ونىڭ ايتۋىنشا، مەملەكەت باسشىسىنىڭ قازاقستاندى ەۋرازياداعى جەتەكشى لوگيستيكالىق ورتالىققا اينالدىرۋ تاپسىرماسىن ورىنداۋ اياسىندا تەرمينالدىق ينفراقۇرىلىمدى دامىتۋ جۇمىستارى باستالدى.
- قازىر ەلىمىزدە 46 لوگيستيكالىق ورتالىق جۇمىس ىستەيدى. 2030 -جىلعا دەيىن تاعى 21 ورتالىق سالۋ جوسپارلانعان. سونىمەن قاتار قازاقستاننىڭ ترانزيتتىك دالىزدەرىن جۇكپەن قامتاماسىز ەتۋ ءۇشىن شەتەلدەردە دە لوگيستيكالىق تەرمينالدار جەلىسى كەڭەيىپ كەلەدى. قازىر لياڭيۋنگان، шيان، پوتي قالالارىندا 3 تەرمينال جۇمىس ىستەيدى. تاعى 7 تەرمينال بويىنشا جۇمىستار جۇرگىزىلىپ جاتىر. ولار سەلياتينو، سۆيسلوچ، تاشكەنت، چەندۋ، اليات، كونستانتسا قالالارىندا جانە ماجارستاندا ورنالاسقان، - دەدى كولىك ۆيتسە-ءمينيسترى.
بۇل باعىتتاعى جۇمىستار نەگىزىنەن «قازاقستان تەمىر جولى» كومپانياسى ارقىلى جۇزەگە اسىرىلادى. وعان قوسا، KTZ Express, «كەدەنترانسسەرۆيس»، وتلك، PTC Holding, «يستكومترانس»، Atasu Group, «استىق ترانس» جانە Olzha Logistics سياقتى قازاقستاندىق لوگيستيكالىق وپەراتورلار دا جۇمىس ىستەيدى.
كەشە پرەزيدەنت ق. توقايەۆ قازاقستاننىڭ ترانزيتتىك الەۋەتىن سىنعا العان ەدى.
ەلدە كولىك سالاسىن سيفرلاندىرىپ، ىشكى جانە حالىقارالىق تاسىمالدا قاعاز قۇجاتتاردان تولىق باس تارتۋ كوزدەلىپ وتىر.
2027 -جىلدىڭ سوڭىنا دەيىن ەل شەكاراسىنداعى 37 اۆتوموبيل وتكىزۋ پۋنكتىن جاڭعىرتۋ جوسپارلانعان. سونداي-اق پرەزيدەنت تاپسىرما بەرگەن اۆتوجولدار قۇرىلىسى دا قولعا الىندى.
ۆيتسە-ءمينيستردىڭ ايتۋىنشا، مينيسترلىك رەسپۋبليكالىق جانە جەرگىلىكتى ماڭىزى بار بارلىق اۆتوموبيل جولىنا ءبىرىڭعاي ساپا تالاپتارىن ەنگىزەدى. جول ساپاسى جوبانى جوسپارلاۋدان باستاپ، قۇرىلىس جانە جوندەۋ جۇمىستارىنىڭ بارلىق كەزەڭىندە، سونداي-اق نىساندى پايدالانۋعا بەرگەنشە باقىلانادى.
- ءىرى ينفراقۇرىلىمدىق جوبالاردىڭ ءبىرى - ارال-كاسپي اۆتوجولى. ونىڭ قۇرىلىسى بيىل تامىزدا باستالدى. جوبانى 2028 -جىلى اياقتاۋ جوسپارلانعان. ال كوكشەتاۋ- پەتروپاۆل اۆتوجولىنىڭ ۋچاسكەسىندە بيىل دايىندىق جۇمىستارى جۇرگىزىلىپ جاتىر. قۇرىلىس كەلەسى جىلى باستالادى، - دەدى تالعات لاستايەۆ ۇكىمەت وتىرىسىندا.
سونىمەن بىرگە، ەل شەكاراسىنداعى 37 اۆتوموبيل وتكىزۋ پۋنكتىن جاڭعىرتۋ جۇمىستارى جالعاسىپ جاتىر. ولاردى 2027 -جىلدىڭ سوڭىنا دەيىن اياقتاۋ كوزدەلگەن.
كەشە پرەزيدەنت قاسىم-جومارت توقايەۆ قازاقستان حالقىنا جولداۋىندا «كوكشەتاۋ — پەتروپاۆل» تاس جولىن كەڭەيتۋدى تاپسىرعان ەدى.
«ارال -كاسپي» كۇرە جولى ترانسكاسپي ءدالىزىنىڭ قاشىقتىعىن شامامەن 1 مىڭ شاقىرىمعا قىسقارتىپ، جۇك جەتكىزۋ مەرزىمىن ءۇش كۇنگە دەيىن ازايتادى.