قازاقستاننىڭ «ەلەكتروندى ۇكىمەتىن» افريكا ەلدەرى كوشىرىپ الىپ جاتىر

استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ سەناتتىڭ جالپى وتىرىسىندا قازاقستاننىڭ GovTech تەحنولوگياسىنداعى جەتىستىكتەرىن اتادى.

«GovTech تەحنولوگياسىنداعى سيفرلىق ونىمدەرىمىز حالىقارالىق دەڭگەيگە شىعىپ جاتىر. 2023-2024-جىلدارى ەكسپورت كولەمى 1,36 ميلليارد تەڭگە بولدى. قازاقستاننىڭ «ەلەكتروندىق ۇكىمەت» سالاسىنداعى وزىق شەشىمدەرىن تاجىكستان، توگو جانە سەررا-لەونە سياقتى ەلدەر پايدالانا باستادى»، - دەدى جاسلان ماديەۆ.

مينيستر قازاقستاندا ءساتتى ىسكە اسقان «ەلەكتروندىق ۇكىمەت» جوباسى وزگە ەلدەرگە ەنگىزىلگەنىن اتاپ ءوتتى.

«ءبىز ەكسپورتتايتىن نەگىزگى كومپونەتتەرگە Smart Data Ukimet ،Smart Bridge جانە GOV. KZ قۇرالدارى كىرەدى. وسىلايشا، قازاقستان سيفرلاندىرۋ سالاسىنداعى باسەكەگە قابىلەتتى ەكەنىن راستاپ، GovTech شەشىمدەرىنە جاڭا نارىق اشىپ وتىر»، - دەدى ۆەدومستۆو باسشىسى.

وسىعان دەيىن قازاقستاننىڭ IT- قىزمەتتەر ەكسپورتى قارقىندى ءوسىپ كەلە جاتقانى تۋرالى حابارلادىق. 2023-جىلى ەكسپورت كولەمى 529 ميلليون دوللارعا جەتسە، 2024-جىلدىڭ ءبىرىنشى جارتىجىلدىعىندا 306 ميلليون دوللار بولدى.