قازاقستاننان جىلدا 16 ميلليارد دوللار زاڭسىز شىعارىلادى - سەناتور

استانا. KAZINFORM - سەناتتىڭ قارجى جانە بيۋدجەت كوميتەتىنىڭ دەپۋتاتتارى «كاپيتالدى زاڭسىز اكەتۋدىڭ الدىن الۋ ماقساتىندا ۆاليۋتالىق رەتتەۋدى جۇزەگە اسىرۋ» تاقىرىبىنا ارنالعان دوڭگەلەك ۇستەل وتىرىسىن وتكىزدى.

«قازاقستاننان جىل سايىن شامامەن 16,7 ميلليارد دوللار زاڭسىز شىعارىلادى. 148 ەلدىڭ رەيتينگىندە ءبىزدىڭ ەلىمىز 11- ورىندا تۇر. قازاقستان ەكونوميكاسىنىڭ شيكىزاتتىق باعىتى بار ەكەنىن ءبارىمىز بىلەمىز. قازاقستان كومىرسۋتەگى مەن مەتالداردىڭ ەكسپورتىنا وتە تاۋەلدى بولىپ وتىر. ياعني، ءبىزدىڭ ەكسپورتىمىزدىڭ نەگىزى - جەر قويناۋىنان الىنعان قازبالار، ول تۇپكىلىكتى ءونىم ەمەس. تيىسىنشە، پايدالى قازبالاردى ەكسپورتتاۋ ەسەبىنەن تىكەلەي نەمەسە جاناما تۇردە الىنعان كاپيتالدى شەتەلگە زاڭسىز شىعارۋ دەرەكتەرى قوعامعا وتە اۋىر تيەدى جانە مۇقيات باقىلاۋدا بولادى. وسىلايشا، بۇل پروبلەما ەكونوميكا اياسىنان شىعىپ، الەۋمەتتىك جانە ساياسي سيپاتقا يە بولادى»، - دەدى سەناتتىڭ قارجى جانە بيۋدجەت كوميتەتىنىڭ ءتوراعاسى سۇلتانبەك ماكەجانوۆ.

سەناتور مەملەكەت باسشىسىنىڭ تاپسىرماسى بويىنشا شەتەلگە زاڭسىز قارجى شىعارۋ پروبلەماسىنا ەرەكشە نازار اۋدارىلىپ وتىرعانىن اتاپ ءوتتى. بۇل ماسەلەنى شەشۋ ءۇشىن ارنايى مەكەمەارالىق كوميسسيا قۇرىلعان بولاتىن. سونىمەن قاتار، ءتيىستى زاڭنامالىق وزگەرىستەر قابىلداندى، ونىڭ ىشىندە ۆاليۋتالىق رەتتەۋ جونىندە دە وزگەرىستەر بار.

اۆتور

رۋسلان عابباسوۆ