جاڭا ستاندارت بويىنشا ءونىم ساپاسىنا قويىلاتىن تالاپتار قاتاڭداتىلىپ، قازاقستاندىق وندىرۋشىلەردىڭ باسەكەلەستىك ارتىقشىلىعىن ارتتىرۋ كوزدەلگەن.
ق ر ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتى ءتوراعاسىنىڭ ورىنباسارى الەكساندر راززارەنوۆتىڭ ايتۋىنشا، ەلىمىزدە ساۋمالعا ارنالعان ستاندارت بۇرىننان بەكىتىلگەن. ال بيىل عىلىمي زەرتتەۋلەردىڭ ناتيجەسىندە پاستەرلەنگەن تۇيە سۇتىنە ارنالعان ستاندارت ازىرلەنگەن.
- بىزدە ساۋمالعا ارنالعان ستاندارت بۇرىننان بار. بيىل عىلىمي زەرتتەۋلەر نەگىزىندە پاستەرلەنگەن تۇيە سۇتىنە ارنالعان ستاندارت ازىرلەدىك. بۇل ءونىمدى تاياۋ شىعىس ەلدەرىنە ەكسپورتتاۋعا مۇمكىندىك بەرەدى. سىناق ناتيجەلەرى بويىنشا وتاندىق ءونىمنىڭ ساپا كورسەتكىشتەرى ساۋدا سەرىكتەستەرىمىزدىڭ ۇقساس ونىمدەرىنە قاراعاندا جوعارى ەكەنىن انىقتادىق. ەندى ساپا تالاپتارى قاتاڭداتىلادى. تيىسىنشە، بۇل وتاندىق ءونىمنىڭ باسەكەگە قابىلەتتىلىگىن ارتتىرادى، - دەدى الەكساندر راززارەنوۆ ورتالىق كوممۋنيكاتسيالار قىزمەتىندە وتكەن بريفينگتە.
سونىمەن قاتار ءىس-شارا بارىسىندا جۋرناليستەر شۇباتقا جەكە ستاندارت ەنگىزىلە مە جانە تۇيە ءسۇتى ونىمدەرىنە ورتاق تالاپتار بەلگىلەنە مە دەگەن ساۋال قويدى.
ق ر ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتى ءتوراعاسىنىڭ ورىنباسارى قانات قابىلبەكوۆتىڭ تۇسىندىرۋىنشە، ازىرگە تاماق ونەركاسىبى باعىتىندا پاستەرلەنگەن تۇيە سۇتىنە قاتىستى ستاندارت قابىلدانعان. الداعى ۋاقىتتا وسىنداي ستاندارتتاردى ازىرلەۋ جانە ولاردىڭ تالاپتارىن ەنگىزۋ بويىنشا جۇمىستار جالعاسادى.
- تاماق ونەركاسىبى بويىنشا، اتاپ ايتقاندا، پاستەرلەنگەن تۇيە سۇتىنە قاتىستى وسىنداي ستاندارت قابىلداندى. ولاردى ودان ءارى ازىرلەۋ جانە ساپا تالاپتارىن ەنگىزۋ باعىتىنداعى جۇمىستار جالعاسادى، - دەپ تولىقتىردى قانات قابىلبەكوۆ.
بۇعان دەيىن قازاق فەرمەرى تۇيە شارۋاشىلىعىن دامىتىپ، جىلىنا 197 توننا ءسۇت وندىرەتىنىن جازعان ەدىك.