قازاقستاننىڭ ءۇش ۋنيۆەرسيتەتى العاش رەت QS 2026 رەيتينگى تىزىمىنە ەندى
استانا. قازاقپارات - QS World University Rankings 2026 ناتيجەلەرى جاريالاندى. بيىلعى رەيتينگكە قازاقستاننىڭ 20 جوعارى وقۋ ورنى ەندى. بۇل تۋرالى عىلىم جانە جوعارى ءبىلىم مينيسترلىگى ءمالىم ەتتى.
- بۇل - ەلىمىزدىڭ جوعارى ءبىلىم بەرۋ ساپاسىنىڭ ارتىپ كەلە جاتقاندىعىنىڭ ايقىن كورىنىسى. رەيتينگكە ەنگەن ءۇش جاڭا ۋنيۆەرسيتەت - ش. ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتى، م. قوزىبايەۆ اتىنداعى سولتۇستىك قازاقستان ۋنيۆەرسيتەتى جانە شاكارىم ۋنيۆەرسيتەتى. بۇل وقۋ ورىندارى العاش رەت الەمدىك رەيتينگكە كىرىپ وتىر، - دەپ جازدى ۆەدومستۆودان.
سونىمەن قاتار ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى العاش رەت جۇمىس بەرۋشىلەر اراسىنداعى بەدەل ينديكاتورى بويىنشا الەمنىڭ ۇزدىك 100 ۋنيۆەرسيتەتىنىڭ قاتارىنا كىردى. سونداي- اق ءال-فارابي اتىنداعى قازاق ۇلتتىق ۋنيۆەرسيتەتى جانە باسقا دا 5 ۋنيۆەرسيتەت وقىتۋشىلار مەن ستۋدەنتتەردىڭ اراقاتىناسى بويىنشا 100 ۇزدىك قاتارىنان ورىن الدى. بۇل كورسەتكىش وقۋ پروتسەسىنىڭ ساپاسى مەن جەكە قاتىناسقا نەگىزدەلگەن ءبىلىم بەرۋدىڭ ماڭىزىن بىلدىرەدى.
مينيسترلىكتىڭ دەرەگىنشە، جاڭا رەيتينگتە Abai University 628 ورىندى يەلەنىپ، وتكەن جىلمەن سالىستىرعاندا بىردەن 43 پوزيتسياعا جوعارى كوتەرىلگەن (671-680 ارالىعى). وسىلايشا، ۋنيۆەرسيتەت الەمنىڭ ۇزدىك 650 جوعارى وقۋ ورنىنىڭ قاتارىنا كىرىپ، قازاقستاننىڭ الدىڭعى قاتارلى ۇزدىك 5 ۋنيۆەرسيتەتىنىڭ ءبىرى رەتىندە ءوز ورنىن نىعايتتى.
- حالىقارالىق ساراپشىلار QS اتىنان ۋنيۆەرسيتەتتەردىڭ عىلىمي- زەرتتەۋ قىزمەتىنە قاتىسۋى، حالىقارالىق ىنتىماقتاستىقتى كەڭەيتۋى جانە تۇلەكتەردىڭ ۇزاقمەرزىمدى پەرسپەكتيۆالارى سەكىلدى باسىم باعىتتارعا نازار اۋدارادى. QS اعا ۆيتسە- پرەزيدەنتى بەن ساۋتەردىڭ ايتۋىنشا، قازاقستان ۋنيۆەرسيتەتتەرى بىرنەشە كورسەتكىش بويىنشا وڭ ديناميكا كورسەتىپ وتىر جانە ولار الەمدىك دەڭگەيگە ۇمتىلۋ جولىندا جاقسى قادامدار جاساپ كەلەدى، - دەلىنگەن حابارلامادا.
QS ايماقتىق ديرەكتورى سەرگەي حريستوليۋبوۆتىڭ پىكىرىنشە، سوڭعى جىلدارى رەيتينگكە ەنگەن ۋنيۆەرسيتەتتەر اراسىندا ايىرماشىلىق بايقالادى. ءبىرقاتار الدىڭعى قاتارلى ۋنيۆەرسيتەتتەر جۇيەلى دامۋ جولىنا تۇسكەن، ال كەيبىر وقۋ ورىندارى جاھاندىق باسەكەلەستىك جاعدايىندا ءوز پوزيتسيالارىن ساقتاپ قالۋدا قيىندىقتارعا تاپ بولدى. وسى تۇرعىدا وقىتۋشىلار قۇرامىنىڭ ساپاسى، عىلىمي- زەرتتەۋ جۇمىستارىنا قاتىسۋى جانە حالىقارالىق ىنتىماقتاستىق ەلەۋلى ءرول اتقارادى.
ايتا كەتۋ كەرەك، ازيا ەلدەرىنىڭ اراسىندا قازاقستان QS رەيتينگىندەگى ۋنيۆەرسيتەتتەر سانى بويىنشا 10-ورىندى يەلەنىپ وتىر. بۇل تىزىمدە قىتاي (72)، ءۇندىستان (54) جانە جاپونيا (47) كوش باستاپ تۇر.
بۇعان دەيىن حابارلانعانداي، قازاقستان جوعارى ءبىلىم بەرۋ سالاسىندا ازياداعى ءىرى حابتاردىڭ بىرىنە اينالىپ كەلەدى. شەتەلدىك ستۋدەنتتەر نە سەبەپتى ءبىزدىڭ ەلدى تاڭدايدى؟ عىلىم جانە جوعارى ءبىلىم مينيسترلىگى شەتەلدىك ستۋدەنتتەردى ەلىمىزگە تارتىپ تۇراتىن بىرنەشە نەگىزگى فاكتوردى اتاپ كورسەتكەن ەدى.