قازاقستاننان العاش رەت قوس كاراتەشى الەمدە جىل ۇزدىگى اتاندى

استانا. KAZINFORM - ماروككو استاناسى راباتتا كاراتەدەن پرەمەر-ليگا ساناتىنداعى جىلدىڭ قورىتىندى تۋرنيرى مارەسىنە جەتتى.

قازاقستان كاراتە فەدەراتسياسىنان ءمالىم ەتكەنىندەي، بيىلعى 4 جارىستىڭ ناتيجەسىندە ءوز سالماعىنداعى رەيتينگتە كوپ ۇپاي جيناعان وتانداستارىمىز ءمولدىر جاڭبىرباي (-50 ك گ) مەن اسەل قاناي (-61 ك گ) ۇزدىك سپورتشىعا بەرىلەتىن Grand Winner اتالىمىنا يە بولدى.

وسىعان دەيىن ۇلتتىق قۇرامانىڭ 2 سپورتشىسى قاتار مۇنداي ماراپاتقا يە بولماعان.

ءمولدىر جاڭبىرباي بىلتىر تۇڭعىش رەت 50 كەلىگە دەيىنگى سالماقتا Grand Winner جۇلدەسىن جەڭىپ العان ەدى. ول - قازاقستاننان وسى سىيلىقتى 2 مارتە يەلەنگەن العاشقى كاراتە شەبەرى.

ءمولدىر بيىل پاريج قالاسىندا وتكەن العاشقى پرەمەر-ليگا باسەكەسىندە قولا، حانچجوۋدا كۇمىس، كايردە التىن مەدالعا قول جەتكىزدى. اسەل پاريج بەن كايردە كۇمىس، حاڭجوۋدا قولا مەدال ولجالاعان.

سونىمەن قاتار بيىل وسى اتاقتان توكيو وليمپياداسىنىڭ قولا جۇلدەگەرى سوفيا بەرۋلتسەۆا دا ءۇمىتتى بولدى. الايدا كوماندا كوشباسشىسى راباتتا توپتىق كەزەڭنەن شىعا الماي، ۇپاي سانى جاعىنان قارسىلاسىن قۋىپ جەتە المادى.