قازاقستاندىقتاردىڭ بارلىق شىعىندارىنىڭ 52 پايىزى تاماققا جۇمسالادى

قازاقستاندا ازىق-تۇلىككە جۇمسالاتىن شىعىن 14 پايىزعا ءوستى. Kazinform اگەتتىگى بۇل تۋرالى Finprom.kz-كە سىلتەمە جاساپ حابارلايدى.

2023 -جىلدىڭ ەكىنشى توقسانىندا ءۇي شارۋاشىلىقتارىنىڭ ازىق-تۇلىك پەن الكوگولسىز سۋسىندارعا جۇمساعان شىعىندارى 13,9 پايىزعا ءوسىپ، 421,1 مىڭ تەڭگەنى قۇرادى.

بۇل شىعىنداردىڭ ازىق-تۇلىك تاۋارلارىنا جۇمسالعان بارلىق شىعىندارداعى ۇلەسى 92 پايىزدى، جالپى تۇتىنۋ شىعىندارىنان 52 پايىزدى قۇرادى.

سالىستىرۋ ءۇشىن: وتكەن جىلدىڭ سايكەس كەزەڭىندە ازىق-تۇلىك پەن الكوگولسىز سۋسىندارعا جۇمسالعان شىعىن 369,8 مىڭ تەڭگەنى قۇرادى، بۇل ءبىر جىل بۇرىنعىدان 9,6 پايىزعا ارتىق.

وڭىرلەر بويىنشا ازىق-تۇلىك پەن الكوگولسىز سۋسىندارعا ەڭ كوپ شىعىن تۇركىستان وبلىسىنىڭ تۇرعىندارى اراسىندا تىركەلدى: توقسانىنا 557,5 مىڭ تەڭگە - ءبىر جىل بۇرىنعىدان 13,9 پايىزعا ارتىق.

تاماققا كوپ اقشا جۇمسايتىن وڭىرلەردىڭ «بەستىگىنە» سونىمەن قاتار ماڭعىستاۋ وبلىسى (551,6 مىڭ تەڭگە، پليۋس 10 پايىز)، اتىراۋ وبلىسى (512,4 مىڭ تەڭگە، پليۋس 14,5 پايىز)، ۇلىتاۋ وبلىسى (502,5 مىڭ تەڭگە، پليۋس 30 پايىز) جانە الماتى وبلىسى (484,3 مىڭ تەڭگە پليۋس 7,6 پايىز) كىردى.

ازىق-تۇلىك پەن الكوگولسىز سۋسىندارعا شىعىنداردىڭ جىل سايىنعى ەڭ ۇلكەن ءوسىمى ۇلىتاۋ وبلىسىندا، ەڭ ازى - پاۆلودار وبلىسىندا بايقالدى.

تۇرعىنداردىڭ ازىق-تۇلىك جانە الكوگولسىز سۋسىندارعا جۇمساعان شىعىندارىنىڭ قۇرىلىمىندا ەڭ كوپ ۇلەستى (33,4 پايىز) ەت جانە ەت ونىمدەرى الىپ وتىر: رەسپۋبليكا بويىنشا ورتاشا كورسەتكىش - 140,6 مىڭ تەڭگە. بۇل وتكەن جىلمەن سالىستىرعاندا 14,7 پايىزعا ارتىق.

ەكىنشى قاتاردا نان ونىمدەرى مەن جارما ونىمدەرى تۇر: 64,5 مىڭ تەڭگە، پليۋس 15 پايىز. «ۇشتىكتى» ءسۇت ونىمدەرى جاپتى - قازاقستاندىقتار ولارعا 44,7 مىڭ تەڭگە جۇمسادى، بۇل 2022 -جىلدىڭ ەكىنشى توقسانىمەن سالىستىرعاندا 21,4 پايىزعا كوپ.

ەل تۇرعىندارى جەمىس-جيدەكتەرگە 35,1 مىڭ تەڭگە، كوكونىس ساتىپ الۋعا 34,3 مىڭ تەڭگە، قانت، كونديتەرلىك ونىمدەر مەن تاتتىلەرگە 28,1 مىڭ تەڭگە، مايعا 22,7 مىڭ تەڭگە، الكوگولسىز سۋسىندار مەن بالىق، تەڭىز ونىمدەرىنە 17,6 مىڭ تەڭگە، جۇمىرتقاعا - 9,1 مىڭ تەڭگە جۇمسادى.

اۆتور

زارينا تۋعانبايەۆا