قازاقستاننان ۆەتنامعا ساپارلاعان ادامداردىڭ سانى كۇرت ءوستى

استانا. KAZINFORM - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭى قابىلداندى.

كەلىسىمگە حانوي قالاسىندا 2023 -جىلعى 21-تامىزدا قول قويىلدى. شارت قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىنداعى باس بوستاندىعىنان ايىرۋعا سوتتالعان ادامداردى ءوزىنىڭ ازاماتتىعى تيەسىلى مەملەكەتتە جازاسىن وتەۋ ءۇشىن بەرۋ ماسەلەلەرى جونىندەگى قاتىناستاردى رەتتەۋگە باعىتتالعان. زاڭدى قابىلداۋ ۆەتنام اۋماعىندا قازاقستان ازاماتتارىنىڭ قۇقىقتارى مەن مۇددەلەرىنىڭ ساقتالۋىنا، جاسالعان قۇقىق بۇزۋشىلىق ءۇشىن جازاسىن وتەۋ ورنىن تاڭداۋعا ىقپال ەتەتىن بولادى.

«شارتتىڭ تالاپتارىنا توقتالساق، سوتتالعان ادام ەكى ەلدىڭ ءبىرىنىڭ ازامات بولۋى ءتيىس جانە ءوز ەركىمەن ەلگە قايتارۋ تۋرالى كەلىسىمى كەرەك. قۇجات ەكى ەل اراسىندا ساۋدا- ەكونوميكالىق، كاسىپكەرلىك، تۋريستىك جانە باسقا دا قارىم-قاتىناستاردىڭ دامۋىن ەسكەرە وتىرىپ جاسالدى. ماسەلەن، 2020 -جىلى 1 مىڭعا جۋىق قازاقستان ازاماتى ۆەتنامعا بارسا، ال 2024 -جىلدىڭ 9 ايىندا بۇل ەلگە ساپارلاعان ادامداردىڭ سانى 106 مىڭعا دەيىن وسكەن. ەلىمىزدىڭ ازاماتتارىنىڭ قۇقىعىن بارىنشا قورعاۋ ماڭىزىن ەسكەرە وتىرىپ، اتالعان زاڭدى قابىلداۋدى سۇرايمىز»، - دەدى ق ر باس پروكۋرورىنىڭ ورىنباسارى عالىمجان قويگەلديەۆ.

ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ مالىمەتىنە قاراعاندا، قازاقستان رەسپۋبليكاسى 23 ەلمەن - ازەربايجان، ۋكراينا، تۇرىكمەنستان، ق ح ر، يسپانيا، تۇركيا، يتاليا، ماجارستان، رۋمىنيا، ءۇندىستان، يران، سەربيا، ساۋد ارابياسى، ليتۆا، يوردانيا، موڭعوليا، برازيليا، ب ا ءا، كورەيا رەسپۋبليكاسى، بولگاريا، سولتۇستىك ماكەدونيا، وزبەكستان، كيپرمەن وسىنداي شارتتار جاساستى.

بۇعان دەيىن ءماجىلىس دەپۋتاتى نۇرسۇلتان بايتىلەسوۆ بۇل كەلىسىم قىلمىس جاساعانى ءۇشىن سوتتالعان ەكى ەلدىڭ ازاماتتارىنا جازاسىن ءوز ەلىندە وتەۋگە مۇمكىندىك بەرەتىنىن ايتقان بولاتىن. دەمەك، سوتتالعانداردى وڭالتۋعا جانە ءوز ۇلتىنىڭ قوعامىنا بەيىمدەلۋى ءۇشىن قولايلى جاعداي تۋعىزادى.

اۆتور
رۋسلان عابباسوۆ