قازاقستاننىڭ 4 ۋنيۆەرسيتەتى الەمدىك وزىق وقۋ ورىندارىنىڭ رەيتينگىنە ەندى

استانا. KAZINFORM - قازاقستاننىڭ 4 ۋنيۆەرسيتەتى Times Higher Education 2025 رەيتينگىنە ەندى. ولار: نازاربايەۆ ۋنيۆەرسيتەتى، ءال-فارابي اتىنداعى قازاق ۇلتتىق ۋنيۆەرسيتەتى، ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى جانە ساتبايەۆ ۋنيۆەرسيتەتى، دەپ حابارلايدى Kazinform ءتىلشىسى.

نازاربايەۆ ۋنيۆەرسيتەتى 501-600 ورىنعا جايعاسىپ، بىرنەشە قاتارعا كوتەرىلدى. ۋنيۆەرسيتەت، اسىرەسە، «ءبىلىم بەرۋ» ساناتى بويىنشا 251-300 دياپازونىندا ەرەكشەلەندى. بۇل ونىڭ وسى سالاداعى مۇعالىمدەردى دايارلاۋ مەن اكادەميالىق زەرتتەۋلەردەگى كوشباسشىلىعىن ايقىندايدى.

ءال-فارابي اتىنداعى قازاق ۇلتتىق ۋنيۆەرسيتەتى 1201-1500 دياپازونىنا جايعاسىپ، «وقىتۋ» جانە «حالىقارالىق كوزقاراس» ساناتتارىندا ايتارلىقتاي جەتىستىكتەر كورسەتتى.

ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى 1201-1500 دياپازونىندا ءوز پوزيتسياسىن ساقتاپ، «وقىتۋ» جانە «دايەكسوزدەر» ساناتتارى بويىنشا باعالاۋدا ازداعان وزگەرىستەر بايقاتتى.

وتكەن جىلى 1501+ دياپازونىندا بولعان ساتبايەۆ ۋنيۆەرسيتەتى دە ءوز پوزيتسياسىن ساقتاپ قالدى، ءبىراق «حالىقارالىق كوزقاراس» ساناتى بويىنشا كورسەتكىشتەردى جاقسارتتى.

وزىق وقۋ ورىندارىنىڭ كوشىن بريتانيالىق وقۋ ورنى باستاپ، ءبىرىنشى ورىنعا جايعاستى. وكسفورد ۋنيۆەرسيتەتى توعىزىنشى جىل قاتارىنان تاعى دا ۇزدىك دەپ تانىلدى. ودان كەيىن ا ق ش-تىڭ ماسساچۋسەتس تەحنولوگيالىق ينستيتۋتى كەلەدى. ال گارۆارد جانە پرينستون ۋنيۆەرسيتەتتەرى ءۇشىنشى جانە ءتورتىنشى ورىندارعا يە بولدى. سوڭعىسى بىلتىرعى رەيتينگكە قاراعاندا ەكى ساتى جوعارىلادى. كەمبريدج ۋنيۆەرسيتەتى وتكەن جىلعى بەسىنشى ورنىن ساقتاپ قالدى.

ۇلى بريتانيا جانە ا ق ش جوعارعى ورىندارى جۇلدەگەر اتانسا، ەۋروپاداعى بىرنەشە ۋنيۆەرسيتەت ارتتا قالدى. تەك شۆەيتساريانىڭ سيۋريح ۋنيۆەرسيتەتى 11-ورىندى يەلەنىپ، ىلگەرىلەۋشىلىك تانىتتى. ال ميۋنحەن تەحنيكالىق ۋنيۆەرسيتەتى 26-ورىنعا كوتەرىلىپ، گەرمانيا تاريحىندا بولماعان دەڭگەيگە جەتتى. بۇل وسى ەلدەگى ۋنيۆەرسيتەتتەردىڭ قارقىندى دامىپ كەلە جاتقانىن ايقىندايدى.

كەرىسىنشە، فرانسيا، نيدەرلاند جانە شۆەيتسارياداعى ءبىرقاتار ۋنيۆەرسيتەت ساتسىزدىككە ۇشىرادى. مىسالى، دەلفت تەحنيكالىق ۋنيۆەرسيتەتى 56-ورىنعا ءتۇسىپ، نيدەرلاند كورولدىگىندەگى جوعارعى وقۋ ورىندارىنىڭ دەڭگەيى تومەن ەكەندىگىن كورسەتتى.

ەۋروپالىق ۋنيۆەرسيتەتتەردىڭ السىزدىگىنە ازيادان، اسىرەسە قىتاي، وڭتۇستىك كورەيا جانە جاپونيادان جەتكەن باسەكەلەستىك سەبەپ. ازيا ۋنيۆەرسيتەتتەرى ايتارلىقتاي العا جىلجىپ، جاھاندىق رەيتينگتە تەز كوتەرىلىپ جاتىر.

رەيتينگ اۆتورى 20 جىلدىق تاريحى بار Times Higher Education جۋرنالىنىڭ جاھاندىق بايلانىستار جونىندەگى باس مامانى فيل بەيتي ەۋروپالىق وقۋ ورىندارىن كوشتەن قالىپ قويماۋعا ۇندەدى. ول اسىرەسە، فرانسياداعى 50 ۋنيۆەرسيتەتتىڭ 19-نىڭ رەيتينگى تومەندەپ، 10-ى تاريحتا بولماعان ناشار ناتيجە كورسەتكەنىن اتاپ ءوتتى.

اۆتور
عالىمجان قارامان ۇلى