قۇجات اسىل تۇقىمدى ءىرى قارا مال جەتكىزۋگە جانە وتاندىق ءسۇتتى مال شارۋاشىلىعىنىڭ گەنەتيكالىق الەۋەتىن ارتتىرۋعا باعىتتالعان.
ق ر اۋىل شارۋاشىلىعى مينيسترلىگى باسپا ءسوز قىزمەتىنىڭ حابارلاۋىنشا، كەلىسىم گەرمانيانىڭ گاننوۆەر قالاسىندا وتكەن EuroTier 2026 حالىقارالىق كورمەسى اياسىندا جاسالدى.
تاراپتار جوعارى ءونىمدى اسىل تۇقىمدى مال جەتكىزۋ، قازاقستانداعى مال باسىنىڭ گەنەتيكالىق ساپاسىن جاقسارتۋ جانە ءسۇت ءوندىرىسىنىڭ ونىمدىلىگىن ارتتىرۋ باعىتىندا ۇزاق مەرزىمدى ارىپتەستىك ورناتۋدى كوزدەپ وتىر.
ىنتىماقتاستىقتىڭ باسىم باعىتتارىنىڭ ءبىرى - قازاقستاندىق اۋىل شارۋاشىلىعى تاۋارىن وندىرۋشىلەر ءۇشىن اسىل تۇقىمدى مالدى ءتيىمدى شارتتارمەن جەتكىزۋ تەتىكتەرىن جەتىلدىرۋ. بۇل رەتتە ساتىپ الىناتىن مالدىڭ قۇنىن وڭتايلاندىرۋ مۇمكىندىكتەرى دە قاراستىرىلادى.
شەتەلدىك اسىل تۇقىمدى ۇيىمدارمەن تىكەلەي ارىپتەستىك ورناتۋ وتاندىق شارۋاشىلىقتاردىڭ ساپالى گەنەتيكالىق قورعا قول جەتكىزۋىنە مۇمكىندىك بەرەدى. سونداي-اق سەلەكتسيالىق-اسىل تۇقىمدىق جۇمىستىڭ تيىمدىلىگىن ارتتىرۋعا جول اشادى.
قازىر ەلىمىزدە 2026-2030-جىلدارعا ارنالعان مال شارۋاشىلىعىن دامىتۋ جونىندەگى كەشەندى جوسپار ىسكە اسىرىلىپ جاتىر. قۇجاتتا اسىل تۇقىمدى مال شارۋاشىلىعىن وركەندەتۋ، اۋىل شارۋاشىلىعى جانۋارلارىنىڭ گەنەتيكالىق الەۋەتىن ارتتىرۋ جانە مال شارۋاشىلىعى ونىمدەرىنىڭ كولەمىن ۇلعايتۋ شارالارى قامتىلعان.
- جوسپار اياسىندا ءسۇتتى مال شارۋاشىلىعىن دامىتۋعا ەرەكشە ءمان بەرىلىپ وتىر. اتاپ ايتقاندا، مال ونىمدىلىگىن ارتتىرۋ، سەلەكتسيالىق جۇمىستىڭ تاسىلدەرىن جەتىلدىرۋ جانە ءتول ءوسىرۋدىڭ زاماناۋي تەحنولوگيالارىن ەنگىزۋ كوزدەلگەن. حالىقارالىق ارىپتەستىكتى كەڭەيتۋ وتاندىق اسىل تۇقىمدى مال بازاسىن دامىتۋعا جانە قازاقستاننىڭ ءسۇتتى مال شارۋاشىلىعى سالاسىنداعى باسەكەگە قابىلەتتىلىگىن ارتتىرۋعا ىقپال ەتەدى،-دەلىنگەن حابارلامادا.
وسىعان دەيىن اۋستراليادان قازاقستانعا 250 اسىل تۇقىمدى ءىرى قارا جەتكىزىلەتىنى تۋرالى جازدىق.