قازاقستاننىڭ نەلىكتەن اۋعانستانمەن قارىم-قاتىناس ورناتقانىن تۇسىنەمىز – ا ق ش ەلشىسى
قازاقستانداعى ا ق ش ەلشىسى دەنيەل روزەنبليۋم جۋرناليستەرمەن وتكەن دوڭگەلەك ۇستەلدە قازاقستاننىڭ قازىرگى اۋعانستان بيلىگىمەن قارىم-قاتىناسى جونىندە باياندادى، دەپ حابارلايدى قازاقپارات ءتىلشىسى.
دوڭگەلەك ۇستەلدە تىلشىلەر قازاقستان مەن اۋعانستاننىڭ قازىرگى قارىم-قاتىناسىنا ا ق ش قالاي قارايدى دەگەن سۇراق قويدى.
«اۋعانستان تاقىرىبى جانە ونىڭ ايماقتاعى ورنى - ءبىز جەرگىلىكتى سەرىكتەستەرمەن ءجيى تالقىلايتىن نارسە. بۇعان دەيىن ايتقانىمداي، قازاقستاننىڭ بارلىق كورشىلەرىمەن جاقسى قارىم-قاتىناستى ساقتاۋ قاجەتتىلىگى اۋعانستانعا دا قاتىستى. ءبىز قازاقستانعا نەلىكتەن اۋعانستانمەن ءوزارا جەمىستى قارىم-قاتىناس جاساۋى قاجەتىن جاقسى ءتۇسىنىپ وتىرمىز»، - دەپ جاۋاپ بەردى ديپلومات.
دەگەنمەن، ا ق ش ەلشىسى قازاقستان ۇكىمەتىمەن تاليباندارمەن قارىم-قاتىناس تۋرالى بەلگىلى ءبىر ۋاعدالاستىقتار بار ەكەنىن ايتتى.
«بۇل ۋاعدالاستىقتار - تەك ا ق ش پەن قازاقستان اراسىنداعى ەمەس، بۇكىل حالىقارالىق قوعامداستىقتا ساقتالاتىن قاعيداتتار. ياعني، اۋعانستاننىڭ قازىرگى بيلىگى بەلگىلى ءبىر شارتتاردى ورىندامايىنشا حالىقارالىق دەڭگەيدە مويىندالمايدى. اسىرەسە ءۇش نەگىزگى شارت - ەلدەگى تەرروريستىك توپتارعا قاتىستى باتىل ارەكەتتەر، ەلدەگى بارلىق توپتاردى قولدايتىن، فاۆوريتيزم مەن ارتىقشىلىق قاعيداتتارىنا نەگىزدەلمەگەن ينكليۋزيۆتى ۇكىمەت قۇرۋ، اۋعانستاننىڭ بارلىق ازاماتتارىنا، اتاپ ايتقاندا ايەلدەر مەن قىزداردىڭ قۇقىقتارىن قورعاۋ جانە ولارعا ءبىلىم الۋ سياقتى نەگىزگى قۇقىقتاردى بەرۋ»، - دەپ ءتۇسىندىردى د. روزەنبليۋم.
بۇعان دەيىن دەنيەل روزەنبليۋم ا ق ش پرەزيدەنتى دجو بايدەننىڭ ورتالىق ازياعا ساپارى جونىندە سۇراقتارعا جاۋاپ بەردى.
ورتالىق ازيادا قازاقستان ازاماتتارىنا عانا ا ق ش- تىڭ 10 جىلدىق ميگراتسيالىق ەمەس ۆيزاسى بەرىلەدى. ەلشى ا ق ش ۆيزاسىن بەرۋدى جەڭىلدەتۋگە مۇددەلى ەكەندەرىن ايتتى.
سونداي-اق، ا ق ش ەلشىسى شەت ەلدەن اقشا الاتىن قازاقستاندىقتاردىڭ تىزىمىنە قاتىستى پىكىر ءبىلدىردى.