سپورتشى بۇل دودادا قازاقستاندىق جانكۇيەرلەردىڭ قولداۋىن سەزىنگەنىن ايتتى.
- مەنى قولداپ-قۋاتتاپ جاتقاندارىڭىزدى ەستىپ جاتىرمىن، وتە قۋانىشتىمىن. كوپ-كوپ راحمەت ايتقىم كەلەدى، بارلىقتارىڭىزعا جالىندى سالەم، - دەدى ول.
سونىمەن قاتار قانداسىمىز جۇلدەدەن كەيىنگى اسەرىمەن ءبولىستى.
- بۇل - العاشقى حالىقارالىق دودادا جەڭىپ العان جۇلدەم. سوندىقتان مەن ءۇشىن ونىڭ ءمانى وتە زور. ءوز ەلىمدە جۇلدەگە قول جەتكىزگەنىمە قۋانىشتىمىن، - دەيدى سامعار.
ول ەندىگى كەزەكتە وليمپياداعا جولداما الۋدى جوسپارلاپ وتىرعانىن تىلگە تيەك ەتتى.
- الدا تاعى ەل بىرىنشىلىگى بار. سوسىن باستى نازاردا - ميلان وليمپياداسى. جولداما الۋعا بار كۇشىمدى سالىپ، جاقسى ناتيجە كورسەتۋگە تىرىسامىن، - دەدى قانداسىمىز.
ايتا كەتەيىك، سامعار سەرىك ۇلى حاربين قىسقى ازيا ويىندارىندا ەرلەر اراسىندا شاڭعىمەن سىرعاناۋدان سپرينت باعدارلاماسىندا ونەر كورسەتىپ، 2 مينۋت 58.51 سەكۋند ناتيجەمەن قولا مەدال ەنشىلەدى.
سامعار سەرىك ۇلى 2005 -جىلى 10-قاڭتار قىتايدىڭ سولتۇستىك- باتىسىنداعى شينجاڭ ۇيعىر اۆتونوميالىق ولكەسى التاي ايماعى التاي قالاسىندا دۇنيەگە كەلگەن. ول 2023 -جىلى ەل چەمپيوناتىندا كوزگە ءتۇسىپ، 2024 -جىلى شينجاڭ قۇراماسى ساپىندا قىتاي قىسقى سپورت سپارتاكياداسىنىڭ چەمپيونى اتانعان.
بۇعان دەيىن حابارلاعانىمىزداي، قىتاي قۇراماسىنىڭ ساپىندا ۇلتى قازاق 4 سپورتشى IX قىسقى ازيا ويىندارىنا قاتىسىپ جاتىر. ولار: اقنار اداق قىزى (كونكيمەن جۇگىرۋ)، قاناعات مۇحامەد ۇلى (كونكيمەن جۇگىرۋ)، بايان جالىن قىزى (شاڭعى) جانە سامعار سەرىك ۇلى (شاڭعى).
اۆتور
مۇحتار قاليموللا ۇلى