مينيسترلىكتىڭ باسپا ءسوز قىزمەتىنىڭ حابارلاۋىنشا، بەكىتىلگەن ليميتتەرگە سايكەس، قىزىلوردا وبلىسىنا - 3,2 ميلليارد تەكشە مەتر، تۇركىستان وبلىسىنا - 3,8 ميلليارد تەكشە مەتر، ال جامبىل وبلىسىنا 900 ميلليون تەكشە مەتر سۋ كولەمى قاراستىرىلعان.
ەسكە سالا كەتەيىك، بىلتىر پرەمەر-ءمينيستردىڭ ورىنباسارى قانات بوزىمبايەۆتىڭ توراعالىعىمەن ەلىمىزدىڭ وڭتۇستىك وڭىرلەرىندە ۆەگەتاتسيا كەزەڭىنە دايىندىق ماسەلەلەرى بويىنشا كوشپەلى كەڭەستەر وتكەن بولاتىن.
شارۋالارمەن وتكەن كەزدەسۋلەردە سۋ تۇتىنۋ ليميتتەرىن قاتاڭ ساقتاۋ، ىلعال كوپ قاجەت ەتەتىن داقىلداردىڭ ەگىس كولەمىن قىسقارتۋ، ەگىس قۇرىلىمىن ءارتاراپتاندىرۋ جانە سۋ ۇنەمدەۋ تەحنولوگيالارىن مىندەتتى تۇردە ەنگىزۋ قاجەتتىگى ەرەكشە اتاپ ءوتىلدى.
ليميتتەردىڭ ساقتالۋىن قامتاماسىز ەتۋ ماقساتىندا ەگىس قۇرىلىمىن ءارتاراپتاندىرۋ جانە ىلعال كوپ قاجەت ەتەتىن داقىلدار كولەمىن ازايتۋ شارالارى كوزدەلگەن. سونىمەن قاتار سۋارمالى سۋدى پايدالانۋ قاعيدالارى بەكىتىلىپ، وسىرىلەتىن داقىلداردى ءوز بەتىنشە ىلعال كوپ قاجەت ەتەتىن تۇرلەرگە اۋىستىرعان جانە ءتيىستى كەلىسىمشارتسىز سۋ پايدالانعان اۋىل شارۋاشىلىعى تاۋار وندىرۋشىلەرىنە قاتىستى سانكتسيالار ەنگىزىلگەن.
2026 -جىلعى ۆەگەتاتسيا كەزەڭىندە تۇركىستان وبلىسىندا كۇرىش ەگىسىنىڭ كولەمى 3,5 مىڭ گەكتاردان اسپاۋى ءتيىس.
سونداي-اق «دوستىق» مەملەكەتارالىق كانالى بويىندا كۇرىش ەگۋگە تىيىم سالىنعان. كۇرىشتى تەك «قىزىلقۇم» كانالى بويىندا جانە سۋ ۇنەمدەۋ تەحنولوگيالارىن قولدانۋ ارقىلى وسىرۋگە رۇقسات ەتىلەدى.
قىزىلوردا وبلىسىندا كۇرىش ەگىسىنىڭ كولەمىن 70 مىڭ گەكتار دەڭگەيىندە ساقتاۋ جوسپارلانعان. ال الماتى وبلىسىندا بۇل كورسەتكىش 5,8 مىڭ گەكتاردان، جەتىسۋ وبلىسىندا 1 مىڭ گەكتاردان اسپاۋى ءتيىس.
- ليميتتەر قازگيدرومەتتىڭ گيدرولوگيالىق بولجامدارىنا، جىل بويى تۇسكەن جاۋىن-شاشىن كولەمىنە جانە ترانسشەكارالىق وزەندەردىڭ كۇتىلەتىن سۋ دەڭگەيىنە سۇيەنە وتىرىپ ەسەپتەلدى. جالپى العاندا، 2026 -جىلعى ۆەگەتاتسيا كەزەڭى تۇراقتى باستالدى. قازىرگى ۋاقىتتا مينيسترلىك ماماندارى، باسسەيندىك سۋ ينسپەكتسيالارى جانە «قازسۋشار» فيليالدارى بەكىتىلگەن سۋ ليميتتەرىنىڭ ساقتالۋىن جانە ەگىس قۇرىلىمىن باقىلاۋدا ۇستاپ وتىر، - دەدى سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى نۇرلان الدامجاروۆ.