Saudi International Falcons and Hunting Exhibition 2026 كورمەسىنە الەمنىڭ 47 ەلىنەن 1446دان استام كومپانيا مەن برەند، سونداي-اق 44 مەملەكەتتىك مەكەمە قاتىستى. اۋماعى 200 مىڭ شارشى مەتر بولاتىن اۋقىمدى شارا ەر-ريادتىڭ سولتۇستىگىندەگى مالحام اۋدانىندا ورنالاسقان ەر-رياد كورمە جانە كونگرەسس ورتالىعىندا ۇيىمداستىرىلدى.
كورمەنى ساۋد ارابياسىنىڭ ۇلتتىق سۇڭقارلار ورتالىعى ۇيىمداستىردى. شارا اياسىندا سۇڭقارشىلىق پەن اڭشىلىقتان بولەك، اشىق اسپان استىنداعى دەمالىس تۇرلەرى، مادەني باعدارلامالار، ءداستۇرلى قولونەر جانە زاماناۋي تەحنولوگيالار تانىستىرىلدى.
سۇڭقارشىلىق اراب تۇبەگىندە عاسىرلار بويى قالىپتاسقان ءداستۇر سانالادى. بۇگىندە ول ساۋد ارابياسىنىڭ مادەني مۇراسىنىڭ ماڭىزدى بولىگى رەتىندە ساقتالىپ كەلەدى. كورمە سۇڭقارشىلاردى، ينۆەستورلاردى، كاسىپكەرلەر مەن وتباسىلاردى ءبىر الاڭعا جيناپ، ساۋدا-ساتتىق، جارىستار جانە ءداستۇرلى ونەردى كورسەتۋگە مۇمكىندىك بەردى.
ۇلتتىق سۇڭقارلار ورتالىعىنىڭ باس اتقارۋشى ديرەكتورى تالال ءال-ءشامايسيدىڭ ايتۋىنشا، كورمەگە كەلۋشىلەر سانى مەن باعدارلامالاردىڭ اۋقىمى سۇڭقارشىلىق ءداستۇرىن ساقتاۋ جانە ونىڭ قىر-سىرىن جاس ۇرپاققا جەتكىزۋگە دەگەن قىزىعۋشىلىقتىڭ جوعارى ەكەنىن كورسەتتى.
كورمە باعدارلاماسىندا بالالارعا ارنالعان ءىس-شارالار، سۇڭقارشىلىق تاريحىنا ارنالعان مۋزەي، تاكسيدەرميالىق ەكسپوزيتسيالار، ءداستۇرلى اڭشىلىق تۇرلەرى، بالىق اۋلاۋ، جاياۋ ساياحات، سافاري، ات جانە تۇيە ءمىنۋ، جول تالعامايتىن كولىكتەرمەن ساياحاتتاۋ جانە اتۋ سپورتتارى قامتىلدى. سونىمەن قاتار تاريح، پوەزيا، ءداستۇرلى قولونەر، تابيعات اياسىنداعى ساياحات، كولىك دايىنداۋ جانە قاۋىپسىزدىك تاقىرىپتارىندا شەبەرلىك ساباقتارى مەن پىكىرتالاستار ۇيىمداستىرىلدى.
كورمەنىڭ نەگىزگى شارالارىنىڭ ءبىرى - التى كۇنگە سوزىلعان Al-Melwah سۇڭقارلار جارىسى بولدى. 12 كەزەڭنەن تۇرعان جارىستا جالپى جۇلدە قورى 723 مىڭ ساۋد ريالىن (شامامەن 193 مىڭ دوللار) قۇرادى. ءار كەزەڭنىڭ ۇزدىك بەس قاتىسۋشىسىنا جۇلدە بەرىلدى.
جارىس بارىسىندا جاس سۇڭقارلار 200 مەتر قاشىقتىقتا باق سىنادى. ولار التى سانات بويىنشا ونەر كورسەتىپ، وزدەرىنىڭ جىلدامدىعىمەن قاتار، باپكەرلەرىنىڭ دايىندىعىن دا كورسەتتى.
بيىل كورمە اياسىندا ەكىنشى رەت موڭعوليا سۇڭقارلارىنىڭ اۋكتسيونى ۇيىمداستىرىلدى. اۋكسيوندا جاس سۇڭقار 1,4 ميلليون ساۋد ريالىنا (شامامەن 373 مىڭ دوللار) ساتىلىپ، وسى اۋكسيون تاريحىنداعى ەڭ جوعارى باعا بويىنشا رەكورد ورناتتى. اۋكسيونداعى جالپى ساۋدا كولەمى 7 ميلليون ساۋد ريالىنان (1,87 ميلليون دوللار) استى.
كورمەنىڭ اڭشىلىق قارۋلارى، وق-دارىلەر مەن كەرەك-جاراقتار ايماعىندا 181 دەن استام حالىقارالىق برەندتىڭ 5 مىڭنان استام ءونىمى ۇسىنىلدى. ولاردىڭ قاتارىندا اڭشىلىق جانە سپورتتىق اتىس قارۋلارى، پنيەۆماتيكالىق قارۋلار، وق-دارىلەر، قاۋىپسىزدىك قۇرالدارى جانە قارۋدى كۇتىپ ۇستاۋعا ارنالعان جابدىقتار بولدى.
ۇيىمداستىرۋشىلار شارا بارىسىندا يۋنەسكو-نىڭ بۇكىلالەمدىك مۇرالار تىزىمىنە ەنگەن ديرياداعى ات-تۋرايف تاريحي اۋدانىن دا تانىستىردى. بۇعان دەيىن كورمە اياسىندا 2024-جىلى ءال-احسا وازيسى، ال 2025-جىلى ءناجرانداعى حيما مادەني ايماعى تانىستىرىلعان بولاتىن.
ۇلتتىق سۇڭقارلار ورتالىعى كەلەسى جىلعى كورمەگە دايىندىقتى جەكسەنبى كۇنى باستايتىنىن مالىمدەدى.
سونىمەن قاتار جەرگىلىكتى جەردە اۋلانعان سۇڭقارلاردىڭ اۋكسيونى 30-قاراشاعا دەيىن جالعاسادى. ونىڭ قورىتىندىسى بويىنشا 17-30 قاراشا ارالىعىندا وتەتىن كورول ابدۋلازيز اتىنداعى سۇڭقارشىلىق فەستيۆالىنە دايىندىق جۇرگىزىلەدى.
فەستيۆالگە ساۋد ارابياسىنان جانە شەتەلدەن كەلگەن سۇڭقارشىلار قاتىسادى. باعدارلامادا Al-Melwah جىلدامدىق جارىسى جانە Mazayen بايقاۋى وتەدى. سوڭعىسىندا سۇڭقارلاردىڭ سىرتقى كەلبەتى مەن ەرەكشەلىكتەرى باعالانادى.