قازاقستاننىڭ تۇرىكمەنستانداعى مادەنيەت كۇندەرى باستالدى

استانا. قازاقپارات - 7-10-قازان كۇندەرى اشحاباد قالاسىندا وتەتىن قازاقستان رەسپۋبليكاسىنىڭ تۇرىكمەنستانداعى مادەنيەت كۇندەرى اياسىندا ءبىرقاتار ءىس-شارالار ۇيىمداستىرىلادى، دەپ حابارلايدى ق ر مادەنيەت جانە اقپارات مينيسترلىگىنىڭ باسپا ءسوز قىزمەتى.

اشحاباد تۇرعىندارى مەن قوناقتارى وسى كۇندەرى قازاق كينەماتوگرافياسىمەن، مۋزىكا ونەرى جانە ۇلتتىق داستۇرلەرىمەن تەرەڭ تانىسا الادى.

قازاقستان كينوسى كۇندەرىنىڭ اشىلۋى رەجيسسەر ا. ساتايەۆتىڭ قازاق حاندارى تۋرالى سىر شەرتەتىن «ۇلى دالا تاڭى» اتتى تاريحي تۋىندىسىمەن باستالادى. سونىمەن قاتار، تۇرىكمەن جۇرتشىلىعىنا «پاراليمپياداشى» فيلمى دا جول تارتادى.

تۇرىكمەنستان مەملەكەتتىك مادەني ورتالىعىنىڭ مۋكاموۆ سارايىندا قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ «سارىارقا» اتتى گاسترولدىك كونسەرتى وتەدى.

«تۇرىكمەنستان» كينوكونتسەرت زالىندا روزا باعلانوۆا اتىنداعى «قازاق كونسەرت» مەملەكەتتىك اكادەميالىق كونسەرتتىك ۇيىمىنىڭ «SazSoul: شەكاراسىز اۋەندەر» اتتى گاسترولدىك كونسەرتى ۇيىمداستىرىلادى.

نەگىزگى ءىس-شارا 9-قازان كۇنى ساعات 19:00 دە تۇرىكمەنستان مەملەكەتتىك مادەني ورتالىعىنىڭ مۋكاموۆ سارايىندا جوسپارلانعان. بۇل كۇنى ەكى ەل مينيسترلەرىنىڭ قاتىسۋىمەن قازاقستان رەسپۋبليكاسىنىڭ تۇرىكمەنستانداعى مادەنيەت كۇندەرىنىڭ جابىلۋ سالتاناتى اياسىندا قازاقستاندىق ونەر مايتالماندارىنىڭ قاتىسۋىمەن گالا-كونسەرت وتەدى. اتالعان كونسەرتتە قازاقستاننىڭ حالىق ءارتىسى رامازان ستامعازيەۆ، قازاقستاننىڭ ەڭبەك سىڭىرگەن قايراتكەرى الىشەر كارىموۆ، «دارىن» مەملەكەتتىك جاستار سىيلىعىنىڭ لاۋرەاتتارى: راسۋل جارماعامبەتوۆ، ابىلاي تىلەپبەرگەن، تاڭات سادەنوۆ جانە باسقالارى ونەر كورسەتەدى.

ۇلى اقىن اباي قۇنانبايەۆ ەسكەرتكىشىنىڭ سالتاناتتى اشىلۋ ءراسىمى 10-قازاندا اشحاباد قالاسىنداعى «لاچىن» ساياباعىندا وتەدى.

اتالعان شاراعا جەرگىلىكتى زيالى قاۋىم، عالىمدار، جازۋشىلار، ديپلوماتيالىق كورپۋس، شىعارماشىلىق وداقتار، قازاق دياسپوراسىنىڭ وكىلدەرى قاتىسادى.

ايتا كەتەيىك، قازاقستان رەسپۋبليكاسى مادەنيەت جانە اقپارات مينيسترلىگى مەن تۇرىكمەنستان مادەنيەت مينيسترلىگىنىڭ بىرىگىپ ۇيىمداستىرۋىمەن قازاقستان رەسپۋبليكاسىنداعى تۇرىكمەنستاننىڭ مادەنيەت كۇندەرى 2024-جىلى ماۋسىم ايىندا استانا قالاسىندا وتكەن بولاتىن.