قازاقستاننىڭ بىتىمگەرلەرىنە قانشا وتەماقى قاراستىرىلعان
استانا. KAZINFORM - ق ر قورعانىس ءمينيسترىنىڭ تاربيە جانە يدەولوگيالىق جۇمىستار جونىندەگى ورىنباسارى شايح-حاسان جازىقبايەۆ قازاقستاندىق بىتىمگەرلەرگە قاي سومادا وتەماقى قاراستىرىلعانىن ايتتى.
بۇگىن ءماجىلىستىڭ جالپى وتىرىسىندا دەپۋتاتتار تاياۋ شىعىستاعى سوڭعى وقيعالار اياسىندا جانە گولان بيىگىندەگى جاعدايعا بايلانىستى قازاقستان بىتىمگەرلەرىنىڭ قاۋىپسىزدىگى جونىندە سۇرادى. سونىمەن قاتار ەلىمىزدىڭ اسكەريلەرى جارالانعان جاعدايدا وتەماقى بەرۋ مۇمكىندىگى تۋرالى سۇراق قويىلدى.
ءوز كەزەگىندە شايح-حاسان جازىقبايەۆ 2024 -جىلدىڭ اياعىندا بولعان شيەلەنىس كەزىندە قازاقستاننىڭ بىتىمگەرلىك روتاسى قاقتىعىستى توقتاتۋعا قاتىستى ءىس-شارالارعا جۇمىلدىرىلماعانىن ايتتى.
- مەموراندۋم اياسىندا تەك بىتىمگەرلىك ميسسيا بويىنشا ازاماتتىق پەرسونالدى داماسك قالاسىنا ەۆاكۋتسيامەن اينالىستى. سونداي-اق باسقا ەلدەردىڭ بىتىمگەرلەرىن بازاعا كوشىرۋگە قاتىستى. وتەماقىعا توقتالساق، ەلىمىزدىڭ زاڭدارىمەن بەكىتىلگەن تالاپ بويىنشا ءاربىر توپ مۇگەدەكتىگىنە 6 دان 30 اي تولەماقىعا دەيىن بەلگىلەنگەن. قازا تاپقان جاعدايدا 60 ايلىق مولشەردە تولەنەدى. ال ب ۇ ۇ جاعىنان 77 مىڭ ا ق ش دوللارىنا دەيىن تولەماقى بەكىتىلگەن، - دەدى ق ر قورعانىس ءمينيسترىنىڭ ورىنباسارى.
ەسكە سالساق، بىلتىر جەلتوقسان ايىندا ق ر قورعانىس مينيسترلىگى گولان جوتالارىنداعى بىتىمگەرلەردىڭ قاۋىپسىزدىگى ءۇشىن قاجەت شارا قابىلداپ جاتقانىن حابارلادى.
2024 -جىلى ناۋرىز ايىندا قازاقستاندىق بىتىمگەرلەردى گولان بيىگىنە شىعارىپ سالۋ ءراسىمى ءوتتى.