قازاقستاندىقتاردىڭ تۇرمىسى نەگە تومەن؟ مينيستر جاۋاپ بەردى

ۇلتتىق ەكونوميكا ءمينيسترى الىبەك قۋانتىروۆ قازاقستاندىقتاردىڭ تۇرمىسى نەگە تومەن ەكەنىن، حالىقتىڭ تابىسى نەگە وسپەي جاتقانىن ءتۇسىندىردى.

ءماجىلىستىڭ جالپى وتىرىسىنان شىققان مينيسترگە جۋرناليست «ۇكىمەتتىڭ بايانداماسىندا ەلىمىزدە ەكونوميكالىق ءوسىم بارى، ينفلياتسيا تومەندەپ جاتقانى ايتىلادى. الايدا تاۋارلاردىڭ باعاسى ءوسىپ جاتىر، وعان قازاقستاندىقتار شاعىمدانىپ وتىر. نەگە ۇكىمەتتىڭ بايانداماسى شىندىقتان الشاق جاتىر؟» دەگەن سۇراق قويدى.

الىبەك قۋانتىروۆ بۇل ماسەلەنى بىلەتىنىن جەتكىزدى.

«وكىنىشكە قاراي، جوعارى ينفلياتسيا ەكونوميكا ءۇشىن جاقسى بەلگى ەمەس. ەكىنشىدەن، كەز كەلگەن دامىپ كەلە جاتقان ەكونوميكادا ينفلياتسيا بار. ءبىز قابىلداعان شارالاردىڭ ارقاسىندا ينفلياتسيانى تەجەدىك. ەگەر بۇل شارالار بولماسا، ول الدەقايدا جوعارى بولار ەدى»، - دەدى ۆەدومستۆو باسشىسى.

شەنەۋنىك قازاقستان ەكونوميكاسىندا ءوسىم بارىن جوققا شىعارۋعا بولمايتىنىن ايتتى.

«ءسىز ستاتيستيكانى كورسەڭىز، حالىقارالىق رەيتينگ اگەنتتىكتەرى ءبىزدىڭ رەيتينگتەردى راستايدى. بىزدە (ەكونوميكالىق - ەسك.) جاعداي جاقسارادى دەگەن ءۇمىت بار. ءبىز سول ءۇشىن جۇمىس ىستەپ جاتىرمىز»، - دەدى الىبەك قۋانتىروۆ.

حالىقتىڭ تابىسىنىڭ وسپەۋىنە الەمدەگى جاعدايلار دا اسەر ەتكەن.

«كوروناۆيرۋستان كەيىنگى جاعداي، بىلتىر كونتينەنتىمىزدە باستالعان سوعىس، گەوساياسي قاقتىعىستىڭ ۋشىعۋى. ولار ەكونوميكالىق وسىمگە، ونىڭ ىشىندە قازاقستانعا دا تەرىس اسەرىن تيگىزەدى. سونداي-اق، قازاقستان تەڭىزگە شىعا المايتىن مەملەكەت بولىپ سانالادى. مۇنداي كاتاكليزمدەر بولعان كەزدە بىزگە ساۋدا جاساۋ قيىن. سوندىقتان قازاقستان ەكسپورتتىق باعىتتارىن ءارتاراپتاندىرۋعا جول ىزدەيدى. ءبىز ساياسي، ەكونوميكالىق رەفورمالارمەن، ونىڭ ىشىندە جاڭا سالىق كودەكسىمەن جۇمىس ىستەپ جاتىرمىز. مەنىڭ ويىمشا، مۇندا تەك نەگاتيۆ كورسەتۋدىڭ قاجەتى جوق. سەبەبى اۋقىمدى جۇمىس ىستەلىپ جاتىر. ول بارىنە كورىنبەۋى مۇمكىن»، - دەدى مينيستر.

قۋانتىروۆ ەكونوميكاعا بايلانىستى الەۋمەتتىك جەلىلەردەگى جاعىمسىز پىكىرلەرگە قاتىستى پىكىر ءبىلدىردى.

«ارينە، جاعدايدى باقىلايمىز، مۇنى بىلەمىز. سەبەبى ناقتى جاعدايدى كورۋىمىز كەرەك. سوندىقتان مەن وڭىرلەردى ارالايمىن، حالىقپەن، اسىرەسە، اۋىل تۇرعىندارىمەن كەزدەسەمىن. ءبىز ناقتى جاعدايدى كورىپ، ولارعا كومەكتەسۋگە تىرىسامىز. ۇكىمەتكە بەلگىلى ءبىر دەڭگەيدە سەنىم بولۋعا ءتيىس. نەگىزىنەن ءبىزدىڭ باستى مىندەتىمىز - حالىقتىڭ ءومىر ءسۇرۋ دەڭگەيىن كوتەرۋ»، - دەدى قۋانتىروۆ.

Massaget.kz