قازاقستاننان گەرمانياعا كوشىپ بارعان نەمىستەر قازاق مادەنيەتىن دارىپتەپ ءجۇر

استانا. KAZINFORM - قازاقستاننان گەرمانياعا كوشىپ بارعان نەمىستەر وسى كۇندەرى قازاق مادەنيەتىن دارىپتەپ ءجۇر. تۋعان جەرگە دەگەن ساعىنىشىمىز بەن قۇرمەتىمىزدى وسىلاي ءبىلدىرىپ، ماۋقىمىزدى باسىپ ءجۇرمىز دەيدى گيپپينگەن اۋدانىنداعى «قازان» اتتى ۇيىمنىڭ مۇشەلەرى.

«قازان» ءسوزىن بەرەكە مەن بىرلىكتىڭ سيمۆولى رەتىندە تاڭداپ العان ولار ناۋرىز، اباي كۇنى، رەسپۋبليكا كۇنى سەكىلدى مەرەكەلەردى دە ۇزبەي اتاپ وتەدى. ەلگە دەگەن ساعىنىش، وتانعا دەگەن ماحاببات وسى ءبىر «قازان» دەگەن اتاۋى بار مادەني دەمالىس ورنىنىڭ اشىلۋىنا ارقاۋ بولعان. ءدال قازىر قاسىمدا ۆالەري وسۆالد تۇر. وسى ءبىر ۇيىمنىڭ يەسى. اقمولا وبلىسىنىڭ تۋماسى ۆالەري وسۆالد وسى ورىنمەن اتتاس «قازان» قازاقستاندىق نەمىستەر قاۋىمداستىعىنا ءتوراعالىق ەتەدى.

بىزگە الدىمەن كىرەبەرىستەگى جاس جەمىس اعاشتارى جايلى ايتىپ بەردى. ولار بيىلعى ناۋرىزدا وسى قاۋىمداستىق وكىلدەرى مەن قازاقستاندىق ديپلوماتتار ەككەن الما اعاشتارى ەكەن. اسەم الماتىنى ەسكە ءتۇسىرىپ تۇرسىن دەگەن نيەت. اۋلاداعى التى قانات كيىز ءۇي دە كوزگە وتتاي باسىلدى. بۇل جەردە ەت جەپ، قىمىز ءىشۋ قازاقستاندىق نەمىستەردىڭ مەرەكە سايىنعى داستۇرىنە اينالعان. ال عيماراتتىڭ ءىشى اتامەكەننىڭ سۇلۋ كورىنىستەرى مەن قولونەر بۇيىمدارىمەن بەزەندىرىلىپتى.

ۆالەري وسۆالد، «قازان» ۇيىمىنىڭ ءتوراعاسى:

- قاۋىمداستىعىمىزعا مۇشە ادامدار سانى 100-گە جۋىقتادى. بۇل ءار مەرەكە سايىن كەلىپ، ءىس-شارالار ۇيىمداستىرۋعا قاتىسىپ جۇرگەن بەلسەندى وتانداستىرىمىز. قوناق بولىپ گەرمانيانىڭ تۇكپىر-تۇكپىرىنەن كەلەتىندەر ودان دا كوپ. وزگە ەلدەردەن دە مەيماندار ءجيى بولىپ تۇرادى. 2016 -جىلدان بەرى تالاي مەرەكەلەر مەن باسقوسۋلار وتكىزدىك. كوپشىلىك كيىز ءۇيدى قىزىقتايدى. قازاقى داستارقان جايىپ، ەت، قۋىرداق، باۋىرساق جەپ، شاي ءىشىپ قايتقاندى قالايدى. وسى نىساندى اباي ءۇيى دەپ اتاپ، قازاقستاننىڭ گەرمانياداعى ءبىر بولىگىندەي قاستەرلەپ قارايمىز.

«قازان» قاۋىمداستىعى عيماراتىندا اباي مۇراسىنا ارنالعان ارنايى بۇرىش ۇيىمداستىرىلعان. وندا اقىن ولەڭدەرىنىڭ نەمىس تىلىندەگى اۋدارمالارى مەن قازاق مادەنيەتىنە قاتىستى كىتاپتار بار. ۇلتتىق كيىمدەر مەن قارا دومبىرانى دا بايقاۋعا بولادى.

سەرگەي ليۋفت، «قازان» ۇيىمىنىڭ مۇشەسى:

- قازاقستاندا تۋىپ، اس-سۋىن ءىشىپ وستىك. مال جايۋعا شىققاندا كىشكەنتاي مەنى اتقا بىرگە مىنگىزىپ الىپ، سەيىل قۇرىپ قايتاتىنبىز. نەمىس بالاسى ءۇشىن ول اسا قىزىق ەدى. قازىر جىلى ەستەلىك بولىپ جادىمدا قالدى. گەرمانياعا كوشىپ كەلگەلى 30 جىلداي بولسا دا، قازاقستاندى ءالى تۋعان جەرىم دەپ ساعىنىپ وتىرامىن. سول ساعىنىشتىڭ اسەرىنەن بولۋ كەرەك، وسىنداعى نەمىستەرگە قازاقستان جايلى كوبىرەك ايتىپ، تانىستىرعىمىز كەلەدى. ءوزىمىزدىڭ ءىس- ارەكەتىمىزبەن قازاقتىڭ قوناقجاي كەڭ پەيىلىن كورسەتكىمىز كەلەدى.

فيەدور سالنيكوۆ، «قازان» ۇيىمىنىڭ مۇشەسى:

- كيىز ءۇي جايلى ەستەلىكتەر ءاردايىم دەنەمدى شىمىرلاتىپ جىبەرەدى. كەيدە وسى «قازان» ۇيىمىنىڭ كيىز ۇيىندە قونىپ دەمالىپ قايتاتىنىمىز بار. تاڭەرتەڭ ويانعان كەزدەگى بۇلبۇلدىڭ سايراۋى، قورازدىڭ شاقىرۋى، سيىردىڭ موڭىرەۋىنەن قازاقستانداعى اۋىلدا وتكەن بالالىق شاعىم ەسىمە تۇسەدى. ەرەكشە سەزىم. قازىر وسى جەرگە بالالارىمدى اكەلىپ ءجۇرمىن.

وتانعا دەگەن ساعىنىش وسىلايشا قازاقستان-گەرمانيا قارىم-قاتىناسىنىڭ بەكي تۇسۋىنە وزىنشە ۇلەس قوسىپ وتىر. المانيانىڭ تۇكپىر-تۇكپىرىندەگى وسىنداي ۇيىمدار ەكى ەلدىڭ دوستىعىن ۇلىقتاپ قانا قويماي، قازاق مادەنيەتىن دارىپتەۋدى دە وزدەرىنە ماقسات تۇتىپتى.

اۆتورلارى: ەردانا ەرجان ۇلى، پاۆەل رۋبان

24.kz