قازاقستاننىڭ ۇلتتىق پاۆيلونىندا مايلى داقىلداردى وڭدەۋشىلەردىڭ ۇلتتىق قاۋىمداستىعى مەن وتاندىق توعىز ماي زاۋىتى ماي وڭدەۋ سالاسىنىڭ ونىمدەرىن تانىستىردى.
قاۋىمداستىق وكىلدەرىنىڭ ايتۋىنشا، بۇل كورمە ىسكەرلىك بايلانىستاردى نىعايتۋعا، جاڭا سەرىكتەستەر تابۋعا جانە قىتايمەن ساۋدا-ەكونوميكالىق ىنتىماقتاستىقتى كەڭەيتۋگە مۇمكىندىك بەرەتىن ءتيىمدى الاڭ.
- ءبىز بۇل كورمەگە ءتورت جىل قاتارىنان قاتىسىپ كەلەمىز. وسى ۋاقىت ىشىندە جاڭا سەرىكتەستەر تاۋىپ، ءبىرقاتار كەلىسىمشارتقا قول قويدىق، - دەدى مايلى داقىلداردى وڭدەۋشىلەردىڭ ۇلتتىق قاۋىمداستىعى وكىلدەرى.
كورمە اياسىندا «شىڭجاڭعا ينۆەستيتسيا سالىڭىز» اتتى تانىستىرىلىم شاراسى ءوتىپ، وعان قىتاي حالىق رەسپۋبليكاسىنىڭ شىڭجاڭ-ۇيعىر اۆتونوميالىق اۋدانى حالىق ۇكىمەتى باس حاتشىسىنىڭ ورىنباسارى سيۋي بايكە مەن قازاقستاننىڭ شاڭحاي قالاسىنداعى باس كونسۋلى نۇرلان اققوشقاروۆ قاتىستى. ءىس-شارا بارىسىندا قاۋىمداستىقتىڭ اتقارۋشى ديرەكتورى الەكساندر ياشكوۆ قاتىسۋشىلارعا قازاقستاننىڭ ماي ونەركاسىبىنىڭ دامۋ بولاشاعى مەن ەكسپورتتىق الەۋەتى تۋرالى باياندادى.
ونىڭ ايتۋىنشا، سالادا قارقىندى ءوسىم بايقالادى. سوڭعى بەس ماۋسىمدا وسى سالادا ەكسپورت كولەمى بەس ەسەگە ارتقان. 2025/2026 ماۋسىمىنىڭ قورىتىندىسى بويىنشا ەكسپورت كولەمى 1,8 ميلليون توننادان اسىپ، ەكسپورتتان تۇسكەن كىرىس 1 ميلليارد 233 ميلليون ا ق ش دوللارىنا جەتكەن. بۇل كورسەتكىش تە بەس ەسەگە وسكەن.
جالپى، قازاقستاندىق ماي ونىمدەرى الەمنىڭ 20 دان استام ەلىنە ەكسپورتتالادى. ولاردىڭ قاتارىندا قىتاي، ورتالىق ازيا مەملەكەتتەرى، ەۋروپالىق وداق ەلدەرى جانە تاياۋ شىعىس بار. قىتاي وتاندىق ءونىمدى يمپورتتاۋشى ءىرى ەلدەردىڭ اراسىندا ەكىنشى ورىندا تۇر. سونىمەن قاتار بۇل نارىقتا سۇرانىس تا وتە جوعارى. سوڭعى بەس ماۋسىمدا قازاقستاننان قىتايعا ەكسپورتتالعان وسىمدىك مايلارى، شروت پەن كۇنجارادان تۇسكەن ۆاليۋتالىق ءتۇسىم 385 ميلليون ا ق ش دوللارىنا ارتىپ، 438 ميلليون ا ق ش دوللارىنا جەتتى.
- قازاقستاندىق ماي ونىمدەرى قىتاي نارىعىندا جوعارى سۇرانىسقا يە. مۇنى جىل سايىن ميلليونداعان دوللاردى قۇرايتىن كەلىسىمشارتتاردىڭ جاسالۋى دا راستايدى. قىتاي نارىعىنىڭ اۋقىمدىلىعى ەكى ەل اراسىنداعى ىنتىماقتاستىقتى ودان ءارى كەڭەيتۋگە زور مۇمكىندىك بەرەدى. اتاپ ايتقاندا، بيىلعى ماۋسىمدا قىتايدىڭ وسىمدىك مايلارى، شروت پەن كۇنجارا يمپورتىنىڭ جالپى كولەمى 16 ميلليون تونناعا باعالانىپ وتىر، - دەپ اتاپ ءوتتى الەكساندر ياشكوۆ.
شاڭحايدا جاسالعان 108 ميلليون ا ق ش دوللارىنا تەڭ ەكسپورتتىق كەلىسىمدەر قازاقستان مەن قىتاي اراسىنداعى ساۋدا-ەكونوميكالىق ىنتىماقتاستىقتى نىعايتۋ جولىنداعى كەزەكتى ماڭىزدى قادام ەكەنى ءسوزسىز.
وسىعان دەيىن قازاقستاننىڭ ماي ونىمدەرى ەكسپورتىن 1,5 ميلليارد دوللارعا جەتكىزۋدى كوزدەپ وتىرعانى تۋرالى جازدىق.