قازاقستاننان قاي ەلدەرگە اقشا ەڭ كوپ اۋدارىلادى

استانا. KAZINFORM - قازاقستانداعى جەكە تۇلعالاردىڭ شوتتارىنا قاي ەلدەردەن اقشا كوپ اۋدارىلادى. ۇلتتىق بانك 2025-جىلدىڭ ءبىرىنشى توقسانىنداعى مالىمەتتەردى جاريالادى.

جالپى العاشقى ءۇش ايدا جەكە تۇلعالار قازاقستانعا 59,26 ميلليون دوللار اقشانى قايتارىمسىز نەگىزدە اۋدارعان. ونىڭ 7,95 ميلليون دوللارى ت م د ەلدەرىنەن، 43,31 ميلليون دوللار باسقا ەلدەردەن. جەكەلەگەن مەملەكەتتەرگە كەلسەك، ەڭ كوپ اۋدارىلعان سوما ا ق ش (16,6 ميلليون دوللار)، گەرمانيا (7,95 ميلليون دوللار)، وڭتۇستىك كورەيا (5,11 ميلليون دوللار)، رەسەي (4,77 ميلليون دوللار) ەلدەرىنە تيەسىلى.

ال قازاقستانداعى جەكە تۇلعالاردان قايتارىمسىز نەگىزدە 157,46 ميلليون دوللار اۋدارىلعان. ايىرماشىلىق - 3 ەسەگە جۋىق.

ونىڭ ىشىندە ت م د ەلدەرىنە 939,6 ميلليون دوللار، باسقا ەلدەرگە 63,5 ميلليون دوللار جونەلتىلگەن.

جەكەلەگەن مەملەكەتتەرگە كەلسەك، قازاقستانداعى جەكە تۇلعالاردان ەڭ كوپ اقشا قابىلدايتىن ەل - رەسەي فەدەراتسياسى (59,24 ميلليون دوللار). رەسەيدەن قازاقستانعا جەكە تۇلعالار اۋدارعان اقشا مەن قازاقستاننان رەسەيگە جەكە تۇلعالار اۋدارعان اقشانىڭ ايىرماشىلىعى - 12 ەسە. ەكىنشى ورىندا تۇركيا تۇر. بۇل ەلگە قازاقستانداعى جەكە تۇلعالاردان 27,72 ميلليون دوللار قايتارىمسىز نەگىزدە اۋدارىلعان. وزبەكستان تەك ءۇشىنشى ورىندا - 19,23 ميلليون دوللار. سونداي-اق گرۋزياعا 10,99 ميلليون دوللار اۋدارىلعان.

ايتا كەتۋ كەرەك، بيىلعى قىركۇيەكتە ەلدەگى ەكىنشى دەڭگەيلى بانكتەردىڭ ءبارى «ۇلتتىق تولەم كورپوراتسياسىنىڭ» اۋدارىم جۇيەسىنە قوسىلادى دەپ كۇتىلىپ وتىر.