كەلەر جىلعى كۇنتىزبەدەگى باستى وزگەرىستەردىڭ ءبىرى - كونستيتۋتسيا كۇنىنىڭ 15-ناۋرىزعا اۋىستىرىلۋى. ال ناۋرىز مەيرامىندا قازاقستاندىقتار بەس كۇن قاتارىنان دەمالادى.
2027-جىلى قانداي مەرەكەلەردە دەمالامىز؟
1-2-قاڭتار - جاڭا جىل؛
7-قاڭتار - پراۆوسلاۆيەلىك روجدەستۆو؛
8-ناۋرىز - حالىقارالىق ايەلدەر كۇنى؛
15-ناۋرىز - كونستيتۋتسيا كۇنى؛
21-23-ناۋرىز - ناۋرىز مەيرامى؛
1-مامىر - قازاقستان حالقىنىڭ بىرلىگى كۇنى؛
7-مامىر - وتان قورعاۋشىلار كۇنى؛
9-مامىر - جەڭىس كۇنى؛
16-مامىر - قۇربان ايت (الدىن الا بەلگىلەنگەن كۇن)؛
6-شىلدە - استانا كۇنى؛
25-قازان - رەسپۋبليكا كۇنى؛
16-جەلتوقسان - تاۋەلسىزدىك كۇنى.
قازاقستان مۇسىلماندارى ءدىني باسقارماسىنىڭ الدىن الا كۇنتىزبەسىنە سايكەس، 2027-جىلى رامازان ايى 8-اقپاندا باستالادى. ال قۇربان ايت 16-18-مامىر ارالىعىنا بەلگىلەنگەن. دەگەنمەن ءدىني مەرەكەلەردىڭ ناقتى كۇنى جاڭا ايدىڭ كورىنۋىنە بايلانىستى وزگەرۋى مۇمكىن.
30-تامىزدا دەمالىس بولمايدى
2027-جىلى قازاقستاندىقتار العاش رەت كونستيتۋتسيا كۇنىن 15-ناۋرىزدا اتاپ وتەدى. بۇعان دەيىن بۇل مەملەكەتتىك مەرەكە 30-تامىزدا تويلانىپ كەلگەن.
جاڭا كونستيتۋتسيانىڭ قابىلدانۋىنا بايلانىستى 2026-جىلعى 11-ماۋسىمدا ءتيىستى زاڭعا وزگەرىس ەنگىزىلدى.
كەلەر جىلى كونستيتۋتسيا كۇنى دۇيسەنبىگە سايكەس كەلەدى. سوندىقتان قازاقستاندىقتار 13-15-ناۋرىز ارالىعىندا ءۇش كۇن قاتارىنان دەمالادى. ال 30-تامىز ادەتتەگى جۇمىس كۇنى بولادى.
مەرەكە كۇندەرى قالاي اۋىستىرىلادى؟
«قازاقستان رەسپۋبليكاسىنداعى مەرەكەلەر تۋرالى» زاڭعا سايكەس، ۇلتتىق نەمەسە مەملەكەتتىك مەرەكە دەمالىس كۇنىنە سايكەس كەلسە، ودان كەيىنگى جۇمىس كۇنى دەمالىس بولىپ بەلگىلەنەدى.
ماسەلەن، 2-قاڭتار سەنبىگە سايكەس كەلەتىندىكتەن، 4-قاڭتاردا قوسىمشا دەمالىس بەرىلەدى. سونداي-اق 21-ناۋرىزداعى دەمالىس 24-ناۋرىزعا، 1-مامىرداعى دەمالىس 3-مامىرعا، ال 9-مامىرداعى دەمالىس 10-مامىرعا اۋىستىرىلادى.
الايدا بۇل ەرەجە ءدىني مەرەكەلەرگە قولدانىلمايدى. ياعني پراۆوسلاۆيەلىك روجدەستۆو مەن قۇربان ايت دەمالىس كۇندەرىنە سايكەس كەلسە، قوسىمشا دەمالىس بەرىلمەيدى.
2027-جىلدىڭ ءار ايىندا قالاي دەمالامىز؟
قاڭتار. قازاقستاندىقتار جاڭا جىلدىڭ العاشقى ءتورت كۇنىندە دەمالادى. سونداي-اق 7-قاڭتاردا پراۆوسلاۆيەلىك روجدەستۆو مەرەكەسىنە وراي جۇمىس ىستەمەيدى. اي ىشىندە 18 جۇمىس جانە 13 دەمالىس كۇنى بولادى.
