بۇرىن كوبىنە ەرەكشە جاعدايدا پايدالانىلاتىن تاكسي بۇگىندە كۇندەلىكتى قاجەتتىلىككە اينالدى.
الايدا ۇيرەنشىكتى قوسىمشا ۋاقىتشا ىستەمەي قالسا، جولاۋشىلارعا باسقا كولىك ىزدەۋگە تۋرا كەلەدى. جۋىردا ەلىمىزدە وسىنداي قولايسىزدىقتار دا بايقالدى. بۇل ءبىر عانا سەرۆيسكە تاۋەلدى بولماۋدىڭ ماڭىزىن كورسەتتى. ويتكەنى نارىقتا تاڭداۋ نەعۇرلىم كوپ بولسا، قىزمەت ساپاسى مەن باعاعا دا اسەر ەتۋى مۇمكىن.
قازاقستاندىق پلاتفورمالار ءىرى حالىقارالىق كومپانيالارمەن قالاي باسەكەلەسىپ ءجۇر؟ جولاۋشىلار مەن جۇرگىزۋشىلەرگە قانداي مۇمكىندىك ۇسىنادى؟ وتاندىق تاكسي قوسىمشالارىنىڭ نارىقتاعى ۇلەسىن ارتتىرۋ ءۇشىن نە قاجەت؟ بۇل تۋرالى قازاقستاندىق تاكسي سەرۆيسىنىڭ نەگىزىن قالاۋشى ەرلان شاياحمەتوۆ Jibek Joly تەلەارناسىنىڭ «بۇگىن. LIVE» باعدارلاماسىندا ايتىپ بەردى.
ونىڭ ايتۋىنشا، كومپانيانى قۇرۋ يدەياسى ديسپەتچەر ارقىلى تاكسي شاقىرۋ كەزىندە تۋىندايتىن قولايسىزدىقتارعا بايلانىستى پايدا بولعان.
- APARU كومپانياسىنىڭ نەگىزى 2010-جىلى قالاندى. 2011-جىلى جۇمىس ىستەي باستادىق، ال 2014-جىلى جەكە قوسىمشامىزدى ىسكە قوستىق. ول كەزدە تاپسىرىستاردى ديسپەتچەرلەر قابىلدايتىن. كەيدە بوس كولىك تابىلمايتىن، كەيدە كەزەك ۇزاق بولاتىن. ال كولىكتەردىڭ ورنالاسقان جەرىن كورسەتەتىن قوسىمشا بولسا، جولاۋشىعا جاقىن جۇرگىزۋشىنى انىقتاپ، قىزمەتتى جىلدام ۇيىمداستىرۋعا مۇمكىندىك تۋادى. ءبىز سەرۆيستى جۇرگىزۋشىلەرگە دە، جولاۋشىلارعا دا ىڭعايلى ەتۋ ءۇشىن وسىنداي شەشىمگە كەلدىك، - دەدى ەرلان شاياحمەتوۆ.
APARU- دىڭ باسقا پلاتفورمالاردان باستى ايىرماشىلىعى - جۇرگىزۋشىنىڭ تاپسىرىستى ءوزى تاڭداي الۋى. قوسىمشادا جۇرگىزۋشى وزىنە جاقىن ماڭداعى جولاۋشىلاردىڭ تاپسىرىستارىن قاراپ، قايسىسىن قابىلدايتىنىن ءوزى شەشەدى.
- ءبىز باستاپقىدا باسقا كومپانيالاردىڭ مودەلىنە قاراپ ەمەس، ءوز يدەيامىزعا سۇيەنىپ جۇمىس ىستەدىك. جۇرگىزۋشى تاپسىرىستى قابىلداي ما، جوق پا - ءوزى شەشەدى. جولاۋشى جول اقىسىن جۇرگىزۋشىگە تىكەلەي قولما-قول نەمەسە بانك كارتاسىنا اۋدارادى. كومپانيا جولاۋشىدان اقشانى جيناپ الىپ، كەيىن جۇرگىزۋشىگە ءبولىپ بەرمەيدى. جۇرگىزۋشىلەر سەرۆيستىڭ ىشكى بالانسىن الدىن الا تولتىرادى، ال تاپسىرىس ورىندالعان سايىن سول بالانستان بەلگىلەنگەن سوما الىنادى، - دەدى كومپانيا نەگىزىن قالاۋشى.
سپيكەردىڭ سوزىنشە، جۇرگىزۋشىلەردى سەرۆيسكە تىركەۋ ونلاين جۇرگىزىلەدى. ولار كولىگىنىڭ ماركاسى مەن فوتوسىن، جۇرگىزۋشى كۋالىگىن جىبەرىپ، تىركەۋدەن وتەدى. كومپانيا مالىمەتىنە سايكەس، قازىر پلاتفورمادا شامامەن 5 مىڭ جۇرگىزۋشى تىركەلگەن. جولاۋشىلاردى قوسا ەسەپتەگەندە، سەرۆيستى پايدالانۋشىلاردىڭ جالپى سانى 1,5 ميلليونعا جۋىق.
كومپانيا شىعىس قازاقستان وبلىسىندا كەڭىنەن تانىمال. ەرلان شاياحمەتوۆتىڭ ايتۋىنشا، سەرۆيس وسكەمەندە پايدا بولعاندىقتان، وڭىردە پايدالانۋشىلارى كوپ. سونىمەن قاتار APARU تاراز بەن اقتوبە قالالارىندا دا جۇمىس ىستەيدى.
قازاقستاندىق تاكسي سەرۆيستەرى ءۇشىن حالىقارالىق پلاتفورمالارمەن باسەكەلەسۋ وڭاي ەمەس. بۇل رەتتە جۇرگىزۋشىلەرگە قولايلى شارت ۇسىنۋ، جولاۋشىلاردىڭ سەنىمىن قالىپتاستىرۋ جانە قىزمەت ساپاسىن ساقتاۋ ماڭىزدى. APARU وكىلى سەرۆيستىڭ باستى ەرەكشەلىگى رەتىندە جۇرگىزۋشىلەردىڭ تاپسىرىستى وزدەرى تاڭداۋىن جانە تولەمنىڭ تىكەلەي جۇرگىزۋشىگە ءتۇسۋىن اتاپ ءوتتى.
بۇعان دەيىن قازاقستاندا ياندەكس Go سەرۆيستەرىنىڭ جۇمىسى بۇزىلىپ، پايدالانۋشىلار تاكسي شاقىرۋ جانە جەتكىزۋ قىزمەتتەرىن قولدانۋدا قيىندىقتارعا تاپ بولعانى تۋرالى جازعان ەدىك.