بۇعان دەيىن Threads الەۋمەتتىك جەلىسىندە 2027-جىلدىڭ باسىنان باستاپ تۇركى مەملەكەتتەرى ۇيىمىنا (ت م ۇ) مۇشە ەلدەردىڭ ازاماتتارى ءبىر-بىرىنە پاسپورتسىز قاتىناي الادى دەگەن اقپارات تاراعان. ول ءۇشىن جەكە كۋالىك جەتكىلىكتى بولاتىنى جازىلعان.
Kazinform ءتىلشىسى وسى اقپاراتقا قاتىستى سىرتقى ىستەر مينيسترلىگىنە ساۋال جولدادى.
ۆەدومستۆونىڭ مالىمەتىنشە، بۇل ماسەلە تمۇ اياسىندا تالقىلانعان. الايدا تاراپتار ازىرگە ورتاق كەلىسىمگە كەلگەن جوق.
- قازىرگى ۋاقىتتا ت م ۇ- عا مۇشە مەملەكەتتەر اراسىندا بۇل باستامانى ىسكە اسىرۋعا قاتىستى ورتاق كەلىسىم جوق. سوندىقتان 2027-جىلعى 1-قاڭتاردان باستاپ تمۇ ەلدەرى ازاماتتارىنىڭ جەكە كۋالىكپەن ءوزارا قاتىناۋىنا مۇمكىندىك بەرەتىن ءتارتىپ ەنگىزىلەدى دەگەن اقپارات راستالمايدى، - دەپ حابارلادى س ءى م.
جاڭا ءتارتىپتىڭ قاشان ەنگىزىلەتىنى ازىرگە بەلگىسىز.
ايتا كەتەيىك، تمۇ قۇرامىنا قازاقستان، ازەربايجان، قىرعىزستان، تۇركيا جانە وزبەكستان كىرەدى.
قازاقستان اتالعان ەلدەردىڭ بارلىعىمەن ۆيزاسىز رەجيم ورناتقان. ءبىراق جەكە كۋالىكپەن تەك قىرعىزستانعا بارۋعا بولادى. قالعان مەملەكەتتەرگە پاسپورت قاجەت.
قازاقستان مەن وزبەكستان شەكارادان جەكە كۋالىكپەن ءوتۋ مۇمكىندىگىن دە تالقىلاپ جاتىر. قازىر كورشى ەلگە بارۋ ءۇشىن شەتەلدىك پاسپورت قاجەت. جاڭا ءتارتىپتىڭ ەنگىزىلەتىن مەرزىمى انىقتالعان جوق.
سونىمەن قاتار قازاقستان ازاماتتارى ارمەنياعا جەكە كۋالىكپەن بارا الادى. بۇل مۇمكىندىك 2025-جىلعى 22-قاراشادان باستاپ قولدانىلادى. ول ەكى ەل اراسىنداعى تىكەلەي اۋە رەيستەرىنە قاتىستى.
جەكە كۋالىكپەن استانا - ەريەۆان - استانا جانە الماتى - ەريەۆان - الماتى باعىتتارىندا ۇشۋعا بولادى.
بۇعان دەيىن يندونەزيا قازاقستان ازاماتتارىنا 30 كۇنگە دەيىن ۆيزاسىز جۇرۋگە مۇمكىندىك بەرگەنى حابارلانعان ەدى.
سونداي-اق 15-قىركۇيەكتەن باستاپ تايلاند 93 ەلدىڭ ازاماتتارى ءۇشىن ۆيزاسىز بولۋ مەرزىمىن 30 كۇنگە دەيىن قىسقارتتى. ولاردىڭ قاتارىندا قازاقستان دا بار.