اقپان. بۇل ايدا مەرەكەلىك دەمالىس جوق. قازاقستاندىقتار 20 كۇن جۇمىس ىستەپ، 8 كۇن دەمالادى.
ناۋرىز. جىلداعى مەرەكەگە تولى ايلاردىڭ ءبىرى. حالىقارالىق ايەلدەر كۇنىنە وراي 6-8-ناۋرىز، كونستيتۋتسيا كۇنىنە بايلانىستى 13-15-ناۋرىز ارالىعىندا دەمالىس بەرىلەدى. ال ناۋرىز مەيرامىندا 20-24-ناۋرىز ارالىعىندا بەس كۇن قاتارىنان دەمالۋعا مۇمكىندىك بار. جالپى ايدا 18 جۇمىس كۇنى مەن 13 دەمالىس كۇنى بولادى.
ءساۋىر. مەرەكەلىك دەمالىس قاراستىرىلماعان. قازاقستاندىقتار 22 كۇن جۇمىس ىستەپ، 8 كۇن دەمالادى.
مامىر. قازاقستان حالقىنىڭ بىرلىگى كۇنىنە وراي 1-3-مامىر ارالىعىندا ءۇش كۇن دەمالىس بەرىلەدى. ال وتان قورعاۋشىلار كۇنى مەن جەڭىس كۇنىنە بايلانىستى 7-10-مامىر ارالىعىندا ءتورت كۇن قاتارىنان دەمالۋعا بولادى. ايدا بارلىعى 18 جۇمىس جانە 13 دەمالىس كۇنى بار.
ماۋسىم. مەملەكەتتىك مەرەكەلەر جوق. ءبىر ايدا 22 جۇمىس كۇنى مەن 8 دەمالىس كۇنى بولادى.
شىلدە. استانا كۇنى 6-شىلدەدە، سەيسەنبىدە اتاپ وتىلەدى. قازاقستاندىقتار بۇل ايدا 21 كۇن جۇمىس ىستەپ، 10 كۇن دەمالادى.
تامىز. كونستيتۋتسيا كۇنىنىڭ باسقا داتاعا اۋىستىرىلۋىنا بايلانىستى بۇل ايدا مەرەكەلىك دەمالىس بولمايدى. تامىزدا 22 جۇمىس جانە 9 دەمالىس كۇنى بار.
قىركۇيەك. قوسىمشا دەمالىس قاراستىرىلماعان. قازاقستاندىقتار 22 كۇن جۇمىس ىستەپ، 8 كۇن دەمالادى.
قازان. رەسپۋبليكا كۇنى دۇيسەنبىگە سايكەس كەلەدى. وسىعان وراي 23-25 قازان ارالىعىندا ءۇش كۇن قاتارىنان دەمالىس بەرىلەدى. ايدا 20 جۇمىس جانە 11 دەمالىس كۇنى بولادى.
قاراشا. مەملەكەتتىك مەرەكەلەر جوق. قازاقستاندىقتار 22 كۇن جۇمىس ىستەپ، 8 كۇن دەمالادى.
جەلتوقسان. تاۋەلسىزدىك كۇنى بەيسەنبىگە سايكەس كەلەدى. جىلدىڭ سوڭعى ايىندا 22 جۇمىس كۇنى مەن 9 دەمالىس كۇنى بولادى.
قاي ايدا دەمالىس كوپ؟
2027-جىلى قاڭتار، ناۋرىز جانە مامىر ايلارىندا دەمالىس كۇندەرى كوپ بولادى. اتالعان ءۇش ايدا قازاقستاندىقتار 13 كۇننەن دەمالادى. ەڭ ۇزاق مەرەكەلىك دەمالىس ناۋرىز مەيرامىنا سايكەس كەلسە، جاڭا جىل مەن مامىر مەرەكەلەرىندە ءتورت كۇن قاتارىنان دەمالۋعا مۇمكىندىك بار.
ال جىلدىق جۇمىس ۋاقىتىنىڭ نورماسى 40 ساعاتتىق جۇمىس اپتاسىندا 1976 ساعاتتى، 36 ساعاتتىق جۇمىس اپتاسىندا 1778,4 ساعاتتى قۇرايدى.