قازاقستاننىڭ حالىق جازۋشىسى، اسا كورنەكتى اقىن يسرايل ساپارباي ومىردەن وزدى

استانا. KAZINFORM - قازاقستاننىڭ حالىق جازۋشىسى، اسا كورنەكتى ۇلت اقىنى، تالانتتى سازگەر يسرايل ساپارباي 85 جاسىنا قاراعان شاعىندا قايتىس بولدى.

بۇل تۋرالى قازاقستاندىق اقىن، جۋرناليست، ەتنوگراف قاسىمحان بەگمانوۆ حابارلادى.

- بۇگىن تاڭنان سۋىق حابار جەتتى. تاڭعى ساعات ءتورت شاماسىندا 85 جاسىنا قاراعان شاعىندا قازاقستاننىڭ حالىق جازۋشىسى، تاۋەلسىز «پلاتينالى تارلان» سىيلىعىنىڭ لاۋرەاتى، اسا كورنەكتى ۇلت اقىنى، بەلگىلى دراماتۋرگ، تالانتتى سازگەر يسرايل ساپارباي اعامىز دۇنيەدەن ءوتتى. ءيا، ساعات ءتىلى قاسيەتتى جۇماعا قاراي اۋعاندا اقىننىڭ سوڭعى دەمى ءۇزىلدى. ۇلى اقىننىڭ قاسكەلەڭدەگى قارا شاڭىراعىندا، بالا- شاعاسىنىڭ الدىندا اۋىر ناۋقاستان قايتقانى جايلى حاباردى ماعان اعامىزدىڭ ۇلى نۇرلان يسرايل ۇلى باۋىرىم حابارلادى. قازاقستان جازۋشىلار وداعىنىڭ توراعاسىمەن بىرگە اعامىز قاتتى اۋىرىپ جاتقاندا، اۋرۋحاناعا بارىپ، ۇنەمى حابار الىپ تۇردىق. سوڭعى بارعانىمىزدا كۇبىرلەپ، اقىرىن ءوز ولەڭىن وقىپ جاتتى…، - دەپ جازدى ول الەۋمەتتىك جەلىدەگى پاراقشاسىندا.

قاسىمحان بەگمانوۆتىڭ سوزىنشە، اسا كورنەكتى ليريك اقىن يسرايل ساپاربايدىڭ ارتىندا قانشاما اندەرى، لاعىلداي، مولدىرەگەن جاقۇتتاي پوەزياسى، ماڭگى ولمەس سىرلى، مۇڭلى جىرلارى قالدى.

- جازعان پەسالارى م. اۋەزوۆ تەاترىنان باستاپ ەلىمىزدىڭ بىرنەشە تەاترلارىندا ساحنالانىپ، وتتى جىرلارى ءوز وقىرماندارىن تاۋىپ، اسەم اندەرى ميلليونداردىڭ جۇرەگىنە جەتىپ، قازاق اسپانىندا قالىقتاپ تۇر. جانىڭىز ءجانناتتا بولسىن، اسىل اعا، جان اعا، - دەپ جازدى بەگمانوۆ.

اۆتور

اينۇر تۋماكبايەۆا