنادى.
- ەڭ باستىسى، وبلىس ورتالىقتارى مەن قالالاردى كەن ورىندارىنىڭ جانىنداعى جۇمىسشىلار ۋاقىتشا تۇراتىن ەلدى مەكەندەرگە اينالدىرماي، ادامداردىڭ تۇراقتى ءومىر سۇرۋىنە قولايلى مەكەن رەتىندە دامىتۋ قاجەت، - دەدى دەپۋتات.
وسىلايشا، ءىرى قالالاردان شالعاي ورنالاسقان ەلدى مەكەندەردىڭ تىرشىلىگى ءبىر عانا ءوندىرىس سالاسىنا نەمەسە جاقىن ماڭداعى كەن ورىندارىنا تاۋەلدى بولماۋى ءتيىس. ولاردا كاسىپورىندار اشىلىپ، جاڭا جۇمىس ورىندارى قۇرىلۋى قاجەت. سونداي- اق تۇرعىنداردىڭ سول جەردە تۇراقتاپ، بولاشاعىن جوسپارلاۋىنا مۇمكىندىك بەرەتىن جاعداي جاسالۋى كەرەك.
ينتەرنەت حالىقتىڭ كوشى-قون باعىتىن وزگەرتە الا ما
قازاقستاندىق قوعامدىق دامۋ ينستيتۋتى باسقارما ءتوراعاسىنىڭ ورىنباسارى ازامات بايعاليەۆ الداعى ۋاقىتتا ءىرى قالا تۇرعىندارىنىڭ ءبىر بولىگى شاعىن ەلدى مەكەندەرگە قونىس اۋدارۋى مۇمكىن ەكەنىن ايتادى. بۇعان باسپانا جالداۋ قۇنىنىڭ قىمباتتىعى، ۇلكەن قالالارداعى قاربالاس تىرشىلىك پەن ادامداردىڭ تىنىش ورتادا ءومىر سۇرۋگە ۇمتىلىسى اسەر ەتۋى ىقتيمال.
ساراپشى مۇنداي وزگەرىسكە جول اشاتىن نەگىزگى شارتتاردىڭ ءبىرى رەتىندە سيفرلىق ينفراقۇرىلىمدى دامىتۋدى اتادى.
- ەگەر ينتەرنەت استانادا دا، شالعاي اۋدانداردا دا بىردەي تۇراقتى جۇمىس ىستەسە، ادامدار ءىرى قالاعا تاۋەلدى بولماي، قاشىقتان ەڭبەك ەتۋگە جانە سيفرلىق قىزمەتتەردى پايدالانۋعا كوبىرەك مۇمكىندىك الادى، - دەيدى ساراپشى.
دەگەنمەن ينتەرنەتتىڭ ساپالى بولۋى عانا اۋىلعا كوشكىسى كەلەتىندەردىڭ سانىن ارتتىرا المايدى. وتباسىلار ءۇشىن جاقسى مەكتەپ پەن قولجەتىمدى مەديتسينالىق كومەك ماڭىزدى. ال ەڭبەككە قابىلەتتى تۇرعىندارعا تۇراقتى تابىس تاباتىن مۇمكىندىك قاجەت. سوندىقتان ينتەرنەت جەلىسىن دامىتۋ ءىسى جايلى مەكتەپتەر، اۋىلدىق اۋرۋحانالار مەن تۇرعىن ۇيلەر سالۋمەن قاتار جۇرگىزىلۋى ءتيىس. مەملەكەت تە جاڭا تۇرعىنداردى قابىلداۋعا قاجەتتى جاعدايدى الدىن الا جاساۋى كەرەك.
جەرگىلىكتى بيلىككە ەركىندىكپەن بىرگە جاۋاپكەرشىلىك تە قاجەت
شاعىن قالالاردىڭ تۇرعىندار ءۇشىن تارتىمدى بولۋى تەك قوسىمشا قارجىعا بايلانىستى ەمەس. بولىنگەن قاراجاتتىڭ قالاي جۇمسالاتىنى دا ماڭىزدى. جەرگىلىكتى بيلىك قۇرىلىس كومپانيالارىن تارتىپ، كاسىپكەرلەرگە قولايلى جاعداي جاساپ، ينفراقۇرىلىم ماسەلەلەرىن شەشە الۋى قاجەت.
ازامات بايعاليەۆ ءوڭىر باسشىلارىنا كوبىرەك دەربەستىك بەرۋ قاجەتتىگىنە نازار اۋداردى. وسى ورايدا ول پرەزيدەنت قاسىم-جومارت توقايەۆتىڭ ءاربىر باسشى باتىل شەشىم قابىلداپ، ونىڭ جاۋاپكەرشىلىگىن ءوز موينىنا الۋعا دايىن بولۋى كەرەك دەگەن ءسوزىن ەسكە سالدى.
وسىلايشا، وڭىرلەردى دامىتۋ ءۇشىن بىرنەشە ماسەلەنى قاتار شەشۋ قاجەت. اتاپ ايتقاندا، جاڭا جۇمىس ورىندارىن اشىپ، تۇرعىن ءۇي قۇرىلىسىن جانداندىرۋ، الەۋمەتتىك ينفراقۇرىلىمدى جاقسارتۋ جانە تسيفرلىق مۇمكىندىكتەردى كەڭەيتۋ ماڭىزدى.
ەگەر مۇنداي جاعداي تەك مەگاپوليستەردە عانا ەمەس، شاعىن قالالار مەن اۋىلداردا دا جاسالسا، قازاقستاندىقتاردىڭ تاڭداۋ مۇمكىندىگى ارتادى. سوندا ادامدار مانساپ جولىن قاي جەردە جالعاستىراتىنىن، بالالارىن قايدا وسىرەتىنىن جانە بولاشاعىن قاي وڭىرمەن بايلانىستىراتىنىن ءوز قالاۋى بويىنشا شەشە الادى.
بۇعان دەيىن Kazinform اگەنتتىگى استانانىڭ ءومىر سۇرۋگە قانشالىقتى قولايلى قالا ەكەنىن حالىقارالىق ولشەمدەر نەگىزىندە تالداعان ەدى.