قازاقستاننان باعا جەتپەس جادىگەرلەر سىرتقا اكەتىلگەن

استانا. KAZINFORM - قازاقستاننان باعا جەتپەس جادىگەرلەر سىرتقا شىعارىلعان. بۇل جايىندا باس پروكۋراتۋرا جانىنداعى اكتيۆتەردى قايتارۋ كوميتەتىنىڭ ءتوراعاسى نۇرداۋلەت سۇيىندىكوۆ Jibek Joly تەلەارناسىنىڭ «قايتارىلۋى ءتيىس» دەرەكتى فيلمىندە ايتتى.

ەلىمىزدەگى جانە ودان تىسقارى جەرگە شىعارىلعان اكتيۆتەردى قايتارۋعا باعىتتالعان كۇردەلى پروتسەسس باستالدى.

وسىعان وراي باس پروكۋراتۋرا حالىقارالىق ىنتىماقتاستىق اياسىندا ءتۇرلى ەلگە مۇلىكتەردى بۇعاتتاۋ جانە تاركىلەۋ بويىنشا سۇرانىس تا جىبەرىپ وتىر.

مۇنداي ەلدەردىڭ قاتارىندا ا ق ش، ۇلى بريتانيا، موناكو، يسپانيا، يتاليا، ب ا ءا جانە وزگە دە ەلدەر بار.

«ءبىرىنشى كەزەكتە بۇل ءسان- سالتاناتى كەلىسكەن جىلجىمايتىن مۇلىكتەر - ۆيللالار، قىمبات تۇرعىن ءۇي كەشەنىندەگى اپارتامەنتتەر، قىمبات اۆتوموبيلدەر، قوناق ۇيلەر، بيزنەس ورتالىقتارى. ولار - 1 ميلليون، ءتىپتى، كەي جاعدايدا 1 ميلليارد تەڭگە بولاتىن زەرگەرلىك بۇيىمدار مەن برەند زاتتار. باعالاۋ جۇرگىزدىك، بىرنەشە جۇزدەگەن ميلليون، ءتىپتى ودان دا قىمبات تۇراتىن برەند زاتتار بار. بۇل ليۋكس بولىگىنە قاتىستى. ءبىراق، مۇنان بولەك، بۇعان دەيىن ايتقانىمداي قازىردىڭ وزىندە قايتارىلعان جانە قايتارۋ پروتسەسىندە تۇرعان ءتۇرلى كەن ورىندارى بار. مەملەكەتكە مونوپوليستەردەن كاسىپورىندار، 10 مىڭ گەكتاردان استام جەر قايتارىلدى»، - دەيدى نۇرداۋلەت سۇيىندىكوۆ.

ونىڭ ايتۋىنشا، سونىمەن قاتار تاريحي-مادەني مۇرا جادىگەرلەرى دە قايتارىلعان. ساراپشىلار ولاردىڭ شىنايى باعاسىن بەرە الماي وتىر.

«سوت پروتسەسىنە جۇمىلدىرىلعان ساراپشىلاردىڭ پىكىرىنشە، ءبىزدىڭ داۋىرىمىزگە دەيىن جاسالۋى مۇمكىن زاتتار جايىندا ءسوز بولۋى ىقتيمال. سوندىقتان دا وسىناۋ تاريحي- مادەني مۇرانىڭ بىرەگەي جادىگەرلەرى مەملەكەتكە قايتارىلعاننان كەيىن مۋزەيلەرىمىزگە بەرىلەتىن شىعار»، - دەدى ول.