قازاقستاندىقتاردان ساۋساق ءىزىن الۋ ءتارتىبى قالاي وزگەردى-ۇكىمەت قاۋلىسى

  «اشىق ن ق ا» پورتالىندا «داكتيلوسكوپيالىق جانە گەنومدىق تىركەۋدى جۇرگىزۋ قاعيدالارىن بەكىتۋ تۋرالى» ۇكىمەت قاۋلىسىنا ەنگىزىلەتىن وزگەرىستەر جوباسى جاريانلاندى، دەپ حابارلايدى Kazinform.

قۇجات 19-قاڭتارعا دەيىن قوعام تالقىلاۋىندا بولادى. قاۋلى جوباسىندا قازاقستان ازاماتتارى جەكە كۋالىك پەن پاسپورتتى ءبىرىنشى رەت الۋ ءۇشىن، سونداي-اق ونى قالپىنا كەلتىرىپ، اۋىستىرۋ ءۇشىن وتىنىشپەن كەلگەندە ىشكى ىستەر مينيسترلىگىنىڭ ورگاندارى ەرىكتى تۇردە، ياعني ءوتىنىش بەرۋشىنىڭ كەلىسىمىمەن عانا ساۋساق ءىزىن الاتىنى ايتىلعان.

ال قازاقستان رەسپۋبليكاسىندا ۋاقىتشا تۇرۋعا رۇقسات بەرۋ كەزىندە شەتەلدىكتەر مەن ازاماتتىعى جوق ادامداردان ساۋساق ءىزى مىندەتتى تۇردە الىنادى.

قازاقستان اۋماعىندا تۇراقتى تۇرۋعا رۇقساتتى رەسىمدەۋ كەزىندە شەتەلدىكتەر مەن ازاماتتىعى جوق ادامداردىڭ داكتيلوسكوپيالىق اقپاراتى مىناداي مالىمەتتەردى قامتيدى:

1) اتى، اكەسىنىڭ اتى (ەگەر ول جەكە باستى كۋالاندىراتىن قۇجاتتا كورسەتىلسە)، تەگى؛

2) تۋعان كۇنى؛

3) جىنىسى؛

4) قولدارىنىڭ ون ساۋساعىنىڭ پاپيلليارلىق بەدەرى قۇرىلىمىنىڭ ەرەكشەلىكتەرى تۋرالى اقپارات؛

5) ازاماتتىعى؛

6) فوتوسۋرەتى؛

7) جەكە باسىن كۋالاندىراتىن قۇجاتتىڭ ءنومىرى، بەرىلگەن كۇنى، قولدانىلۋ مەرزىمى؛

8) داكتيلوسكوپيالىق تىركەۋ جۇرگىزىلگەن كۇن مەن نەگىزى؛

9) داكتيلوسكوپيالىق تىركەۋدى جۇزەگە اسىرعان ادامنىڭ اتى، اكەسىنىڭ اتى (ەگەر ول جەكە باستى كۋالاندىراتىن قۇجاتتا كورسەتىلسە)، تەگى؛

10) ۆيزا، ۋاقىتشا تۇرۋعا رۇقسات بەرىلگەن كۇنى، قولدانىلۋ مەرزىمى؛

11) تۇراقتى تۇرۋ جوسپارلانىپ وتىرعان جەردىڭ مەكەنجايى؛

12) تۇراقتى تۇرۋعا ءوتىنىشتى قاراعان ورگاننىڭ اتاۋى قوسىمشا ەنگىزىلەدى.

كوشى قون ۆەدومستۆوسىنىڭ قىزمەتكەرى قازاقستان ازاماتىن قۇجاتتاۋ ءراسىمىن باستاماس بۇرىن ودان داكتيلوسكوپيالىق تىركەۋدەن وتۋگە نيەتى بار-جوعىن سۇرايدى.

«ەگەر ول داكتيلوسكوپيالىق تىركەۋدەن وتۋگە نيەت بىلدىرسە، كوشى-قون قىزمەتىنىڭ قىزمەتكەرى ءوتىنىم قالىپتاستىرادى. قازاقستان رەسپۋبليكاسىنىڭ ازاماتى داكتيلوسكوپيالىق تىركەۋدەن وتۋدەن باس تارتقان كەزدە كوشى-قون قىزمەتىنىڭ قىزمەتكەرى قۇجاتتاۋدى جالعاستىرادى. قازاقستان رەسپۋبليكاسىنىڭ ازاماتى بۇرىن داكتيلوسكوپيالىق تىركەۋدەن وتكەن بولسا، قىزمەتكەر «ج ب س» ا ا ج ارقىلى تەكسەرۋ جۇرگىزەدى»،-دەلىنگەن قاۋلى جوباسىندا.

ۇسىنىلىپ وتىرعان وزگەرىستە داكتيلوسكوپيالاۋعا مۇمكىندىك بەرمەيتىن دەنە كەمىستىكتەرىنىڭ قاتارى دا ناقتىلانعان.

ولار:

1) ەكى قولىڭىزدا بارلىق ساۋساقتاردىڭ نەمەسە قولدىڭ بولماۋى؛

2) داكتيلوسكوپيالىق تىركەۋدەن وتۋدەن بوساتۋ ءۇشىن نەگىز بولىپ تابىلاتىن بار سىرقاتى تۋرالى دارىگەرلىك- كونسۋلتاتسيالىق كوميسسيا قورىتىندىسىنىڭ بولۋى.

بۇعان دەيىن ءماجىلىس ساۋساق ءىزىن تاپسىرۋ مىندەتى تۋرالى باستامانى زاڭنان الىپ تاستاعانىن جازعان ەدىك.

اۆتور

ەسىمجان ناقتىباي