قازاقستاننىڭ عىلىمي كادرلارى سينگاپۋردا بىلىمدەرىن جەتىلدىرەدى
الماتى. KAZINFORM - عىلىمعا بولىنەتىن قارجى ۇدايى ارتىپ كەلەدى. بىلىكتى كادرلار ازىرلەۋگە ارنالعان گرانت سانى سوڭعى جىلدارى ءبىر جارىم ەسە كوبەيدى. بۇل تۋرالى پرەزيدەنت قاسىم-جومارت توقايەۆ عالىمدارمەن كەزدەسۋىندە ايتتى.
«قازاقستاندا الەمنىڭ بەدەلدى 12 جوعارى وقۋ ورنىنىڭ فيليالى جۇمىس ىستەپ تۇر. كوپ ۇزاماي تاعى بىرنەشەۋى اشىلادى. زەرتتەۋ جۇمىستارىمەن اينالىساتىن ۋنيۆەرسيتەتتەر كوبەيۋدە. تەحنولوگيا پاركتەرى جانە ينجينيرينگ ورتالىقتارى اشىلىپ جاتىر. جىل سايىن 500 عالىم شەتەلدە تاعىلىمدامادان وتەدى. مينيسترلىك جاس عالىمدارعا مىڭداعان گرانت ءبولىپ جاتىر. مۇنىڭ ءبارى عىلىمدى دامىتۋعا وڭ ىقپالىن تيگىزەدى دەپ ويلايمىن»، - دەدى پرەزيدەنت.
مەملەكەت باسشىسى شەتەلگە ساپارلارى كەزىندە عالىمدارمەن ءجيى كەزدەسەتىنىن، ولاردى قازاق عالىمدارىمەن تىعىز بايلانىس ورناتۋعا شاقىراتىنىن ايتتى.
«وتكەن اپتادا سينگاپۋرلىق عالىمدارمەن جانە ونداعى جوعارى وقۋ ورىندارىنىڭ رەكتورلارىمەن ارنايى جۇزدەستىم. ەندى سينگاپۋردا عىلىمي كادرلارىمىزدى وقىتاتىن بولدىق. جالپى، سينگاپۋر سياقتى ەكونوميكاسى وزىق ەلدەردەن كوپ نارسە ۇيرەنۋگە بولادى.
پوستيندۋستريالدى داۋىردە الەمگە اشىق بولۋ جانە يننوۆاتسياعا ۇمتىلۋ كەز كەلگەن ەلدىڭ تابىسقا جەتۋى ءۇشىن اسا ماڭىزدى فاكتور سانالادى. سوندىقتان ۇزدىك حالىقارالىق تاجىريبەنى مۇقيات زەرتتەيمىز جانە ودان ۇلگى الامىز. وزىق تەحنولوگيالار مەن يدەيالاردى ەنگىزەمىز»، - دەدى قاسىم-جومارت توقايەۆ.
پرەزيدەنت تەڭگەرىمدى ءارى سىندارلى سىرتقى ساياسات جۇرگىزە وتىرىپ، بارلىق مۇددەلى مەملەكەتپەن تەڭقۇقىقتى جانە ءوزارا ءتيىمدى قاتىناس ورناتاتىنىمىزدى ايتتى.
«ءبىز سەرىكتەستىككە باسا ءمان بەرەمىز. ارامىزدى اجىراتىپ، سەنىمگە سىزات تۇسىرەتىن قابىرعا تۇرعىزۋ ءۇشىن ەمەس، ىنتىماقتاستىق پەن ءوزارا تۇسىنىستىككە باستايتىن كوپىر سالۋ ماقساتىندا جۇيەلى جۇمىس ىستەيمىز. الايدا قازىرگى ۋاقىتتا جانجالدار مەن سوعىس ءورتى باسىلماي تۇرعان ايماقتاردا مۇنداي سىندارلى ساياسات جۇرگىزۋ وتە اۋىر. ول ءۇشىن تاباندىلىق پەن سابىرلىق كەرەك.
ديپلوماتيا مەن ديالوگ جولىن ۇستانا وتىرىپ، ءبىز ۇيلەسىمدى ءارى ادىلەتتى حالىقارالىق قۇرىلىم قۇرۋدى جاقتايمىز. ءبىز ەل ىشىندە جان-جاقتى رەفورمالاردى جۇزەگە اسىرىپ جاتىرمىز. سونداي-اق قانداي دا ءبىر ساياسي جاعدايدىڭ ىعىنا جىعىلماي نەمەسە بوتەن پىكىرلەرگە ەرمەي، ۇلتتىق مۇددەمىزدى كوزدەيتىن تەڭگەرىمدى سىرتقى ساياسات جۇرگىزىپ وتىرمىز.
مەملەكەت باسشىسى رەتىندە، مەن ءۇشىن تاۋەلسىزدىك قۇندىلىقتارىن ساقتاۋ، حالىقتىڭ ءال- اۋقاتىن ارتتىرۋ جانە ەلىمىزدى قارقىندى دامىتۋ - باستى مىندەت. مەن ءاردايىم وسى نەگىزگى قاعيداتقا باسا ءمان بەرەمىن. بەس جىل ىشىندە ءبىز ساياسات پەن ەكونوميكادان باستاپ، مادەنيەت پەن ءبىلىم بەرۋ ىسىنە دەيىنگى بارلىق ماڭىزدى سالالار بويىنشا اۋقىمدى ءارى ينستيتۋتسيونالدى وزگەرىستەردى جۇزەگە اسىرا الدىق. ەڭ باستىسى، ءبىز حالىقتىڭ بويىنداعى شىنايى وزگەرىستەرگە دەگەن سەنىمدى وياتتىق. ءبىز ءوز باعىتىمىزدان قايتپايمىز. قولعا العان رەفورمالاردىڭ ءبارىن جوسپارلى تۇردە ىسكە اسىرا بەرەمىز»، - دەدى مەملەكەت باسشىسى.
بۇعان دەيىن حابارلانعانىنداي، پرەزيدەنت قاسىم جومارت توقايەۆ عالىمدارمەن كەزدەستى.