جاڭا كولىك ساتىپ الۋ ءۇشىن قانشا جىل اقشا جيناۋ قاجەت
ەگەر نەسيە الماي، تەمىر تۇلپاردى قولما- قول اقشاعا ساتىپ الامىن دەسەڭىز، وندا ەلىمىزدەگى ورتاشا ايلىقپەن كەيبىر كولىكتەرگە قول جەتكىزۋ ءۇشىن 240 جىل قاجەت بولادى ەكەن، دەپ حابارلايدى El.kz اقپارات اگەنتتىگى.
قازاقستاندا اۆتوكولىك - كوپ قاراجاتتى تالاپ ەتەتىن دۇنيە. بۇگىنگىدەي باعا ۇشىپ تۇرعان زاماندا تەمىر تۇلپاردى كەز كەلگەن قازاقستاندىق ساتىپ الا المايدى. بۇعان دەيىن بەرىلگەن جەڭىلدەتىلگەن نەسيە دە توقتاپ قالدى. ونىڭ ءارى قارايعى تاعدىرى بەلگىسىز.
ءبىراق ودان كولىك العىسى كەلەتىندەر سانى ازايعان جوق. سوندىقتان ءبىز بۇگىن اۆتوكولىك ساتىپ الۋ نەمەسە ونى بانكتىڭ قازىرگى شارتتارىمەن نەسيەگە الۋ ءۇشىن قانشا قاراجات جانە قانشا جىل قاجەت ەكەنىن ساناپ كوردىك.
جاڭا كولىك باعاسى
Lada Granta
الدىمەن قازاقستاندىق اۆتوسالوندارداعى بيۋدجەتتىك باعاداعى كولىكتى الايىق. ايتالىق، جاڭا Lada Granta كولىگى، ونىڭ سالونداعى باعاسى شامامەن 6 ميلليون تەڭگە تۇرادى. ال ۇلتتىق ستاتيستيكا بيۋروسىنىڭ مالىمەتىنشە، ەلىمىزدە ءۇشىنشى توقسانداعى ورتاشا جالاقى 350542 تەڭگە بولدى. دەگەنمەن ەرەسەك ادام بۇل تابىستىڭ ءبىر بولىگىن عانا جيناي الادى - ول ايىنا شامامەن 10-15 پايىز.
بۇل جاعدايدا تابىستىڭ 15 پايىزى 52 مىڭ تەڭگەگە تەڭ. ياعني جىلىنا 624000 تەڭگە جينايسىز دەگەن ءسوز ( تىك دەپوزيتكە سالساڭىز - 674700 تەڭگە). وندا سىزگە شامامەن 9 جارىم جىل جيناۋ قاجەت. ءتىپتى ايىنا 100 مىڭ تەڭگەدەن جيناعاننىڭ وزىندە 5 جىلداي ۋاقىت كەرەك. مۇنىڭ ءوزى از ۋاقىت ەمەس.
Chery Tiggo
سوڭعى ۋاقىتتا ەلىمىزدە قىتايدا وندىرىلەتىن كولىكتەر سانى كوبەيدى. سىرت كەلبەتى تارتىمدى، سالىستىرمالى تۇردە باعاسى قولجەتىمدى كورىنۋى مۇمكىن. سول قىتايلىق كولىكتەردىڭ اراسىندا Chery Tiggo ماركاسىنا سۇرانىس جوعارى ەكەن. مۇنداي كولىكتەردىڭ باعاسى 8 ميلليون تەڭگەدەن باستاپ 16 ميلليون تەڭگەگە دەيىن جالعاسادى. ءبىز ورتا ەسەپپەن 12 ميلليون تەڭگە دەپ الدىق.
ياعني ورتاشا جالاقىنىڭ 15 پروتسەنتىن جيناي وتىرىپ، اتالعان كولىكتى قولما-قول اقشاعا ساتىپ الۋ ءۇشىن 20 -جىلداي قاجەت.
Zeekr
قازاقستاندا قازىرگى تاڭدا تاعى ءبىر تانىمال ءارى دەڭگەيى جوعارى كولىك - Zeekr. قىتايلىق ماركالى كولىكتەردىڭ مودەلىنە، جايلىلىعىنا قاراي باعاسى دا ءارتۇرلى.
ءبىز جۇرت كوپ سۇرايتىن Zeekr 001 كولىگىنىڭ ورتاشا باعاسىن ەسەپتەدىك - شامامەن 25 ميلليون تەڭگە. بۇل كولىك ماركاسىن قولما- قول ساتىپ الۋ ءۇشىن ايىنا 52 مىڭ تەڭگەنى شوتقا سالا وتىرىپ 40 جىلداي اقشا جيناۋعا تۋرا كەلەدى.
«گەلەندۆاگەن»
كوپشىلىكتىڭ ارمانى - Mercedes-Benz G- Class ماركالى «گەلەندۆاگەن» كولىگىنە توقتالايىق. وندا 585 اتتىڭ كۇشى بار. نەبارى 4,5 سەكۋندتا 100 ك م/ساع دەيىن ۇدەتە الادى.
Mercedes-Benz G 63 AMG سوڭعى ۇلگىدەگى بۇل كولىكتەردىڭ قۇنى 150 ميلليون تەڭگەدەن كەم تۇرمايدى. ءبىزدىڭ ەلدەگى ورتاشا ايلىقتىڭ 15 پايىزىن شوتقا اۋدارا وتىرىپ مۇنداي كولىككە تەك 240 -جىلدا قاراجات جينالادى ەكەن.
اۆتونەسيەلەۋ
ايلىعى شايلىعىنا جەتپەي وتىرعان قازاقستاندىقتار ءۇشىن كولىكتى قولما-قول اقشاعا ساتىپ الۋ قول جەتپەس ارمانعا اينالدى. سوندىقتان كوپشىلىك، بانكتىڭ جوعارى پايىز مولشەرىنە دە قاراماستان، تەمىر تۇلپاردى نەسيەگە الۋعا ءماجبۇر. ونىڭ وزىندە العاشقى جارناسىن قۇيۋعا قاراجات تاعى كەرەك - بۇل كەي بانكتەردە 5 تەن 35 پايىزعا دەيىن.
ايتالىق، بانكتە العاشقى جارنا مولشەرى 10 پايىزدى قۇراسا، وندا 6 ميلليون تەڭگەلىك كولىكتى الۋ ءۇشىن 600 مىڭ تەڭگە قاجەت. سونىڭ ءوزىن ايىنا 52 مىڭ تەڭگەدەن ءبىر جىل جينايسىز. ال 15 پايىزدىق دەپوزيتكە سالساڭىز، وندا مەرزىم ءسال ازايادى – 11 اي.
ەگەر بانك العاشقى جارنانى تالاپ ەتپەسە، بۇل كولىك قۇنى ارزانداۋ تۇسەدى دەگەن ءسوز ەمەس، ەسىڭىزدە بولسىن، ەشبىر بانك ءوز ەسەسىن جىبەرمەيدى - ول تەك سول قاراجاتتى اي سايىنعى تولەمگە قوسىپ بەرەدى. ودان قالدى مەملەكەتتىك باج، كولىك ءنومىرى سەكىلدى از-ماز شىعىندى دا ەسكەرىڭىز.
- سۋ جاڭا كولىك مىنۋگە دەگەن قۇلشىنىسىڭىز قاشىپ كەتپەدى دەگەن ويدامىز.