2026 -جىلعى اقپاندا قازاقستانعا رەسمي ساپارمەن گرۋزيا ىشكى ىستەر مينيسترلىگىنىڭ دەلەگاتسياسى كەلدى. ساپار اياسىندا ق ر ىشكى ىستەر ءمينيسترى ەرجان سادەنوۆ گرۋزيالىق ارىپتەسى گەلا گەلادزەمەن كەزدەستى.
كەلىسسوزدەر بارىسىندا تاراپتار ىنتىماقتاستىقتىڭ وزەكتى ماسەلەلەرىن تالقىلاپ، قىلمىسپەن كۇرەستەگى ۇيلەستىرۋ جۇمىستارى مەن تاجىريبە الماسۋعا ەرەكشە نازار اۋداردى. ساپار ەكى ەلدىڭ پوليتسيا ۆەدومستۆولارى اراسىنداعى ارىپتەستىكتى ودان ءارى نىعايتۋعا باعىتتالدى.
ىنتىماقتاستىق ناتيجەسىندە گرۋزيا تاراپى قازاقستاننىڭ سۇراۋى بويىنشا حالىقارالىق ىزدەۋدە جۇرگەن بەس ادامدى ۇستادى. ولاردىڭ تورتەۋى الاياقتىق قىلمىستارى ءۇشىن، بىرەۋى ەسىرتكى قۇرالدارىنىڭ زاڭسىز اينالىمى بويىنشا ىزدەۋدە بولعان.
سونىمەن قاتار باتۋمي قالاسىندا 37 جاستاعى قازاقستان ازاماتى قولعا ءتۇستى. ول 2014-2020 -جىلدار ارالىعىندا الماتى قالاسىندا ۇيىمداسقان توپ قۇرامىندا كوممەرتسيالىق ۇيىم اتىن جامىلىپ، قارجى پيراميداسىن قۇرعان.
تەرگەۋ دەرەكتەرىنە سايكەس، ازاماتتاردان ينۆەستيتسيا رەتىندە قاراجات تارتىلعانىمەن، ناقتى تابىس بولماعان. تولەمدەر جاڭا سالىمشىلاردىڭ ەسەبىنەن جۇرگىزىلگەن.
زاڭسىز ارەكەتتەر سالدارىنان 1451 ازامات زارداپ شەگىپ، كەلتىرىلگەن جالپى شىعىن كولەمى 10,4 ميلليارد تەڭگەدەن اسقان.
- بۇل باعىتتاعى جۇمىس جالعاساتىن بولادى، - دەپ مالىمدەدى پوليتسيا وكىلدەرى.
ايتا كەتەيىك، الاياقتىق جاساعان قازاقستان ازاماتى رەسەيدەن ەكستراديتسيالاندى.