قازاقستاننىڭ ءتورتىنشى عارىشكەرى قاشان عارىشقا اتتانادى - بەكتەنوۆ جاۋابى
استانا. KAZINFORM - پرەمەر-مينيستر ولجاس بەكتەنوۆ ءماجىلىس دەپۋتاتتارىنىڭ قازاقستاننىڭ ءتورتىنشى عارىشكەرىن ۇشىرۋعا قاتىستى ساۋالىنا جاۋاپ بەردى.
قازاقستاندىق عارىشكەرلەردىڭ قاتىسۋىمەن وتەتىن حالىقارالىق عارىش باعدارلامالارىنىڭ جوبالارىنا كەلەتىن بولساق، ولار ۇلتتىق جانە حالىقارالىق تۇرعىدان ورىندى بولاتىن جاعدايلاردا ىسكە اسىرىلاتىنىن اتاپ وتكەن ءجون. باسقارىلاتىن باعدارلامالارعا قاتىسۋ قوماقتى قارجى شىعىندارىن تالاپ ەتەدى، - دەدى پرەمەر-مينيستر جاۋابىندا.
ونىڭ اتاپ وتۋىنشە، وعان تەك ۇشۋدىڭ ءوزى عانا ەمەس، سونىمەن قاتار عارىشكەردى دايارلاۋ، عىلىمي باعدارلاما، لوگيستيكا جانە ۇشۋدان كەيىن قىزمەت كورسەتۋ كىرەدى.
- وسىعان بايلانىستى ءتورتىنشى قازاقستاندىق عارىشكەردىڭ ۇشۋىن جۇزەگە اسىرۋ ماسەلەسى مەيىلىنشە سالماقتى جانە پراگماتيكالىق ءتاسىلدى تالاپ ەتەدى. جوبانىڭ وزەكتىلىگى مەن نەگىزدىلىگى راستالعان جاعدايدا ءتيىستى ءىس-شارالار بەلگىلەنگەن تارتىپپەن حالىقارالىق مىندەتتەمەلەردى ساقتاي وتىرىپ جانە ەلدىڭ قارجىلىق-ەكونوميكالىق مۇمكىندىكتەرىن نەگىزگە الا وتىرىپ ىسكە اسىرىلاتىن بولادى، - دەدى ولجاس بەكتەنوۆ.
ايتا كەتەيىك، مەملەكەت باسشىسى قاسىم-جومارت توقايەۆ «بايقوڭىر» عارىش ايلاعىنىڭ قۇرىلعانىنا 70 جىل تولۋىنا وراي ۆيدەو ۇندەۋ جولدادى.
بۇعان دەيىن «بايقوڭىر» كەشەنىندە تۋريزمدى دامىتۋ تۇجىرىمداماسى ازىرلەنىپ جاتقانىن جازعان ەدىك.
اۆتور
مارلان جيەمباي